މިއަދު ކުރިއަށްދިޔަ ގުރައިދޫ ދާއިރާގެ ބައި އިލެކްޝަން ސަރުކާރު ހިންގާ މައި ޕާޓީ އެމްޑީޕީން ކާމިޔާބުކޮށް ގުރައިދޫ ދާއިރާގެ ޕީޕީއެމުން ދަމަހައްޓަމުންދިޔަ ދިގު މާޒީ ނިމުމަކަށް ގެނެސްފިއެވެ.
ފާއިތުވި ފަނަރަ އަހަރުވެސް ޕީޕީއެމްގެ ފިކުރުން ތަމްސީލް ކުރަމުންދިޔަ މިގޮޑި އެމްޑީޕީން ކާމިޔާބުކުރީ ވާދަވެރި އިންތިޚާބަކަށްފަހު އިދިކޮޅު ޕީޕީއެމްއާއި، އެމްއެންޕީ ބަލިކޮށްފައެވެ. އެމްޑީޕީގެ ޝާޒް މިއިންތިޚާބު ކާމިޔާބުކުރީ ވާދަވެރިގޮތަކަށް ޕީޕީއެމްގެ ކެނޑިޑޭޓް ރިޒާއާއި ވާދަކޮށެވެ. އޭނާ އިންތިޚާބު ކާމިޔާބު ކުރީ ގުރައިދީ، މާފުޅި، ގުޅި އަދި މާލޭގެ ވޯޓުންވެސް ޕީޕީއެމް އަދި އެމްއެންޕީގެ މައްޗަށް ކުރި ހޯދައިގެންނެވެ. ބައެއް ފޮށިތަކުން އޭނާވަނީ އިދިކޮޅު ޕީޕީއެމްގެ ކެނޑިޑު ތަފާތު ބޮޑުކޮށް ބަލިކޮށްފައެވެ.
މި އިންތިޚާބުގައި ޝާޒަށް ލިބިފައިވަނީ 1،340 ވޯޓެވެ. އޭނާއާ އެންމެ ގާތުން ވާދަ ކުރި ރިޒާއަށް ލިބިފައިވަނީ 1،226 ވޯޓެވެ. ދެ ކެންޑިޑޭޓުންގެ މެދުގައި 114 ވޯޓުގެ ތަފާތު ހުއްޓެވެ.
އިންތިޚާބު އެމްޑީޕީގެ ކެނޑިޑޓް ޝާޒް ކާމިޔާބު ކުރިނަމަވެސް، ބައެއް ފޮށިތަކުން ކުޑަ ތަފާތަކުން ޕީޕީއެމްގެ ކެނޑިޑޭޓު ކުރި ހޯދާފައި ވެއެވެ. އޭގެ ތެރޭގައި ގުރައިދޫގައި ބެހެއްޓުނު ވޯޓު ފޮށި ހިމެނެއެވެ.
މި އިންތިހާބުގައި ކ. ގުރައިދޫގައި ދެ ވޯޓު ފޮއްޓެއް ބަހައްޓާފައިވެއެވެ. މިގޮތުން ގުރައިދޫގެ 1 ނަންބަރު ވޯޓު ފޮށީގެ ނަތީޖާ ދައްކާ ގޮތުގައި ކެންޑިޑޭޓު ނަންބަރު 1، ޕީޕީއެމްގެ ކެންޑިޑޭޓު ހުސައިން ރިޒާ އަށް ލިބިފައި ވަނީ 219 ވޯޓެވެ. ކެންޑިޑޭޓު ނަންބަރު 2، އެމްޑީޕީގެ ކެންޑިޑޭޓު އިބްރާހީމް ޝާޒަށް ލިބިފައި ވަނީ 179 ވޯޓެވެ. ކެންޑިޑޭޓު ނަންބަރު 3، އެމްއެންޕީގެ ކެންޑިޑޭޓު އަލީ އަރީފަށް ލިބުނީ 29 ވޯޓެވެ. އެއް ނަންބަރު ވޯޓު ފޮށިން 40 ވޯޓުގެ ތަފާތާއެކު ކުރީގައި އުޅުނީ ޕީޕީއެމްގެ ކެންޑިޑޭޓު ހުސައިން ރިޒާއެވެ.
ގުރައިދޫގައި ބަހައްޓާފައިވާ 2 ނަންބަރު ވޯޓު ފޮށީގެ ނަތީޖާ ދައްކާ ގޮތުގައި ކެންޑިޑޭޓު ނަންބަރު އެކެއް، ޕީޕީއެމްގެ ކެންޑިޑޭޓު ހުސައިން ރިޒާ އަށް ލިބިފައި ވަނީ 210 ވޯޓެވެ. ކެންޑިޑޭޓު ނަންބަރު ދޭއް، އެމްޑީޕީގެ ކެންޑިޑޭޓު އިބްރާހީމް ޝާޒަށް ލިބިފައި ވަނީ 240 ވޯޓެވެ. ކެންޑިޑޭޓު ނަންބަރު ތިނެއް، އެމްއެންޕީގެ ކެންޑިޑޭޓު އަލީ އަރީފަށް ލިބުނީ 20 ވޯޓެވެ. އެއް ނަންބަރު ވޯޓު ފޮށިން 30 ވޯޓުގެ ތަފާތާއެކު ކުރީގައި އުޅުނީ އެމްޑީޕީގެ ކެންޑިޑޭޓު އިބްރާހީމް ޝާޒެވެ.
