ސައުތު އޭޝިޔާގެ ބައެއް ގައުމުތަކަށް ބަލާއިރު، ސްރީ ލަންކާ އަދި މެލޭޝިޔާ ފަދަ ގައުމުތަކަކީ ކޯވިޑް19 ކޮންޓްރޯލް ކުރުމުގެ ނަމޫނާ ގައުމުތަކުގެ ގޮތުގައި ބައެއް ފަރާތްތަކުން ފާހަގަ ކުރަމުން އައި ގައުމުތަކެވެ.
އަދި މިބަލި ދުނިޔޭގެ ބައެއް ގައުމުތަކުގައި ފެތުރެމުން ދަނިކޮށް ސްރީ ލަންކާގައި ރިޔާސީ އިންތިޚާބުވެސް ބާއްވާފައިވަނީ ފުޅާދާއިރާއެއްގައި ކެމްޕޭންކޮށް އަދި، ވޯޓު ފޮށިތައް ދޮށަށް މީހުން އެއްވެ ވޯޓު ލައިގެންނެވެ. އަދި އެގައުމުގައި ކޯވިޑް ފެތުރެމުންދާ ނިސްބަތް އިންތިހާއަށް ދަށަށް ގޮސް، ސްކޫލް ތަކާއި ކޮލެޖް އަދި ޔުނިވަސީތަކުގެ ކިޔެވުންވެސް ފަށާ، ކުރިން ހިންގަމުން އައި ކާފިއުތައް އުވާލާ ކޮންމެވެސް ވަރަކަށް ބޯޑަރުވެސް ހުޅުވާފައި ވެއެވެ. އެހެންނަމަވެސް، ސްރީ ލަންކާގައި މި ބަލި ކޮންޓްރޯލް ކުރެވިފައި އޮތް އޮތުން މާގިނަ ދުވަހަކަށް ކޮންޓްރޯލެއް ނުކުރެވުނެވެ. ކޯވިޑްގެ ކްލަސްޓަރތައް ސްރީލަންކާގެ ބައެއް ހިސާބުތަކުން މިހާރު ވަނީ ފެންނަން ފަށާފައެވެ. މިއަދު އެކަނިވެސް، ސްރީލަންކާގެ ގަމްޕަހާ ޑިސްޓްރިކްޓްގެ ގާމެންޓް ފެކްޓަރީއެއްގެ 103 މުވައްޒިފަކު ވަނީ މިބައްޔަށް ޕޮޒިޓިވް ވެފައެވެ. ސްރީލަންކާގައި ކޮވިޑްޖެހިފައިވާ މީހުންގެ އަދަދު މިހާރު އުޅެނީ 3،259 ގައެވެ.
ސްރީލަންކާގެ އިތުރުން ސައުތު އޭޝިޔާގެ ގައުމުތަކުގެ ތެރެއިން ދެންމެ އެންމެބޮޑަށް ކާމިޔާބު ކަމާއިއެކު ކޯވިޑް19 ކޮންޓަރޯލް ކުރި ގައުމެއްގެ ގޮތުގައި ފާހަގަ ވަމުން އައީ މެލޭޝިޔާއެވެ. މިގޮތުން އެގައުމުގައި އެންމެ ފުރަތަމަ ކޯވިޑް ފެތުރެންފެށީ ކުއާލާލަންޕޫރުގެ މިސްކިތަކަށް އެއްވި 15 ވަރަކަށް ހާސްމީންހުންގެ ތެރެއިންނެވެ. އެހެންނަމަވެސް، މިޖަމާއަތުގެ ތެރޭގައި ކޯވިޑަށް ޕޮޒިޓިވް މީހުން ތިބިކަމުގެ މައުލޫމާތު ލިބުމާއިއެކު ކޮންޓެކްޓް ޓްރޭސިންގ ހަދާ އިތުރަށް ފެތުރިގެން ދިއުން