އައު އަހަރާއި ދިމާކޮށް ރިލީޒް ކުރާ ޝާހުރުކް ހާން އާއި ދީޕިކާ ޕަދުކޯންގެ ފިލްްމް "ޕަޓާން" ގެ ދެވަނަ ލަވައެއް ބެލުންތެރިންނަށް ދޫކޮށްލައިފިއެވެ.
"ޕަޓާން" އިން ނެރުނު ފުރަތަމަ ލަވަ އަކީ ބޮޑު މައްސަލައަކަށްވި ލަވަ "ބޭޝަރަމް ރަންގް"އެވެ. ލަވައިގެ ހޫނު ގަނޑުގެ ތެރެއިން ފިލްމްގެ ދެވަނަ ލަވައެއް ދޫކޮށްލި އިރުގައި ލަވައަށް ބެލުންތެރިން ގެ ފަރާތުން އަންނަނީ ތަރުހީބު ލިބެމުންނެވެ.
މި ފަހަރުގެ ލަވަ އަކީ "ޖޫމޭ ޖޯ ޕަތާން" އެވެ. "ބޭޝަރަމް ރަންގް" ގެ ވެސް މިއުޒިކް ހެދި ވިޝާލް-ޝޭކަރްގެ މިއުޒިކަށް ގެނެސްދިން ދެވަނަ ލަވައިގެ އަޑުގެ ވެރިންނަކީ އަރިޖިތު ސިންގް އާއި ސުކްރުތީ ކައްކަރުގެ އިތުރުން ލަވައިގެ ދެ މިއުޒިކް ޑައިރެކްޓަރުންނެވެ.
"ބޭޝަރަމް ރަންގް" އަކޭ އެއްފަދައިން ވަރުގަދަ ނެށުނަތަކެއް ފެނިގެންދާ މި ލަވައިގައި ފެނިގެންދަނީ ވަރަށް ހިތްގައިމު ލޮކޭޝަން ތަކެކެވެ. ފުރަތަމަ ލަވައާއި އަޅާކިޔާއިރުގައި މި ލަވައިގައިވެސް ދީޕިކާ ފެނިގެންދަނީ ނިވާކަން ކުޑަ ހެދުން ތަކަކާއި އެކުގައިއެވެ.
ޝާހްރުކް އެނބުރި އައުން ފާހަގަ ކުރާ ފިލްްމު "ޕަތާން" އަކީ ބޮޑު ކާސްޓެއް ހިމެނޭ ފިލްމެކެވެ. މިހާރުވެސް އަހަރެއްހާ ދުވަސް ޝޫޓިންގައި ހޭދަކޮށްފައިވާ މި ފިލްމު ރިލީޒް ކުރުމަށް ތާވަލު ކޮށްފައިވަނީ 25 ޖަނަވަރީ 2023 އަށެވެ.
އަދިތިޔާ ޗޯޕްޅާގެ ޔާޝްރާޖް ފިލްމްސް (ވައިއާރްއެފް) އިން ޕްރޮޑިއުސްކޮށްފައިވާ މި އެކްޝަން ތުރިލާ އަކީ އެ ސްޓޫޑިއޯގެ 2019 ގެ "ވޯ" ގެ ޑައިރެކްޓަރު ސިދާތު އާނަންދު ހަދާފައިވާ ފިލްމެކެވެ.
ޔަޝް ރާޖް ފިލްމްސް އިން ގެނެސްދޭ މި ފިލްމު 3 ބަހަކުން ނެރުމަށް ވަނީ ހަމަޖެހިފައެވެ. އެއީ ހިންދީ، ޓެލުގޫ އަދި ޓެމިލްއެވެ. މި ފިލްމުގައި ޝާހްގެ އިތުރުން ދީޕިކާ ޕަޑުކޯން، ޖޯން އަބްރަހަމް އަދި ޝާބާނާ އާޒްމީ ފަދަ މަޝްހޫރު ތަރިން ހިމެނެއެވެ.