ކ. މާފުށީގައި ބަހައްޓާފައިވާ ދެ ނަންބަރު ވޯޓު ފޮށީގެ ނަތީޖާ ދައްކާ ގޮތުގައި ކެންޑިޑޭޓު ނަންބަރު 1، ޕީޕީއެމްގެ ކެންޑިޑޭޓު ހުސައިން ރިޒާ އަށް ލިބިފައި ވަނީ 179 ވޯޓެވެ. ކެންޑިޑޭޓު ނަންބަރު 2، އެމްޑީޕީގެ ކެންޑިޑޭޓު އިބްރާހީމް ޝާޒަށް ލިބިފައި ވަނީ 196 ވޯޓެވެ. ކެންޑިޑޭޓު ނަންބަރު ތިނެއް، އެމްއެންޕީގެ ކެންޑިޑޭޓު އަލީ އަރީފަށް ލިބުނީ 24 ވޯޓެވެ. އެއް ނަންބަރު ވޯޓު ފޮށިން 17 ވޯޓުގެ ތަފާތާއެކު ކުރީގައި އުޅުނީ އެމްޑީޕީގެ ކެންޑިޑޭޓު އިބްރާހީމް ޝާޒެވެ.
މިއިންތިޚާބު ބޭއްވިފައިވަނީ މިއަހަރު ފެބްރުއަރީމަހު ކެންސަރުގެ އާލާސްކަން ފުޅެއްގައި ރިޒާ އަވަހާރަވުމާއި ގުޅިގެންނެވެ. އެމްީޑޕީން މި މިގޮޑި ކާމިޔާބު ކޮށްފައިމިވަނީ ކުރިއަށް ރިޔާސީ އިންތިޚާބަށް މަދު ދުވަސްކޮޅަކަށްވެފައި ވަނިކޮށެވެ. މިއީ އެމްޑީޕީއަށް ރިޔާސީ އިންތިޚާބުގެ ކުރިން ލިބުނު ބޮޑު ކާމިޔާބީއެއްކަމަށް އެޕާޓީން ދެކެއެވެ.
އިންތިޚާބު އެމްޑީޕީން ކާމިޔާބު ކުރުމާއި ގުޅިގެން އިންތިޚާބު ކާމިޔާބުކުރި ޝާޒް އަށާއި، އެމްޑީޕީއަށް، އެޕާޓީއަށް ތާއީދުކުރާ މީހުންދަނީ މަރުހަބާ ދަންނަވަމުންނެވެ.
އެމްޑީޕީގެ ޓިކެޓު ޝާޒަށް ލިބިވަޑައިގެންނެވީ އެ ޕާޓީން ބޭއްވި ޕްރައިމަރީ ކާމިޔާބު ކުރައްވައިގެންނެވެ. އެ ޕްރައިމަރީގައި ޝާޒަށް އެކަނި ވެސް 311 ވޯޓު ލިބިވަޑައިގެންނެވި އިރު، އޭނާއާ ތިން މީހަކު ވާދަކުރިއެވެ. އެމްޑީޕީގެ ޕްރައިމަރީގައި އެކަނި ވެސް އެމްޑީޕީގެ 582 މެމްބަރުން ވަނީ ވޯޓު ދެއްވައިފައެވެ.
ޝާޒް ވިދާޅުވި ގޮތުގައި އޭނާ މަޖިލިސް ގޮނޑިއަށް ކުރިމަތިލެއްވީ ދާއިރާގެ ރައްޔިތުންނާ އެކު ވީހާވެސް ގާތުން ހިދުމަތް ކުރައްވާށެވެ. ފަތުރުވެރިކަމުގެ އެންމެ ބޮޑު ނަފާއެއް މި ދާއިރާ އަށް ހޯދައި ދެވޭނީ އޭނާ އަށް ކަމަށާއި ޒުވާނުން އެ ދެކޭ ހުވަފެންތަކުގައި ކުލަ ޖައްސައި ދެވޭނެ ހަމައެކަނި ޕާޓީއަކީ ވެސް އެމްޑީޕީ ކަމަށް އޭނާ ވިދާޅުވިއެވެ.
މިއަދު ބޭއްވި އިންތިހާބުގައި 3423 މީހުންނަށް ވޯޓުލުމުގެ ހައްގު ލިބުނެވެ. އެއީ ގުރައިދޫއިން 1394 މީހުންނާއި މާފުށިން 1366 މީހުންނާއި ގުޅިން 663 މީހުންނެވެ.
ކޮމެންޓު ފޮނުވާ