ސަރުކާރުގެ އިސް މަގާމުތަކެއް ފުރުއްވާފައިވާ ސިޔާސީ އިސް އެކްޓިވިސްޓެއް ކަމުގައިވާ، އައްބާސް އާދިލް ރިޒާ ނޫސްވެރިއަކާ ޒާތީގޮތުން ޖައްސާލައި ބޭ އަދަބީ ހަޑި ހުތުރު ބަސްތައް ބޭނުން ކުރުން، މޯލްޑިވްސް ޖާނަލިސްޓް އެސޯސިއޭޝަން (އެންޖޭއޭ)އިން ކުށްވެރި ކޮށްފިއެވެ.
އަދި އައްބާސް އާދިލް ރިޒާގެ މި އަމަލު އެމްޖޭއޭއިން ކުށްވެރިކުރުމުގެ އިތުރުން، މައާފަށް އެދުމަށްވެސް އެމްޖޭއޭއިން ވަނީ ގޮވާލާފައެވެ. މި އަމަލު ކުށްވެރިކޮށް އެމްޖޭއޭއިން ކުރި ޓުވީޓުތަކުގައި ބުނެފައިވަނީ މިއީ އަންހެން ނޫސްވެރިއަކަށް ފުރައްސާރަ ކުރުމުގެ އަމަލެއްގެ ގޮތުގައިވެސް އެ ޖަމްއިއްޔާއިން ދެކޭ ކަމަށާއި، މިފަދަ އަމަލުތަކަކީ އަންހެން ނޫސްވެރިން ނޫސްވެރިކަމުގެ ދާއިރާގައި ކުރިއަށް ދިޔުމަށް އެޅޭ ހުރަހެއްގެ ގޮތުގައި ވެސް އެ ޔޫނިއަންއިން ދެކޭ ކަމުގައެވެ.
އެމްޖޭއޭއިން ގޮވާލާފައިވަނީ ނޫސްވެރިންނަށް ބިރު ދައްކައި ފުރައްސާރަ ކުރުމަށް ހިންގޭ މިފަދަ އެންމެހާ އަމަލުތައް ހުއްޓާލައި، އުފެއްދުންތެރި ބިނާކުރަނިވި ގޮތުގައި ނޫސްވެރިންނަށް ފާޑުކިޔުމަށާއި، މިފަދަ ކަންކަން ދައުލަތުގެ އެންމެހާ އިދާރާތަކުން ސީރިއަސްކޮށް ނަގައި، ނޫސްވެރިންނަށް ރައްކާތެރި މާހައުލެއް ކަށަވަރުކޮށްދޭން އަޅަން ޖެހޭ އެކަށީގެންވާ ފިޔަވަޅުތައް އެޅުމަށެވެ.
🚨 ސަރުކާރުގެ އިސް މަގާމުތައް ފުރުއްވާފައިވާ ސިޔާސީ އިސް އެކްޓިވިސްޓް، އައްބާސް އާދިލް ރިޒާ ނޫސްވެރިއަކާ ޒާތީގޮތުން ޖައްސާލައި ބޭ އަދަބީ ހަޑި ހުތުރު ބަސްތައް ބޭނުން ކުރުމަކީ މި ޔޫނިއަންއިން ނިހާޔަތަށް ކަންބޮޑުވާ ކަމެއް…1/5 https://t.co/U8i9Rvlf2a
— Maldives Journalists Association (@mjamaldives) December 18, 2022
ގެއްލުވާލާފައިވާ ނޫސްވެރިޔާ ރިޟުވާންގެ މަރުގެ ހާދިސާ ތަހުގީގު ކުރުމަށްފަހު، ދާދިފަހުން މަރު ކޮމިޝަންއިން ނެރު ރިޕޯޓާއި ގުޅިގެން، މިހާރު ނޫހުގެ އަންހެން ނޫސްވެރިޔާ ފަޒީނާއަށް ނިސްބަތްކޮށް އައްބާސް އާދިލް ރިޒާވަނީ ހަޑި ހުތުރު ބަސްތަކުން ފާޑުކިޔާ ޓުވީޓު ކޮށްފައެވެ.
އަޅުގަނޑު މީގެ ކުރިން ހިއެއްނުކުރަން ފަޒީނާއަކީ ނޫސްވެރިކަން ރަންޑިކުރާ ހަށިވިއްކާ ކުއްޖެއްކަމަކަށް. އެކަމު މިހާރު ތިޔަ ކިޔާއެއްޗަކުން މި އިނގުނީ ތިވެސް ހަމަ ހުސް ހޮޅި ކަން. ސަރުކާރަކުން ހަމަ ބުނާ ކޮންމެ ސިޔާސީ ވާހަކައެއް އެއްވެސް ހެއްކެއް ނެތި ސުވާލު ކުރުމެއް ނެތި ތިޔަ ގޮވަނީ؟
— Abbas Adil Riza (@AbbasRiza) December 16, 2022
މި ޓުވީޓުގައި އައްބާސް އާދިލް ރިޒާ ވަނީ މިހާރު ނޫހުގެ ނޫސްވެރިޔާއަކީ ނޫސްވެރިކަން ރަންޑިކުރާ ހަށިވިއްކާ ކުއްޖެއްކަމަށް މޭރުންކޮށްފައެވެ. އޭނާ ތުހުމަތު ކޮށްފައިވަނީ މިހާރު ނޫހުގެ އާރޓިކަލްއަކީ ސަރުކާރުން އެދިގެން ސަރުކާރުން ބޭނުންވި ގޮތަށް ލިޔެފައިވާ އާރޓިކަލްއެއް ކަމުގައެވެ.
މީގެ ކުރިން ގިނަ ސިޔާސީ ޕާޓީތަކެއްގައިވެސް އުޅެފައިވާ، އައްބާސް އާދިލް ރިޒާވަނީ ރައީސް ވަހީދުގެ ވެރިކަމުގެ ސަރުކާރުގެ ތަރުޖަމާންގެ މަގާމްވެސް އަދާ ކޮށްފައެވެ. ރައީސް ޔާމިންގެ ވެރިކަމުގައި އޭނާ މަސައްކަތް ކޮށްފައިވަނީ މެލޭޝިއާގައި ހުންނަ ދިވެހި ހައިކޮމިޝަންގައެވެ. އޭނާ ފާހަގަ ކުރެވިފައިވަނީ، އުފެދޭ ސިޔާސީ ހިންހަމަނުޖެހުންތަކުގައި، ސޯޝަލް މީޑިއާގައި ހަޑި ހުތުރު ބަހުރުވައިން އާންމުކޮށް ވާހަކަ ދައްކާ އުޅޭ ފަރާތެއްގެ ގޮތުގައެވެ.
