އަންނަ ޖެނުއަރީ 28 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީއަށް ކުރިމަތިލުމަށް ބޭނުންވާ ސޮއި ހޯދުމަށްޓަކާ ނަޝީދުގެ ތާއީދުގެ ތާއީދު ފޯމުގައި ސޮއިކުރުމަށް މިއަދު މާލެއާއި އަތޮޅުތެރޭގައި ފަށައިފިއެވެ.

މިގޮތުން އެމްޑިޕީގެ ބައެއް އެކްޓިވިސްޓުންވަނީ މި ހަރަކާތްތަކުގެ ފޮޓޯތައް ސޯޝަލް މީޑިއާގައި ހިއްސާ ކޮށްފައެވެ. އާންމުކޮށްފައިވާ ބައެއް ފޮޓޯތަކުން ފެންނަ ގޮތުގައި ނަޝީދުގެ ތާއީދު ފޯރމުގައި ސޮއިކުރުމުގެ މަސައްކަތުގައި މިއަދު މާލޭގައި، އެމްޑީޕިއަށް ނިސްބަތްވާ ބައެއް މަޖިލިސް މެމްބަރުންވަނީ ހަރަކާތްތެރި ވެފައެވެ. އެހެންނަމަވެސް މި ހަރަކާތްތަކުގެ ތެރެއިން ސަރުކާރުގެ އިސްމަގާމްތަކުގައި ތިއްބެވި އެމްޑީޕީގެ އިސްބޭފުޅުން ފެނިފައެއް ނުވެއެވެ.

ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނޭކަމަށް އެމްޑީޕީގެ އިސް ލީޑަރު، ރައީސް ސާލިހުވެސް ކުރިންވަނީ ވިދާޅުވެފައެއެވެ. އަދި މިގޮތުން ކެމްޕޭން ހަރަކާތްތައް ފެށުމުގެ ގޮތުން ރޭ ރައީސް ސާލިހުވަނީ އެޕާޓީގެ ގައުމީ މަޖިލިސްގެ 100 އަށްވުރެ ގިނަ މެމްބަރުންނާއި ބައްދަލު ކުރައްވާފައެވެ.

ތާއީދު ފޯމުގައި ސޮއި ހަމަ ކުރުމުގެ މަސައްކަތް މިއަދު ފައްޓަވާފައިވާއިރު، ނަޝީދު ވިދާޅުވެފައިވަނީ އެޕާޓީގެ ދަފްތަރުވަނީ ގަޑުބަޑު ކޮށްފައި ކަމަށާއި، ކުރިޔަށް އޮތް ޕްރައިމަރީއަކީ ސައްޙަ ޕްރައިމަރީއަކަށް ވެގެން ނުދާނެ ކަމުގައެވެ. އެހެންނަމަވެސް ނަޝީދު މިތުހުމަތުތަަކަށް ރައްދު ދެމުން އެމްޑީޕީން ބުނެފައިވަނީ، އެޕާޓީގެ ދަފްތަރު ގަޑުބަޑު ކޮށްފައިވަނީ ކުރިން ކަމަށާއި މިހާރު އޮތީ ސައްޙަ ދަފްތަރެއް ކަމުގައެވެ.

2023ވަނަ އަހަރުގެ ރިޔާސީ އިންތިޚާބުގައި ޕާޓީގެ ޓިކެޓްގައި ވާދަކުރާނެ ކެންޑިޑޭޓެއް ހޮވުމަށްބާއްވާ ޕްރައިމަރީ 28 ޖެނުއަރީ 2023 ވާ ހޮނިހިރު ދުވަހު ބޭއްވުމަށް އެމްޑީޕިން ވަނީ ނިންމާފައެވެ. އަދި މިޕްރައިމަރީގައި ވާދަކުރަން ބޭނުންފުޅުވާ އެޕާޓީގެ މެންބަރުން އެބޭފެޅުން ޕްރައިމަރީގައި ވާދަކުރުމަށް ތާއީދުކުރާ، ޕާޓީގެ 500 މެންބަރުންގެ ތާއީދާއިއެކު 24 ޑިސެމްބަރ 2022 ވާ ހޮނިހިރު ދުވަހުގެ ހަވީރު 4:00 ގެ ކުރިން ޕްރައިމަރީއަށް ކުރިމަތިލުމަށް އެދޭފޯމް ފުރިހަމަ ކުރުމަށްފަހު ހުށަހަޅަން ޖެހެއެވެ.

ޕްރައިމަރީގައި ވާދަކުރަން އޮންލައިން އެޕްލިކޭޝަން ފޯމުވެސް ހުށަހެޅޭނެއެވެ.

އެމްޑީޕީގެ ރިޔާސީ ޕްރައިމަރީ 2023 ޓައިމްލައިން

18 ޑިސެމްބަރ 2022– ރިޔާސީ ޕްރައިމަރީ އިއުލާން ކުރުން
18 ޑިސެމްބަރ 2022 – ރިޔާސީ ޕްރައިމަރީ ކުރިމަތިލުމަށް ފުރުޞަތު ހުޅުވާލުން
24 ޑިސެމްބަރ 2022– ކެންޑިޑޭޓުން ވާދަ ކުރުމުގެ ފޯރމް ބަލައިގަތުމުގެ މުއްދަތު ހަމަވުން (16:00 އަށް)
26 ޑިސެމްބަރ 2022 – ކެންޑިޑޭޓުންގެ ފައިނަލް ލިސްޓު، ކެންޑިޑޭޓް ނަންބަރާ އެކު އިއުލާން ކުރުން
28 ޑިސެމްބަރ 2022 – ރިޔާސީ ޕްރައިމަރީ ވޯޓަރޒް ލިސްޓް އާންމު ކުރުމާއި، ލިސްޓަށް ޝަކުވާ ހުށަހެޅުމަށް ހުޅުވާލުން
31 ޑިސެމްބަރ 2022 – ވޯޓަރޒް ލިސްޓަށް ހުށަހަޅާ ޝަކުވާ ބަލައިގަތުމުގެ މުއްދަތު ހަމަވުން (16:00 އަށް)
03 ޖެނުއަރީ 2023 – ރިޔާސީ ޕްރައިމަރީ ފައިނަލް ވޯޓަރޒް ލިސްޓް އާންމު ކުރުން
10 ޖެނުއަރީ 2023- ކެންޑިޑޭޓް މަންދޫބުންނަށް ފުރުޞަތު ހުޅުވާލުން
15 ޖެނުއަރީ 2023– ކެންޑިޑޭޓް މަންދޫބުންނަށް ފުރުޞަތު ބަންދުވުން
28 ޖެނުއަރީ 2023– ރިޔާސީ ޕްރައިމަރީ ވޯޓްލާ ދުވަސް