ޖެނުއަރީމަހު ކުރިއަށްދިޔަ އެމްޑީޕީގެ ރިޔާސީ ޕްރައިމަރީއާ ޖެނުއަރީ މަހު އާސަންދައިން ކޮށްފައިވާ ޚަރަދާއި އެއްވެސް ގުޅުމެއް ނޯންނާނެކަމަށް ރައީސުލްޖުމްހޫރިއްޔާގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.
މި މަހުގެ 7 ވަނަ ދުވަހު ރައްޔިތުންގެ މަޖިލީހުގައި ދެއްކެވި ވާހަކަފުޅުގައި މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ މިދިޔަ އަހަރުގެ ޖަނަވަރީގައި 67.9 މިލިއަން ރުފިޔާ އާސަންދައިން ޚަރަދުކުރިއިރު މި އަހަރުގެ އެ މުއްދަތުގައި 283.4 މިލިއަން ރުފިޔާ އާސަންދައަށް ޚަރަދުކުރެވިއްޖެ ކަމަށެވެ. އަދި އެއީ އެތެރޭގެ އިންތިޚާބަކާ ގުޅިގެން އައި ބަދަލެއްތޯ ނޫނީ ޙަޤީޤަތުގައި ވެސް ބަލި މީހުން ހަތަރު ގުނަ އިތުރުވީތޯ ސުވާލުކުރަންޖެހޭ ކަމަށްވެސް އެމަނިކުފާނު ސުވާލު އުފައްދަވާފައިވެއެވެ.
އެ ވާހަކަތަކާ ގުޅިގެން ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވީ ޖެނުއަރީ މަހުގައި އާސަންދައަށް ކުރި ޚަރަދު ވަކި ބޮޑެއް ނުވާނެ ކަމަށެވެ. އަދި ފެންނަން ހުރި ނަންބަރުތަކަށް ބަލާއިރު ވެސް އާސަންދައިން އެކި މަސްމަހުގައި ޚަރަދުކޮށްފައި ހުންނާނީ އެކިވަރަށް ކަމަށާއި، އެތެރޭގެ އިންތިޚާބާއި އާސަންދައިގެ ޚަރަދާ ގުޅުވަންވީ ކީއްވެ ކަމެއް ނުވިސްނޭ ކަމަށެވެ.
”އިންތިޚާބުތަކާ ދިމާކޮށް މީހުން ޑޮކްޓަރަށް ދެއްކުން އިތުރުވެގެންދާކަމެއް އަޅުގަނޑުމެންނަށް އެނގިފައެއް ނެތް.“ މިއުވާން ވިދާޅުވިއެވެ.
މިއުވާން ވިދާޅުވީ އާސަންދައިން އެ މަހަކު ޚަރަދުކުރަނީ ހަމަ އެ މަހުގަ ޑޮކްޓަރަށް ދެއްކި މީހުންގެ ބިލުތަކަކަށް ނޫން ކަމަށެވެ. އަދި އޭގެ ކުރީ މަސްމަހުގައި އެކިއެކި ހޮސްޕިޓަލުތަކާ ކްލިނިކްތަކުން ފޮނުވާފަ ހުންނަ ބިލުތަކަށް ފައިސާ ދައްކާ ކަމަށް އޭނާ ވިދާޅުވިއެވެ.
