ގުރައިދޫ ދާއިރާގެ ކެނޑިޑޭޓުންގެ ނަންބަރު ތަރުތީބުކޮށްފި

ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާގެ އިންތިޚާބުގައި ވާދަކުރާ ކެނޑިޑޭޓުންގެ ނަންބަރު ތަރުތީބުކޮށްފިއެވެ.

އަންނަ މަހުގެ މަހުގެ 15 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނަށް ކުރިމަތިލާފައިވާ ކެންޑިޑޭޓުންގެ ނަން ތަރުތީބު ކުރުން އޮތީ މިއަދު އިލެކްޝަންސް ކޮމިޝަންގައެވެ.

އިންތިޚާބުގައި ވާދަކުރުމުގެ ފުރުޞަތު ހަމަވިއިރު، ކުރިމަތިލާފައިވަނީ ތިން ކެނޑިޑޭޓެކެވެ. ގުރައިދޫ ދާއިރާއަށް ކުރިމަތިލާފައިވަނީ އިދިކޮޅު ޕީޕީއެމްއާއި، ވެރިކަންކުރާ މައި ޕާޓީ އެމްޑީޕީގެ އިތުރުން އެމްއެންޕީންނެވެ. މިއިންތިޚާބުގައި ޕީޕީއެމްގެ ޓިކެޓްގައި ވާދަކުރައްވަނީ އެދާއިރާގެ ކުރީގެ މެމްބަރު އިބްރާހީމް ރިޒާގެ ކޮއްކޮ، ޙުސައިން ރިޒާއެވެ. އެމްޑީޕީން ވާދަކުރަނީ އެޕާޓީން ބޭއްވި ޕްރައިމަރީ ކާމިޔާބު ކުރި އިބްރާހީމް ޝާޒްއެވެ. އެމްއެންޕީން ވާދަކުރަނީ އަލީ އާރިފްއެވެ.

ކެނޑިޑޭޓުންގެ ނަންބަރު ތަރުތީބު ވެފައިވާ ގޮތް:

ކެނޑިޑޭޓް ނަންބަރު 1 – ޙުސައިން ރިޒާ، ޕީޕީއެމް
ކެނޑިޑޭޓް ނަންބަރު 2 – އިބްރާހީމް ޝާޒް، އެމްޑީޕީ
ކެނޑިޑޭޓް ނަންބަރު 3 – އަލީ އާރިފް، އެމްއެންޕީ

ގުރައިދޫ ދާއިރާގެ ގޮނޑި ހުސްވީ، އެދާއިރާގެ މެންބަރުކަމުގައި ހުންނެވި އިބްރާހީމް ރިޒާ އަވަހާރަވުމުންނެވެ. ގުރައިދޫ ދާއިރާގެ މެންބަރުކަމުގައި 3 ދައުރުގައި ހުންނެވި އިބްރާހީމް ރިޒާ އަވަހާރަވީ ކެންސަރުގެ އާލާސްކަންފުޅެއްގައި މިދިޔަ މަހުގެ 23 ވަނަ ދުވަހުއެވެ. ރިޒާ އަވަހާރަވުމާއި ގުޅިގެން ގުރައިދޫ ދާއިރާގެ ބައި-އިލެކްޝަން އަންނަ އޭޕްރީލް މަހުގެ 15ގައި ބާއްވަން އިލެކްޝަންސް ކޮމިޝަނުން ވަނީ ނިންމާފައެވެ.