ކުރިޔަށް އޮތް ރިޔާސީ އިންތިޚާބަށް އަހަރަކަށްވުރެ މަދު ދުވަސްކޮޅަކަށް ވެފައިވާއިރު، ރާއްޖޭގެ ސިޔާސީ މަސްރަހުން ފެންނަމުން ދަނީ ހަމަހިމޭންކަމާއި، 2023 އަށް އަމާޒުކޮށް ސިޔާސީ ލީޑަރުން ހިންގަވާ ހަރަކާތްތައްވެސް ބޮޑުތަކުން މަޑު ޖެހިފައި އޮތްތަނެވެ. ފާއިތުވެދިޔަ ރިޔާސީ އިންތިޚާބުތަކުގެ މާކުރިންވެސް އެއިންތިޚާބަށް އަމާޒުކޮށް ކޯލިޝަންތައް ހަދާ، ކެމްޕޭންތައް ފެށިގެން ގޮސްފައިވިނަމަވެސް، 2023ގެ ރިޔާސީ އިންތިޚާބަށް އަމާޒުކޮށް ހިންގޭ ސިޔާސީ ހަރަކާތްތަކެއް އެއްވެސް ސިޔާސީ ޕާޓީއަކުން ހިންގަމުންދާތަން މިވަގުތު ފެންނާކަށް ނެތެވެ.

މިގޮތުން، އިދިކޮޅު ޕީޕީއެމްއިން ފާއިތުވެދިޔަ ތަނުގައި ހިންގަމުންއައި އިންޑިއާ އައުޓު ކެމްޕޭނަކީ އައިރު ގާނޫނީ ކެމްޕޭނެއްކަމަށް ރައީސް ސާލިހުގެ ގަރާރަކުން ކަނޑައެޅި ހިސާބުން އެކެމްޕޭން މަޑު ޖެހިގެންދިޔަ ގޮތަށް އިދިކޮޅި ސިޔާސީ ހަރަކާތްތަކަށްވެސް ހުއްޓުން އައިސް، ޕީޕީއެމްއިން ހިންގަމުންއައި މަގުމަތީ މުޒާހިރާތަކާއި އެނޫން ސިޔާސީ ހަރަކާތްތައްވެސް ވަނީ އެކީ ކަހަލަގޮތަކަށް މަޑުޖެހިގެން ގޮސްފައެވެ.

އެއާއެކު ސަރުކާރުން ހިންގާ ކޯލިޝަންގައި ތިބި ސިޔާސީ ޕާޓީތަކުގެ ތެރެއިން އާންމު އުސޫލުން، ޖުމުހޫރީ ޕާޓީ އޮތީ އަދިވެސް ގަދަ ނިދީގައެވެ. ގިނަބަޔަކު ގަބޫލު ކުރާގޮތިގައި އެޕާޓީ ދެންވެސް ހޭލާނީ ރިޔާސީ އިންތިޚަބަށް ބެރުޖަހަން ފެށުމުންނެވެ. އަދާލަތު ޕާޓީގެ އިސްވެރިން ތިއްބެވީ ސަރުކާރުން އެބޭފުޅުންނަށް ލިބިލައްވާފައިވާ މަގާމްތަކުގައި، ސިޔާސީ ހަރަކާތްތަކާއި ދުރުގައެވެ. އެމްއާރުއެމްގައި މާބޮޑު ސިޔާސީ ހަރަކާތްތަކެއް ހިންގާނެ ހަކަތައެއް ނެތްތާގައި، އެޕާޓީ ފާހަގަވެގެން ދަނީ ނޫސް ބަޔާނެއް ނެރެލުން ނޫން އެހެން އެއްވެސް ހަރަކާތެއް ނެތް ޕާޓީއެއްގެ ގޮތުގައެވެ.

