ސްރީލަންކާގެ ޗީފް އޮފް ޑިފެންސް ސްޓާފް، ޖެނެރަލް ޝަވެންދަރު ސިލްވާ، ރާއްޖެއަށް ކުރައްވަމުންގެންދަވާ 4 ދުވަހުގެ ރަސްމީ ދަތުރުފުޅުގައި، އިއްޔެ އެމްއެންޑީއެފްގެ ހެޑްކޯޓާރޒްއަށް ވަޑައިގެން، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީ އާއި އަދި ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް އާއި ބައްދަލު ކުރައްވައިފިއެވެ.
ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ އާއި އެކު ބޭއްވެވި ބައްދަލު ކުރެއްވުމުގައި ސްރީލަންކާ އާއި ދިވެހިރާއްޖެއާއި ދެމެދު ޒަމާނުއްސުރެ އޮންނަ ގާތް ގުޅުން ފާހަގަ ކުރެއްވިއެވެ. އަދި މިގުޅުމުގެ ތެރެއިން ދިވެހި އަސްކަރިއްޔާ ތަރައްޤީ ކުރުމަށްޓަކައި ވެދެއްވަމުން ގެންދަވާ ގިނަގުނަ އެހީތެރިކަން ފާހަގަކުރައްވައި ސްރީލަންކާ ސަރުކާރަށާއި، އަސްކަރިއްޔާއަށް ޝުކުރު އަދާކުރެއްވިއެވެ.
ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް އާއި އެކު ބޭއްވެވި ބައްދަލު ކުރެއްވުމުގައި ދެޤައުމު ދޭތެރޭ ދިފާޢީ އަދި އަސްކަރީ ދާއިރާއިން ގުޅުންތައް އިތުރަށް ފުޅާކޮށް، ހަރުދަނާކުރުމާއި ގުޅޭގޮތުން މަޝްވަރާ ކުރެއްވިއެވެ. އަދި ސްރީލަންކާގެ އަސްކަރިއްޔާއާ ވަރަށް ގާތްގުޅުމެއް އަބަދުވެސް އޮންނަކަން ފާހަގަކުރައްވާ، މިގުޅުމުގެ ތެރެއިން އެމްއެންޑީއެފްގެ އިންސާނީ ވަޞީލަތް ތަރަށްޤީ ކުރުމަށް ބޭނުންވާ ގިނަ ކޯސްތަކަކާއި ތަމްރީނުތަކެއް ސްރީލަންކާގެ އަސްކަރިއްޔާގެ އެހީތެރިކަމާއިއެކު މިހާރު ވެސް ލިބެމުންދާކަން ފާހަގަކުރައްވާ، ޝުކުރު އަދާކުރެއްވިއެވެ. ވަކިން ޚާއްޞަކޮށް، އެމްއެންޑީއެފް ސްޕެޝަލް ފޯސަސްގެ ސިފައިން ތަމްރީނުކުރުމަށް ސްރީލަންކާގެ އަސްކަރިއްޔާއިން ވެދެއްވަމުން ގެންދަވާ އެހީތެރިކަން ފާހަގަކުރެއްވިއެވެ. އަދި މީގެއިތުރުން އެމްއެންޑީއެފް އަށް ބޭނުންވާ އިތުރު ތަމްރީނުތައް ހޯދުމަށް ވެސް ވާހަކަ ދެކެވި މަޝްވަރާ ކުރެއްވިއެވެ.
