އެމްޑީޕީ ޕާލަމެންޓްރީ ގުރޫޕުގެ ނަޝީދު ފެކްޝަނުން ޔޫރަޕްގެ އިއްތިހާދުގެ ބައެއް ސަފީރުންނާއި ބައްދަލު ކުރައްވައިފިއެވެ. ރައްޔިތުންގެ މަޖިލިހުގައި މިއަދު އޮތް މި ބައްދަލުވުމުގައި ބައިވެރިވެޑައިގަތީ، ނަޝީދުގެ އިތުރުން، އެ ފެކްޝަނަށް ނިސްބަތްވާ، މަޖިލީހުގެ ނައިބު ރައީސް އީވާ އަބްދުﷲއާއި، އަލީ އާޒިމްއާއި، އިމްތިޔާޒް ފަހްމީއާއި، ހަސަން ލަތީފް އަދި އިލްޔާސް ލަބީބު އެވެ.
ނަޝީދުގެ ފެކްޝަނުން ބައްދަލުކުރި ޔޫރަޕިއަން ޔޫނިއަންގެ ވަފުދުގެ އިސް ބޭފުޅެއްގެ ގޮތުގައި ހުންނެވީ ޔޫރަޕިއަން ޔޫނިއަނުން ރާއްޖެއަށް ކަނޑައަޅުއްވާފައި ހުންނަވާ ސަފީރު, ހިޒް އެކްސެލެންސީ ދެނިސް ޗައިބީއެވެ. މިބައްދަލުވުމުގައި މަޝްވަރާ ކުރެވުމުން ކަންކަމުގެ ތަފްސީލެއް މަޖިލިސް އިދާރާއިންވެސް އަދި ނަޝީދު ފެކްޝަންއިންވެސް ހާމަ ކޮށްފައެއް ނުވެއެވެ.
ޔޫރަޕިއަން ޔޫނިއަނުން ރާއްޖެއަށް ކަނޑައަޅުއްވާފައި ހުންނަވާ ސަފީރު, ހިޒް އެކްސެލެންސީ ދެނިސް ޗައިބީ އާއި ޔޫރަޕިއަން ޔޫނިއަންގެ ސަފީރުންގެ ވަފުދެއް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އަރިހަށް އިޙްތިރާމުގެ ޒިޔާރަތެއް ކުރައްވައިފި pic.twitter.com/Qq5GWgd94E
— People's Majlis (@mvpeoplesmajlis) March 8, 2023
ނަޝީދު ފެކްޝަންއާއި ޔޫރަޕިއަން އިއްތިހާދުން ބައްދަލު ކޮށްފައިވާއިރު، ނަޝީދު ގެންދަވަނީ ރައީސް ސާލިހަށް ވަރަށް ބޮޑަށް ފާޑު ވިދާޅުވެ، ކުރިޔަށް އޮތް ރިޔާސީ އިންތިޚާބުގައި ރައީސް ސާލިހަށް ކާމިޔާބު ނުހޯއްދެވޭނެ ފޯމިއުލާއަކަށް މަސައްކަތް ކުރައްވަމުންނެވެ.
މި ވަފުދުގެ ބޭފުޅުން އެމްޑީޕީގެ ރައީސް ސާލިހު ފެކްޝަނާއި ބައްދަލުކުރި ކަމުގެ މައުލޫމާތު އަދި ލިބިފައެއް ނުވެއެވެ.