ސަރުކާރު ހިންގާ އެންމެ ބޮޑު ޕާޓީކަމުގައިވާ އެމްޑީޕީ އަދިވެސް އޮތީ ޕާޓީގެ އެތެރޭގެ ސިޔާސީ ވާދަވެރިކަމުގައި، ސިޔާސީ ހަރާކަތްތައް ހިންގުމާއި ވަރަށްވެސް ދުރުގައެވެ. ހަމަ އެއާއެކު ކުރިޔަށް އޮތް ރިޔާސީ އިންތިޚާބަށް އަމާޒުކޮށްވެސް، އެ ޕާޓީގެ އިސް ދެ ލީޑަރުން ކަމުގައިވާ ރައީސް ސާލިހާއި ރައީސް ނަޝީދުވެސް މާބޮޑު ސިޔާސީ މަސައްކަތްތަކެއް ކުރައްވާތަނެއް ފެންނަމުންނެއް ނުދެއެވެ.

ހުރިހާ ސިޔާސީ ހަރަކާތެއްގެ އަމާޒު، ރައީސް ޔާމިންގެ ޝަރީއަތް!

ރާއްޖޭގެ އުފެދިފައިވާ ސިޔާސީ ޕާޓީތަކުގެ ތެރެއިން މިހާތަނަށް ރިޔާސީ ކެނޑިޑޭޓަކު އައްޔަން ކޮށްފައިވާ ހަމައެކަނި ޕާޓީއަކީ އިދިކޮޅު ޕީޕީއެމްއެވެ. އެޕާޓީންވަނީ އާންމުކޮށް ހުޅުވާލެވިފައިވާ ޕްރައިމަރީއަކާ ނުލާ، ޕާޓީގެ ކައުންސިލުން ރިޔާސީ ޓިކެޓް ރައީސް ޔާމިނަށް އަރުވާފައެވެ.

އެހެންނަމަވެސް ފާހަގަކޮށްލާން ޖެހޭ އެންމެ މުހިންމު އެއް ނުކުތާއަކީ، އިދިކޮޅު ޕީޕީއެމްގެ ރިޔާސީ ކެނޑިޑޭޓުގެ ހައިސިއްޔަތުން ބައެއް ރަށްތަކަށް ޔާމިން ދަތުރު ކުރައްވާފައިވި ނަމަވެސް، އެމަނިކުފާނު މިހާރުވެސް ހުންނެވީ ޚިޔާނާތާއި މަނީ ލޯޑަރކުރުމުގެ ތުހުމަތުގައި ކުރެވެމުންދާ ދައުވާތަކެއްގެ މެދުގައިކަމެވެ.

މިގޮތުން މިހާރު ކުރިޔަށްދާ، ވ. އާރަށް ކުއްޔަށް ދީގެން ދައުލަތަށް ލިބެންޖެހޭ ފައިސާއަށް ޚިޔާނާތްތެރިވިކަމުގެ ތުހުމަތުގައި ރައީސް ޔާމީނާއި ދެކޮޅަށް ދައުލަތުން އުފުލާފައިވާ މަނީ ލޯންޑަރކުރުމާއި ރިޝްވަތު ޤަބޫލުކުރިކަމުގެ ކުށުގެ ދައުވާގެ އަޑުއެހުންތައް ފާއިތުވެދިޔަ ހަފްތާގައި ކުރިމިނަލް ކޯޓުންވަނީ ނިންމާލާފައެވެ.

އެންމެ ފަހުން ބޭއްވުނު، ޝަރީއަތުގެ އަޑުއެހުމުގައި ދެފަރާތުންވެސް ޚުލާސާ ބަޔާންތައް އިއްވާ ނިމުމާއެކު މައްސަލަ ބައްލަވާ ކުރިމިނަލް ކޯޓުގެ އިސްގާޒީ އަހުމަދު ޝަކީލް އަޑުއެހުންތައް ނިންމަވާލައްވަމުން ވިދާޅުވެފައިވަނީ ދެން އޮންނާނީ ހުކުމް ކުރުމަށް އޮންނަ މަޖިލިސް ބޭއްވުން ކަމުގައެވެ. އެހެންނަމަވެސް އެ އަޑުއެހުން ތާވަލް ކުރާނެ ދުވަހެއް ގާޒީ އިއުލާން ކުރައްވާފައެއް ނުވެއެވެ.

