އިދިކޮޅު ޕީޕީއެމްގެ ފަރާތުން ރިޔާސީ އިންތިޚާބުގައި ވާދަކުރާނެ ކެނޑިޑޭޓަކީ ރައީސް ޔާމީންކަމަށް ޕޕީޕީއެމް/ޕީއެންސީ ކޯލިޝަންގެ އެޑްވައިޒަރު އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ.ޝަހީމް މިހެން ވިދާޅުވީ ޕީޕީއެމްގެ ޓިކެޓްގައި ކުރިއަށް އޮތް ރިޔާސީ އިންތިޚާބުގައި ވާދަކުރާނެ ކެނޑިޑޭޓަކާއި ގުޅޭގޮތުން ދީނީ އިލްމުވެރިޔާ ޝައިޚު އަލީ ޒައިދު އުފެއްދި ސުވާލަށް ދެއްވި ޖަވާބުގައެވެ. ޝައިޚު ޒައިދު ޓެގް ކުރައްވައި ޑރ.ޝަހީމް ވިދާޅުވީ ޕީޕީއެމްގެ ރިޔާސީ ކެނޑިޑޭޓަކީ ރައީސް ޔާމީންކަމަށެވެ.
ޝަހީމް މިހެން ވިދާޅުވުމާއި ގުޅިގެން އަލީ ޒައިދު ވިދާޅުވީ އެގޮތަށް ވިދާޅުވީ ރައީސް ޔާމީނަށް ވާދަ ނުކުރެވޭ ހާލަތެއްގައި ޕީޕީއެމްއިން ނެރޭނީ ކޮން ކެނޑިޑޭޓެއްތޯ ސާފުކޮށްލުމަށްކަމަށެވެ.
PPM ge riyaasee candidate aki raees yaamin @prz_ymn. saafu vejje tho @alizaid1000. https://t.co/ggFFle8bMC
— Mohamed Shaheem Ali Saeed (@Mohamedshaheem1) February 5, 2023
އިދިކޮޅު ކޯލިޝަނުން ރޭ ބޭއްވި ޖަލްސާގައި ވާހަކަދައްކަވަމުން އިދިކޮޅު ކޯލިޝަންގެ ލީޑަރުގެ މަގާމުގައި މިވަގުތު ހުންނެވި އަބްދުއްރަހީމް ވިދާޅުވީ ރިޔާސީ އިންތިހާބުގެ ވޯޓު ކަރުދާހުގައި ރައީސް ޔާމީނުގެ ނަންފުޅު އޮންނާނެއެވެ. ހެޔޮ ވެރިކަމުގެ ނިޒާމެއް މިޤައުމުގައި ޤާއިމުކުރި ރައީސަކީ ރައީސް ޔާމީނު ކަމަށް އޭނާ ވިދާޅުވިއެވެ.
އަދުރޭ ވިދާޅުވި ގޮތުގައި ހޯޕް ކޮންފަރެންސް އިދިކޮޅު އެމްޑީޕީއަށް ހަޖަމެއް ނުކުރެވުނެވެ. ބަޔަކަށް ހަޖަމުނުކުރެވުނަސް އެކަން ހުއްޓާލާނީ ރައީސް ޔާމީން ވެރިކަމަށް އައުމުން ކަމަށް އަދުރޭ ވަނީ ވިދާޅުވެފައެވެ. އަބްދުއްރަހީމް ވިދާޅުވި ގޮތުގައި ޕީޕީއެމް/ޕީއެންސީގެ ކޯލިޝަންގެ އަސްލު މަންޒަރު ފެންނަން ފެށުމުން މިހާރު ސަރުކާރުގައި ތިއްބެވި ބޭފުޅުން މާލޭގައި ފައި ހަރެއް ނުލާނެއެވެ.
މިދިޔަ މަހުގެ 28 ގައި ބޭއްވި އެމްޑީޕީގެ ރިޔާސީ ޕްރައިމަރީ އަށް ފާޑުވިދާޅުވެ އަބްދުއްރަހީމް ވިދާޅުވީ، އިންސާފުވެރި އިންތިހާބެއް ކާމިޔާބުކުރުމުގެ ފޯމިއުލާ އޮތީ ވެސް ޕީޕީއެމް ކޯލިޝަންގައި ކަމަށެވެ. މި އަހަރުގެ ސެޕްޓެމްބަރު 9 ގައި ބާއްވާ ރިޔާސީ އިންތިހާބު ކާމިޔާކުރާނީ ޔާމީން ކަމަށް ވިދާޅުވާ ވިދާޅުވުން އަބްދުއްރަހީމް ރޭ ވެސް ތަކުރާރު ކުރެއްވިއެވެ.
