ދައުލަތަށް ކުރިމަތިވެފައިވާ މާލީ ދަތިތަކުން އަރައިގަތުމަށ،ް ރައްޔިތުންގެ އަތުން ނަގާ ޓެކްސް ބޮޑުކުރަން ސަރުކާރުން ހުށަހަޅުއްވާފައިވާ، ޓެކްސް ބިލާއި ދެކޮޅަށް އެންމެ ފަހުން އުފެއްދި އެމްއެންޕީގެ 3 މެމްބަރުންވެސް ވޯޓު ދެއްވައިފިއެވެ.
19 ވަނަ މަޖިލިހުގައި ހިމެނިވަޑައިގަންނަވާ އެމްއެންޕީގެ 3 މެމްބަރުންނަކީ ދަގެތީ ދާއިރާގެ މެމްބަރު ކާނަލް ނާޒިމްއާއި، ތިމަރަފުސީ ދާއިރާގެ މެމްބަރު އަބުދުﷲ ރިޔާޒުއާއި ވިލިމާލޭ މެމްބަރު އުޝާމްއެވެ.
މިއަދު ފާސްކުރި ޓެކްސް ބިލަކީ މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުގެ ފަރާތުން ރައްޔިތުންގެ މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ހުށަހެޅުއްވި އިސްލާހެކެވެ. މި އިސްލާޙޫ ފާސްކުރަން ފެންނަ ކަމަށް މިއަދު ރައްޔިތުންގެ މަޖިލީހުގައި ބައިވެރިވި 55 މެންބަރުން ވޯޓު ދެއްވިއެވެ. މިބިލާ ދެކޮޅަށް ވޯޓުދެއްވީ 26 މެންބަރެކެވެ.
ފާއިތުވެދިޔަ ދެ ޖަލްސާގަވެސް ޓެކްސް ބިލަށް ވޯޓަށް ނާހާ ލަސްކުރުމަށްފަހު މަޖިލިސް ރައީސް މިއަދު ބިލަށް ވޯޓަށް އަހާފައި ވާއިރު، ބިލާއި އެއްކޮޅަށް ވޯޓު ދީފައިވަނީ އެމްޑީޕީގެ ޕާލަމެންޓްރީ ގްރޫޕުގެ 51 މެމްބަރެކެވެ. އެމްޑިޕީގެ ޕީޖީން ބިލާއި ދެކޮޅަށް ވޯޓު ދެއްވާވަނީ ނަޝީދަށް ތާއީދުކުރާ 14 މެމްބަރުންނެވެ. މިއަދު ބިލް ފާސްކޮށްފައިވަނީ ޖުމްލަ 55 މެމްބަރުންގެ ތާއީދައެކީއެވެ.
މިއަދު ބިލް ފާސް ކުރުމަށް އިދިކޮޅު މެމްބަރު ހުސެއިން މުހައްމަދު ލަތީފް ވޯޓު ދެއްވާފައިވާއިރު، އޭނާ ފިޔަވާ ޕީޕީއެމް ޕީއެންސީގެ ޕާލަމެޓްރީ ގްރޫޕުގެ ތެރެއިން ބިލަށް ދެން ވޯޓު ދެއްވާފައި ނުވަނީ އޭދަފުށީ ދާއިރާގެ މެމްބަރު ސަލީމްއެވެ. މައުލޫމާތު ލިބިފައިވާ ގޮތުގައި އޭނާ ރަށުގައި ނޫޅުއްވައެވެ. އިދިކޮޅު ޕީޕީއެމް ޕިއެންސީގެ ޕީޖީގައި ހިމެނޭ އެހެން ހުރިހާ މެމްބަރުން ވޯޓު ދީފައިވަނީ ބިލާއި ދެކޮޅަށެވެ.
އޭގެ އިތުރުން ޖުމުހޫރީ ޕާޓީއަށް ނިސްބަތްވާ 3 މެމްބަރުންގެ ތެރެއިން އިސްދޫ ދާއިރާގެ މެމްބަރު އަލީ ހަމީދު ބިލާ އެއްކޮޅަށް ވޯޓު ދެއްވި އިރު ކެންދޫ ދާއިރާގެ މެމްބަރު އަލީ ހުސެއިން ވޯޓު ދެއްވާފައިވަނީ ބިލް ފާސް ނުކުރުމަށެވެ. ޖުމުހޫރީ ޕާޓީގެ ލީޑަރު ގާސިމް އިބްރާހިމް މިއަދު މަޖިލީހަށް ވަޑައެއް ނުގަންނަވައެވެ.
މަޖިލީހުގައި ހިމެނިވަޑައިގަަންނަވާ މިނިވަން މެމްބަރުންގެ ތެރެއިން ނިލަންދޫ ދާއިރާގެ މެމްބަރު އަބުދުލް މުހުސިން ހަމީދު ބިލް ފާސްކުރުމަށް ވޯޓު ދެއްވިއިރު، ތުލުސްދޫ ދާއިރާގެ މެމްބަރު އިބުރާހިމް ނަސީމް ބިލާ އެއްކޮޅަށް ވޯޓު ދެއްވާފައެއް ނުވެއެވެ.
ދައުލަތުގެ މާލީ ހާލަތު ރަނގަޅުކުރުމަށްޓަކައި އަންނަ ޖެނުއަރީ މަހުން ފެށިގެން ޖީއެސްޓީއާއި ޓީޖީއެސްޓީ ބޮޑުކުރުމަށްޓަކައި މިގެނައި އިސްލާހުގައި ވާގޮތުން ޓީޖީއެސްޓީ %12އިން %16އަށް، އަދި ޖީއެސްޓީ %6އިން %8އަށް ބޮޑު ވެގެން ދާނެއެވެ. މިބަދަލާއެކު ޖީއެސްޓީން 970 މިލިއަން ރުފިޔާ އަދި ޓީޖީއެސްޓީން 2.1 ބިލިއަން ރުފިޔާގެ އާމްދަނީއެއް ލިބޭނެކަމަށް ސަރުކާރުން ލަފާކުރައްވައެވެ.