ގާނޫނު ބުނާ ގޮތުން އަޑުއެހުންތައް ނިންމާލާތާ 30 ދުވަހުގެ ތެރޭގައި ހުކުމް އިއްވާން ޖެހެއެވެ. އެހެންކަމުން މިއަހަރު ނިމުމުގެ ކުރިން ޔާމިންގެ މައްސަލާގައި ކުރިމިނަލް ކޯޓުން ހުކުމް ކުރާނެކަން ޔަގީންވެފައިވާއިރު، ޔަގީން ނުވެ އޮތް ހަމައެކަނި ކަމަކަށް ވެގެންދަނީ ހުކުމް އަންނާނޭ ގޮތެކެވެ. އެހެންނަމަވެސް ރައީސް ޔާމިންގެ މައްޗަށް މިމައްސަލާގައި ޖަލު ހުކުމެއް އައި ކަމުގައިވި ނަމަވެސް، ނުވަތަ ހުކުމެއް ނައިސް މިނިވަންވި ކަމުގައިވި ނަމަވެސް، ސިޔާސީ ޕާޓީތަކުގެ މެދުގައި އޮތް ސިޔާސީ ވާދަވެރިކަމަށްވުރެ ބޮޑަށް، ކުރިޔަށް އޮތް ރިޔާސީ އިންތިޚާބަށް އަސަރު ކުރުވާނެ އެންމެ ބޮޑު ނިންމުމެއްގެ ގޮތުގައި މިހާރު ބެލެވެން އޮތީ ހިގަމުންދާ ރައީސް ޔާމިންގެ ކޮރަޕްޝަންގެ މައްސަލާގައި ކޯޓުން ނިންމަވާނެ ނިންމެވުމެވެ.

ޕީޕީއެމްގެ އެތެރޭގެ ވާދަވެރިކަން!

އިދިކޮޅު ޕީޕީއެމްގެ ރިޔާސީ ރިޔާސީ ޓިކެޓް ރައީސް ޔާމިނަށް އެޕާޓީން އެރުވިއިރުވެސް ޚުދު ރައީސް ޔާމިނަށްވެސް އަދި ޕާޓީގެ އިސް ފަރާތްތަކަށްވެސް އެގި ހާމަވާން އޮތް އެއް ކަމަކީ އެ ޓިކެޓަކީ ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް އޮތް ޓިކެޓެއް ނޫންކަމެވެ. ސަބަބަކީ ކުރިމަތީގައި އޮތް، ހިގަމުންދާ ޝަރީއަތެވެ.

ޝަރީއަތުން އަނެއްކާވެސް ޖަލު ހުކުމަކާއި ކުރިމަތިލައްވަން ރައީސް ޔާމިނަށް ޖެހިވަޑައިގެންފިނަމަ، ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވުމުގެ ފުރުސަތު ގެއްލި، އިދިކޮޅު ޕީޕީއެމްއަށް ޖެހޭނީ އަނެއްކާވެސް ރިޔާސީ އިންތިޚާބަށް އާ ބޭފުޅަކު ނެރުއްވާށެވެ. ހަމައެއާއެކު ފާހަގަވާން އޮތް ކަމަކީ، އެފަދަ ހާލަތެއްގައި އިދިކޮޅު ޓިކެޓް ކަށަވަރު ކުރުމަށް ޕީޕީއެމްގެ އެތެރޭގައި އޮތް ސިޔާސީ އަދި ފެކްޝަންތަކުގެ ވާދަވެރިކަމެވެ.

