މިއަދު ބޭއްވުނު އެމްޑީޕީގެ ރިޔާސީ ޕްރައިމަރީގެ އިންތިޚާބުގައި، ކުރިން ހީކުރެވުނު ގޮތާއި ޚިލާފަށް ރައީސް ސާލިހު މާލޭގެ ގިނަ ދާއިރާތައްވެސް ކާމިޔާބު ކުރައްވައިފިއެވެ.
މިގޮތުން އެމްޑީޕީން މިހާތަނަށް އާންމު ކޮށްފައިވާ ވަގުތީ ނަތީޖާއަށް ބަލާއިއިރު ރައީސް ސާލިހުވަނީ، ރާއްޖޭގެ އެންމެ ބޮޑު އާބާދީއެއް އޮންނަ މާލެއިން %51 ވޯޓު ހޯއްދަވާފައެވެ.
އެމްޑީޕީގެ ދަފްތަރުގެ މާލޭ ރަޖިސްޓްރީގައި 6،727 މެމްބަރުން ތިބޭއިރު މި އިންތިޚާބުގައި ވޯޓު ލާފައިވަނީ 4،321 މެމްބަރުންނެވެ. އަދި ވޯޓު ލީ މީހުންގެ ތެރެއިން ރައީސް ސާލިހަށް 2،208 ވޯޓު ލިބިފައި ވާއިރު، ނަޝީދަށް ހޯއްދެވިފައިވަނީ 2،113 ވޯޓެވެ.
މާލެއަކީ ނަޝީދަށް އެންމެ ބޮޑު ތާއީދެއް އަބަދުވެސް އޮންނަމުންދާ ދާއިރާއެކެވެ. އަދި ނިމިދިޔަ ކެމްޕޭނުގައިވެސް ނަޝީދުވަނީ މާލޭގައި ބޮޑެތި އެއްވުންތައް ބާއްވާ، ވަރުގަދަ ކެމްޕޭނެއް މާލޭގައި ކުރައްވާފައެވެ.
މިއަދު ބޭއްވިގެންދިޔައި އިންތިޚާބުގައި މިހާތަނަށް 23،856 ވޯޓް ގުނާ ނަތީޖާ އިއުލާން ކޮށްފައިވާއިރު، 15،267 ވޯޓު ރައީސް ސާލިހުވަނީ ކާމިޔާބު ކުރައްވާފައެވެ. މިއީ މިހާތަނަށް ގުނާ ނިމިފައިވާ ވޯޓުގެ %64 އެވެ. ނަޝީދަށް ކާމިޔާބު ކުރެވިފައިވަނީ 8،482 ވޯޓެވެ. މި ނަތީޖާއަށް ބަލާއިރު، ނުގުނާ މިހާރު ބާކީ ވޯޓުތަކުން ދެން ނަޝީދަށް ރައީސް ސާލިހުގެ މައްޗަށް ކުރި ހޯއްދެވޭނެކަމަށް ނުބެލެވެއެވެ. އެމްޑީޕީގެ އިންތިހާބާ ބެހޭ ކޮމިޓީން ބުނެފައިވަނީ 132 ވޯޓު ފޮށި ގުނައި ނިމި މިހާތަަނަށް ނަތީޖާ އިއުލާންކޮށްފައިވާ ކަމަށެވެ.
މިއަދު ވޯޓުލީ ހުރިހާ ދައިރާއެއްގެ ވަގުތީ ނަތީޖާ އަދިވެސް އިއުލާންކޮށް ނިމިފައި ނުވިނަމަވެސް، އިންތިޚާބު ރައިސް ސާލިހަށް ކާމިޔާބު ކުރެވޭކަން ޔަގީން ކުރެވި، އެމްޑީޕީގެ 2023ގެ ރިޔާސީ ޓިކެޓް ރައީސް ސާލިހު މިހާރުވަނީ ކަށަވަރު ކުރައްވާފައެވެ.
