އިންޑިއާސް ބެސްޓް ޑާންސަރ ޝޯގެ ޓްރޮފީ އަޖޭ ސިންގް ނުވަތަ މަޝްހޫރު ނަމުން ނަމަ ޓައިގާ ޕޮޕް އުފުލާ ލައިފިއެވެ.
ސޮނީ ޓީވީން މިއަހަރު ފެބްރުއަރީ މަހު ފެށި ޑާންސް ރިއަލިޓީ ޝޯވ، "އިންޑިއާސް ބެސްޓް ޑާންސަރ" ގެ ގްރޭންޑް ފިނާލޭ ބާއްވާފައި ވަނީ ރޭގައެވެ. ރޭގެ ޝޯވގައި ބެލުންތެރިންގެ އެންމެ ގިނަ ވޯޓުން، ޝޯވގެ ޓައިޓަލް ހޯދި ޓައިގާ ޕޮޕް އަށް ވަނީ ފުރަތަމަ ސީޒަންގެ ޓްރޮފީ އާއެކު 15 ލައްކަ އިންޑިއަން ރުޕީސް އާއި މަރޫޓީ ސުޒުކީގެ އަގުބޮޑު އެސްޔޫވީ ކާރެއް ލިބިފައެވެ. މީގެ އިތުރުން ޝޯވގައި ޓައިގާ ޕޮޕްގެ ކޮރެއޮގްރާފަރ ވާތިކާ އަށް ވެސް ވަނީ 5 ލައްކަ އިންޑިއާ ރުޕީސްގެ އިނާމެއް ލިބިފައެވެ.
ބެލުންތެރިންގެ ވޯޓުން އެއްވަނަ ހޮވާގޮތަށް ކުރިއަށްގެންދިޔަ މި ޝޯވގެ 5 ފައިނަލިސްޓުން ވެސް ވާދަކުރީ ވަރަށް ގާތްގާތުންނެވެ. އެގޮތުން ޓައިގާގެ އިތުރުން ޝޯވގެ ދެވަނަ ހޯދި މުކުލް ގެއިން، އާއި ތިންވަނަ އަށް ދިޔަ ޝްވެތާ ވާރިއާ އާއި އަނެއް ދެ ފައިނަލިސްޓުން ކަމަށްވާ، ޕަރަމްދީޕް ސިންގް އާއި ޝުބްރަނިލް ޕައުލް އަކީ ތަފާތު ސްޓައިލްތަކުގައި އެކި ފެންވަރުގައި މުޅި ޝޯވ ގައި އެ ބައިވެރިންގެ ހުށަހެޅުންތައް ހުށަހަޅައިދިން ބައިވެރިންނެވެ. މި ހުރިހާ ބައިވެރިންނަށް ޖުމްލަ 30 މިލިއަނަށްވުރެ ގިނަ ވޯޓު ވަނީ ސަޕޯޓަރުންގެ ފަރާތުން ލިބިފައެވެ.
މުބާރާތުގައި ވާދަކުރަން ފުރަތަމަ އައި ދުވަހުން ފެށިގެން ވެސް ޓައިގާ ބޭނުންވީ އޭނަގެ މަންމަ އަށް ޓަކައި ޝޯވގެ އެންމެ މޮޅު ބައިވެރިއާއަށް ވުމަށެވެ.
"އަހަރެން ބޭނުންވީ ޝޯވ އިން މޮޅުވެގެން މަންމަ އަށް މަންމަގެ ހައްގު ދިރިއުޅުން ހޯދަދޭން، މަންމަ މީގެ ކުރިން އަބަދުވެސް އުޅުނީ ގޭގޭގައި މަސައްކަތް ކޮށްދީގެން، ދެން މަންމަ އަކަށް އެހެން މަސައްކަތް ކުރާކަށް ނުޖެހޭނެ"
– ޝޯވގެ ކުރިން ނިކަމެތި ދިރިއުޅުމެއް އުޅުނު އަޖޭ ސިންގް ބުންނެވެ.
އަޖޭ ސިންގް ނުވަތަ ޓައިގާ ޕޮޕް މިހާރު އެންމެ ބޭނުންވަނީ ބޮލީޑްގެ މަޝްހޫރު 2 ޑާންސަރުން އަދި ކުޅަދާނަ އެކްޓަރުން ކަމަށްވާ ރިތިކް ރޯޝަނާއި ޓައިގާ ޝްރޮފްއަށް، ކޮރެއޮގްރާފް ކޮށްދޭށެވެ. އަދި ބައިނަލްއަޤްވާމީ ޕްލެޓް ފޯމެއްގައި އިންޑިއާ ތަމްސީލް ކޮށްދިނުމުގެ އުންމީދުގައި ހުރި ޓައިގާ ޕޮޕް ބޭނުންވަނީ، އޭނާ އިންޑިއާސް ބެސްޓް ޑާންސަރ ޝޯވގެ ޓައިޓަލް ހޯދި ކޮސްޓިއުމުގައި " ވޯލްޑް އޮފް ޑާންސް" ނޫނީ " އެމެރިކާސް ގޮޓް ޓެލެންޓް" ގައި ޑާންސް ހުށަހަޅައި ދިނުމަށް ކަމަށް އޭނާ ބުންޏެވެ.
ޑާންސް ގްރޫ ޓެރެންސް ލުއިސްއާއި ގީތާ ކަޕޫރު (ގީތާ މާ) ގެ އިތުރުން ބޮލީވުޑްގެ ބަތަލާ މަލައިކާ އަރޯރާ ޖަޖުންގެ ގޮތުގައި ފެނިގެންދިޔަ މި ޝޯވގެ މެދުތެރެއިން މަލައިކާ އަރޯރާ ކޯވިޑަށް ޕޮޒިޓިވް ވުމުން، ދުވަސްކޮޅެއް ވަންދެން ގެސްޓު ޖަޖެއްގެ ގޮތުގައި ކުޅަދާނަ ނެށުންތެރިޔާ ނޯރާ ފަތޭހީ ވަނީ ބައިވެރި ވެފައެވެ.
އިންޑިއާސް ބެސްޓް ޑާންސަރގެ ފުރަތަމަ ސީޒަން ނިމުމާއެކު ދެން ސޮނީ އިން މިހާރު ތައްޔާރުވެފައި އޮތީ އިންޑިއަން އައިޑަލްގެ 12 ވަނަ ސީޒަން ގެނެސްދިނުމަށެވެ.