ބައެއް ފަރާތްތަކުގެ ގަބޫލުކުރާ ގޮތުގައި، ޔާމިންގެ ޝަރީއަތް ކުރިޔަށް ގޮސްފައިވާ ގޮތާއި އަދި ދިފާއީ ހެކި ނަފީކުރުމަށް ދައުލަތުން ހުށަހަޅާފައިވާ ލިޔެކިޔުންތަކުގެ ސަބަބުން، ރައީސް ޔާމިންގެ މައްޗަށް ޝަރީއަތުން ހުކުމެއް އަންނާނޭކަމަށް ބަލާ، ރިޔާސީ ޓިކެޓަށް ޕީޕީއެމްގެ ތެރެއިން ފައި ނަންގަވައިގެން ތިއްބެވި ފަރާތްތަކުގެ މެދުގައި އޮތް ވާދަވެރިކަން މިހާރުވެސްވަނީ އިތުރު ގިންތިއަކަށް ކުރިޔަށް ޖެހިލާފައެވެ.

އެހެންނަމަވެސް އެފަދަ ހާލަތެއްގައި، އިދިކޮޅު ޕީޕީއެމްގެ ރިޔާސީ ޓިކެޓް ލިބިގެންދާނީ ބޭއްވޭ ރިޔާސީ ޕްރައިމަރީއަކުންތޯ ނުވަތަ، ރައީސް ޔާމިން ހިތްޕުޅާވާ ބޭފުޅަކަށް އެޕާޓީގެ ކައުންސިލުން ޓިކެޓް، ކުރިއެކޭވެސް އެއްފަދައިން ވެދުމަކަށް އަރުވާނީތޯ މިއީ އަދި ސުވާލު އުފެދިފައި އޮތްކަމެކެވެ. އެހެންނަމަވެސް، ގިނަބަޔަލު ގަބޫލުކުރާ ގޮތުގައި، ކުރީގެ ރައީސް ޑރ. ވަހީދާއި، މާލޭ ސިޓީގެ މޭޔަރު ޑރ. މުއިއްޒުގެ އިތުރުން، ކުރީގެ އިކޮނޮމިކް މިނިސްޓަރ މުހައްމަދު ސައީދާއި، ގުރައިދޫ ދާއިރާގެ މަޖިލިސް މެމްބަރު އައްސާން މައުމޫނުގެ އިތުރުން މަޑުއްވަރި ދާއިރާގެ މެމްބަރު އާދަމް ޝަރީފަކީވެސް، ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި ޕީޕީއެމްގެ ރިޔާސީ ޓިކެޓަށް އުއްމީދު ކުރައްވައިގެން، ކަމަރު ބަންނަވައިގެން ތިއްބެވި ފަރާތްތަކެވެ.

ހުކުމް އަންނަ ގޮތަކުން ސަރުކާރު ކޯލިޝަން ރޫޅިދާނެ!

ހިގަމުންދާ، ކޮރަޕްޝަނާއި މަނީ ލޯންޑަރ ކުރުމުގެ ޝަރީއަތުގައި ރައީސް ޔާމިންގެ މައްޗަށް ހުކުމްކުރުމަށް ތައްޔާރު ވެފައިވާއިރު، ކުރިޔަށް އޮތް ރިޔާސީ އިންތިޚާބުގެ ފޯމިއުލާގައި އެންމެ ބޮޑު އަސަރެއް ކުރުވާނެ އެއް ފަރާތަކަށް ވެގެންދާނީ ސަރުކާރުގެ ކޯލިޝަންގެ އެތެރޭގައި އޮތް އެއްބައިވަންތަކަމާއި އަދި އެ ކޯލިޝަންގެ ފަރާތުން ރިޔާސީ އިންތިޚާބުގައި ވާދަކުރުމަށް ރައީސް ސާލިހަށް އޮތް ފުރުސަތަށް ކަމުގައިވެސް ގިނަ ބަޔަލު ގަބޫލުކުރެއެވެ.

