ރާއްޖޭގެ ލޯކަލް ކައުންސިލްތައް ކުރިއަރާއި ތަރައްޤީވެގެންދާނީ ކައުންސިލްތަކުގެ މަސައްކަތްތަކުގައި މުޖުތަމަޢުގެ ބައިވެރުވުން އިތުރުކޮށްގެންކަމަށް ލޯކަލް ގަވަރމަންޓް އޮތޯރިޓީ (އެލް.ޖީ.އޭ)ގެ ސީ.އީ.އޯ އަފްޝަން ލަތީފް ވިދާޅުވެއްޖެއެވެ.
ބ.އޭދަފުށީގައި ކުރިއަށްދާ، ވިލުންވެރިކުރުމުގެ މަހާސިންތާގެ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން އަފްޝަން ވިދާޅުވީ ރަށްރަށުގެ ކައުންސިލްތަކަކީ އެތަށްރަށުގެ ޢާންމު މުޖުތަމަޢަށް ހެޔޮ ބަދަލެއް ގެނައުމަށް މަސައްކަތްކުރަންޖެހޭ ބަޔަކަށްވާއިރު، މުޖުތަމަޢުގެ އެކި ފަންތީގެ މީހުންގެ ޚިޔާލާއި މަޝްވަރާއާއި ބައިވެރިވުން މުހިންމުކަމަށެވެ. ކައުންސިލްތައް ހިންގުމުގައި މުޖުތަމައުގެ ބައިވެރިވުން ބޮޑުވި ވަރަކަށް އެކަމުގެ ހެޔޮ ފައިދާ ފެންނާނެކަން އަފްޝަން ފާހަގަކުރެއްވިއެވެ.
ތަރައްޤީއަކީ ހަމައެކަނި ޢުމްރާނީގޮތުން ރަށަށް އަންނަ ބަދަލުތަކެއް ނޫންކަމަށާ، އެއީ އެކަހިރިވެފައި ތިބި ޒުވާނުން ކަންކަމުގައި ބައިވެރި ކުރުވުމާއި އުމުރުން ދުވަސްވީ މީހުންނަށް ލޯބިދީ އެމީހުންގެ ބައިވެރިވުން އިތުރުކުރުންކަމަށް އަފްޝަން ވިދާޅުވިއެވެ.