އެގައުމުން ކޮންޓްރޯލް ކުރިއެވެ. އެހެންނަމަވެސް އެއީ މިބަލި ދުނިޔެއަށް ފެތުރެން ފެށި ދުވަސްވަރަށް ވުމާއިއެކު، އޭރު އެގައުމުގައު ފެތުރެމުން ދިޔަ ނިސްބަތް މައްޗަށް އަރަމުން ގޮސް ދުވާލަކަށް 200 އެއްހާ މީހުން މިބައްޔަށް ޕޮޒިޓިވް ވަމުން ދިޔައެވެ. އެހެންނަމަވެސް މެލޭޝިޔާގެ ސަރުކާރުން "މޫވްމަންޓް ކޮންޓްރޯލް އޯޑަރ" ނަމުގައި ރައްޔިތުން އެއްވެއުޅުން ކޮންޓްރޯކޮށް ޕޮޒިޓިވް ވަމުންދާ ނިސްބަތް ދަށްކުރަމުން ގޮސް، ދުވާލަކަށް ޖެހޭ މީހުންގެ އަދަދު 10 މީހުންނަށްވުރެވެސް ދަށްކުރިއެވެ. އަދި މިސަރަހައްދުގައި އެންމެ ފުރިހަމައަށް ބޯޑަރ ކޮންޓްރޯލް ކުރި އެއްގައުމަކީވެސް މެލޭޝިޔާއެވެ. އެހެންނަމަވެސް އޭގެ 3 މަސްފަހުން މެލޭޝިޔާގައިވެސް އަނެއްކާވެސް ކޯވިޑް19 މިވަނީ ބާރުމިނެއްގައި ފެތުރެން ފަށާފައެވެ. މިއަދު އެކަނިވެސް މެލޭޝިޔާގައި ވަނީ 432 މީހަކު މިބައްޔަށް ޕޮޒިޓިވް ވެފައެވެ. އަދި މެލޭޝިޔާގެ ކެޑަރ ސަރަހައްދުގައި ހުންނަ ޖަލަކުން 224 ގައިދީއަކު ވަނީ މިބައްޔަށް ޕޮޒިޓިވް ވެފައެވެ.
މީގެ އިތުރުން މެލޭޝިޔާގެ ސަބަރ ސަރަހައްދުން ގިނަ ބަޔަކު ޕޮޒިޓިވް ވަމުންދާތީ އެސަހައްދަށް މީހުން ވަނުމާއި ސަރަހައްދު ދޫކޮށް ދިއުން އޮކްޓޯބަރ 12 އިން ފެށިގެން 25ގެ ނިޔަލަށް މަނާ ކުރުމަށް އެގައުމުގެ ސަރުކާރުން ވަނީ ހަމަޖައްސާފައެވެ. މީގެ އިތުރުން މެލޭޝިޔާގެ ވެރިރަށް ކުއާލާ ލަމްޕޫރުންވެސް ކޭސްތައް ފެންނަމުން ދާ އަދަދު ދަނީ އިތުރުވަމުންނެވެ. ނަތީޖާއެއްގެ ގޮތުން މެލޭޝިޔާގެ ސަރުކާރުން މިހާރުވަނީ އެގައުމުގެ ބޯޑަރ ބަންދުކުރުމަށް މިހާރުވެސް ނިންމާފަ އޮތް އޮތުން އިތުރަށް ހަރުކަށިކޮށް، މިއަހަރުގެ ޑިސެމްބަރުގެ ނިޔަލަށް ވިސާ އޮތްނަމަވެސްް ގައުމުން ބޭރުގެ ކިޔަވާކުއްޖަކަށްވެސް އެގައުމަށް އެތެރެވުން މަނާ ކޮށްފައެވެ. މެލޭޝިޔާގެ ބޮޑުވަޒީރު މިހާރުވެސް ހުންނެވީ ކަރަންޓީނުގައެވެ.