މިގޮތުން ފާހަގަވާން އޮތް އެންމެ މުހިންމު ކަމަކީ، އިދިކޮޅު ޕީޕީއެމްގެ ރިޔާސީ ކެނޑިޑޭޓެއްގެ ހައިސިއްޔަތުން ރިޔާސީ އިންތިޚާބުގައި ރައީސް ޔާމިން ވާދަކުރައްވާ ހާލަތުގައި، ޕީޕީއެމްއާއި ކޯލިޝަން ހަދާނެ އިތުރު އެއްވެސް ޕާޓީއެއް ރާއްޖޭގެ މިހާރުގެ ސިޔާސީ މަސްރަހުގައި ނެތްކަމެވެ.

އޭގެ އެންމެ ބޮޑު އެއް ސަބަބަކަށް ވެގެންދަނީ އެހެން ސިޔާސީ ޕާޓީތަކާއި ނުވަތަ އެޕާޓީތަކުގެ އިސްފަރާތްތަކާމެދު ރައީސް ޔާމިން ދަމަހައްޓަވަމުން ގެންދަވާ ދެކޮޅުވެރިކަމުގެ ނުވަތަ ނަފްރަތުގެ ސިޔާސަތެވެ. މިސިޔާސަތުގެ ސަބަބުން ޕިޕީއެމްއާ އެހެން ސިޔާސީ ޕާޓީތަކާމެދު އުފެދިފައިވާ ދެކޮޅުވެރިކަން އޭގެ އިންތިހާއަށް ދަތުރު ކޮށްފައިވާއިރު، އޭގެ ނަތީޖާއެއްގެ ގޮތުން މިހާތަނަށް އައިއިރުވެސް، އެމްޑީޕީގެ އެތެރޭގައި އޮތް ބޮޑު ކޯޅުމާއެކުވެސް އިދިކޮޅު ލީޑަރާއި އެއް ޕްލެޓްފޯމެއްގައި ސަރުކާރު ޒިންމާދާރު ކުރުވުމަށްވެސް އެހެން ސިޔާސީ ލީޑަރަކަށް އެކީ މަސައްކަތް ކުރުމުގެ ޖާގަ ތަނަވަސް ވެގެނެއް ނުދިޔައެވެ.

އެހެންނަކަމުން ބެލެވޭ ގޮތުގައި، މިއަހަރު ނިމުމުގެ ކުރިން ރައީސް ޔާމިންގެ މައްޗަށް ކުރިމިނަލް ކޯޓިން ހުކުމް އިއްވާއިރު، އެހުކުމުން ޔާމިން ސަލާމަތް ވެއްޖެނަމަ، ކުރިޔަށް އޮތް ރިޔާސީ އިންތިޚާބުގައި އިދިކޮޅު ޕީޕީއެމް ވާދަކުރާނީ ގިނިކަންޏާއެވެ. އެހާލަތުގައި ސަރުކާރު ކޯލިޝަންގެ އެއްބައިވަންތަކަން އިންތިހާއަށް ވަރުގަދަވެ، ގިނަ ޕާޓީތަކެއް ރައީސް ސާލިހުން ފަހަތްޕުޅަށް އަރުއްވާ، ވަރުގަދަ ކެނޑިޑޭޓެއްގެ ގޮތުގައި ރިޔާސީ އިންތިޚާބަށް ނިކުންނެވުމުގެ ފުރުސަތު އިންތިހާއަށް ރައީސް ސާލިހަށް ތަނަވަސް ވެން ދާނެއެވެ.

އެހެންނަމަވެސް އެއާއި ޚިލާފަށް، ރައީސް ޔާމިނަށް ޖަލު ހުކުމެއް އަތުވެއްޖެނަމަ، ކުރިޔަށް އޮތް ރިޔާސީ އިންތިޚާބުގައި ވާދަކުރުމުގެ ފުރުސަތު ރައީސް ޔާމިނަށް ގެއްލިގެން ދާނެއެވެ. އެހާލަތުގައި ޕީޕީއެމްއަށް އެޕާޓީގެ އިސް އެހެން ބޭފުޅަކު ރިޔާސީ ކެނޑިޑޭޓެއްގެ ގޮތުގައި އިންތިޚާބަށް ނެރުމަށް މަޖުބޫރުވެ، ފުޅާ ކޯލިޝަނެއް ހަދާ، ރިޔާސީ އިންތިޚާބު ކާމިޔާބު ކުރުމަށް އާ ހިތްވަރަކާއެކު އާ ޖޯޝެއްގައި ނިކުތުމުގެ ފުރުސަތު އެޕާޓީއަށް އިންތިހާއަށް ފަހިވެގެންދާނެ ކަމުގައި ބެލެވެއެވެ.

ހަމައެއާއެކު، ބައެއް ފަރާތްތަކުން މިހާރުވެސް ގަބޫލު ކުރާ ގޮތުގައި ރައީސް ޔާމިންގެ މައްޗަށް ޖަލު ހުކުމެއް އަތުވެއްޖެ ހާލަތުގައި، ޕީޕީއެމްގެ އިސް ބައެއް ފަރާތްތަކުން ޖުމުހޫރީ ޕާޓީގެ ލީޑަރު ގާސިމް އިބުރާހިމްއާ ބައިއަތު ހިތްވަޕާ، ގުޅިފައިވާ ރިޔާސީ ކެނޑިޑޭޓެއްގެ ގޮތުގައި ރިޔާސީ އިންތިޚާބަށް ނިކުންނެވުމަށް ގާސިމް އިބުރާހިމް މިހާރުވެސް ހުންނެވީ ފުރުސަތަކަށް ބައްލަވާށެވެ.

އެފަދަ ހާލަތެއްގައި މިހާރު ސަރުހިންގާ ކޯލިޝަންގައި އޮތް އަދާލަތު ޕާޓީވެސް ސަރުކާރާ ފެޔަށް ޖެހިދާނެކަމަށް ސިޔާސީ ބައެއް ފަރާތްތަކުން ހިސާބު ޖައްސަވާއިރު، ދެވަނަ ދައުރަކަށް ރައީސް ސާލިހު ދެކެވަޑައިގަންނަވަމުން ގެންދަވާ ހުވަފެންތަކަށް ގޮންޖެހުންތަކަކާއި ކުރިމަތިލައްވަން ޖެހިވަޑައިގަތުމަކީ ވަރަށްވެސް އެކަށީގެންވާ ކަމުގައި ގަބޫލުކުރާ މީހުން ވަރަށްވެސް ގިނަކަމުގައި ދަންނަވާން ޖެހެއެވެ. އެ ހާލަތުގައި، އެމްޑީޕީގެ އެތެރޭގައި އޮތް ސިޔާސީ ކޯޅުންތަކާއެކު، އޮޔާއި ވަޔާއި ދެކޮޅަށް ކުރާންނެޖޭ ދަތުރުގައި އިތުރު ގޮންޖެހުންތަކާއި ސަރުކާރުން ކުރިމަތިލާންޖެހުމުގެ ފުރުސަތު އޮންނާނީ ވަރަށްވެސް ގާތުގައި ކަމުގައި ސިޔާސީ ބައެއް ފަރާތްތަކުން ގެންދަވަނީ ހިސާބު ޖައްސަވަމުންނެވެ.

ހުކުމް މިމަސް ނިމުމުގެ ކުރިން، ގިނަބަޔަކު އިންތިޒާރުގައި!

ކުރިޔަށް އޮތް ރިޔާސީ އިންތިޚާބަށް އަމާޒުކޮށް ބައެއް ސިޔާސީ ޕާޓީތަކުން ރިޔާސީ ޕްރައިމަރީ ބާއްވަން އިއުލާން ކޮށްފައިވާއިރު، ރައީސް ޔާމިންގެ މައްޗަށް ކުރިޔަށްދާ ޝަރީއަތުގެ ހުރިހާ އަޑުއެހުމެއްވެސް މިހާރުވަނީ ނިންމާލާފައެވެ.

ދެފަރާތުންވެސް ގިނަ ހެކިންނާއި، ހެއްކާއި ގަރީނާތައް ހުށަހެޅި މި ޝަރީއަތުގައި ގިނަ ބައެއްގެ ޝައުގުވެރިކަން އެންމެ ފަހުން ހުއްޓިގެން ދިޔައީ، ދިފާއީ ހެކިންގެ ހެކިބަސް ނަފީކުރުމަށް ދައުލަތުން އެންމެ ފަހުން ޝަރީއަތަށް ހުށަހެޅި ލިޔެކިޔުންތަކަށެވެ.

މި ލިޔެކިޔުންތައް ބަލައި ނުގަތުމަށް ދިފާއީ ހެކިން ޝަރީއަތުގައި އެދެމުން ދިޔަނަމަވެސް، ގާޒީ އެންމެ ފަހުން ނިންމަވާފައިވަނީ ދިފާއީ ހެކި ނަފީކުރުމަށް ދައުލަތުން ހުށަހެޅި ލިޔެކިޔުންތައް ބަލައިގަތުމަށެވެ. މިގޮތުން ޝަރީއަތުގެ މަޖިލީހަށް އާ ލިޔުންތަކެއް ހުށަހަޅުއްވަމުން ދައުލަތުން ބުނެފައިވަނީ މި ލިޔުންތަކަކީ، ޔާމިންގެ ދިފާއުގައި ހެކިބަސް ދީފައިވާ ހެކިންގެ ހެކިބަހުގެ ސައްޙަކަމާމެދު ސުވާލު އުފެއްދުމުގެ އިތުރުން ހެކިބަސްތައް ނަފީކުރުމަށްޓަކާ ހުށަހެޅުއްވި ލިޔެކިޔުންތަކެއް ކަމުގައެވެ.

މިގޮތުން ހުށަހެޅި ލިޔުންތަކުގެ ތެރޭގައި ޔާމިންގެ ދިފާއުގައި ދިން ދިފާއީ ހެކިބަސްތަކުގައި ހުރި ދެކޮޅު ނުޖެހޭ އެތައްކަމެއް މި ލިޔުންތަކުން ސާބިތު ކުރުމަށް ދައުލަތުން މަސައްކަތް ކޮށްފައިވާއިރު، އޭގެ ނަތީޖާއެއްގެ ގޮތުން ޔާމިންގެ މައްޗަށް ޖަލު ހުކުމެއް އަތުވެދާނެކަމަށް ގިނަބަޔަކު މިހާރުވަނީ ދެކެން ފަށާފައެވެ.

އެހެންނަމަވެސް، ދެން އޮންނަ ޝަރީއަތުގެ އަޑުއެހުމުގެ މިހުކުމުން ރައީސް ޔާމިން ސަލާމަތްވި ކަމުގައިވި ނަމަވެސް، ނުވަތަ ޖަލުހުކުމެއް އައިސް ޔާމިން ޖަލަށް ވަޑައިގަންނަވަން ޖެހިވަޑައިގެންނެވި ނަމަވެސް، މިހުކުމްގެ ނަތީޖާ މިހާރު ބެލެވިފައިވަނީ މިއީ ކުރިޔަށް އޮތް 2023ގެ ރިޔާސީ އިންތިބާއި ހުރިހާ ގޮތަކުންވެސް ގުޅިލާ މެހިގެންދާނެ ވަރުގަދަ ނިންމުމެއްގެ ގޮތުގައެވެ.