އެމެރިކާގެ ރިޔާސީ އިންތިޚާބަށް އެންމެ 28 ދުވަހަށް ވެފައި ވާއިރު، ޚިޔާލު ހޯދުމުގެ ގިނަ ސާވޭތަކުން ދައްކާ ގޮތުގައި ބޮޑުތަނުން ކުރީގައި އުޅުއްވަނީ ކުރީގެ ނައިބު ރައީސް، ޑިމޮކްރަޓިކް ޕާޓީގެ ރިޔާސީ ކެނޑިޑޭޓް ޖޯ ބައިޑަން އެވެ.
ސީ.އެން.އެން އިން އެންމެ ފަހުން ނެގި ޕޮލް އިން ދައްކާގޮތުގައި ރިޔާސީ އިންތިޚާބަށް މަހަކަށްވުރެ މަދު ދުވަސްކޮޅަކަށް ވެފައި ވާއިރު، ރިޕަބްލިކަން ކެނޑިޑޭޓް އަދި މިހާރުގެ ރައީސް ޑޮނަލްޑް ޓްރަމްޕްއާއި ޑިމޮކްރަޓިކް ކެނޑިޑޭޓް ޖޯ ބައިޑްންއާއި ދެމެދު ދެމެހެއްޓެމުން އައި ފަރަގު ދާދި ފަހުން ބޭއްވުނު ރިޔާސީ ބަހުސަށްފަހު ވަނީ ބޮޑުވެފައެވެ.
ރިޔާސީ ބަހުސް ނިމުމާއިއެކު ނެގުނު ސާވޭގެ ނަތީޖާ ދައްކާގޮތުން ވޯޓު ލާނެކަމަށް ބެލެވޭ މީހުންގެ %57 ބައިޑަންއަށް ތާއީދު ކުރާކަމަ ދައްކާއިރު ޓްރަމްޕަށް ތާއީދު ކުރާނެކަމަށް ބުނެފައި ވަނީ %41 މީހުންނެވެ. އަދީ މީގެއިތުރުން އެމެރިކާގެ ރައްޔިތުން ކަންބޮޑުވާ ގިނަ މައްސަލަތައް ހައްލުކުރުމުގައިވެސް ޓްރަމްޕަށްވުރެ ބޮޑަށް އެމެރިކާގެ ރައްޔިތުން ބައިޑަންއަށް އިތުބާރު ކުރާކަމަށްވެސް މިސާވޭން ވަނީ ދައްކާފައެވެ. މީގެ ތެރޭގައި ކޯވިޑް ޕެންޑަމިކް (%59 ބައިޑަން، %38 ޓްރަމްޕް)، ހެލްތް ކެއަރ (%59 ބައިޑަން، %38 ޓްރަމްޕް)، އެމެރިކާގައި އޮތް ނަސްލީ ތަފާތުކުރުން ނައްތާލުން (%62 ބައިޑަން، %36 ޓްރަމްޕް)، މިހާރު ހުސްވެފައިވާ ސުޕްރީމް ކޯޓަށް ފަނޑިޔާރަކު އައްޔަން ކުރުން (%57 ބައިޑަން، %41 ޓްރަމްޕް)، ކުށްތަކަށް އަރައިގަތުމާއި އާންމު ރައްކާތެރިކަން (%55 ބައިޑަން، %43 ޓްރަމްޕް) ހިމެނެއެވެ.
ވޯޓު ލާނެކަމަށް ބެލެވޭ މީހުންގެ ތެރެއިން ހަމަހަމަަ ގޮތެއްގައި ދެ ކެނޑިޑޭޓުންގެ މެދުގައި ބެހިގެން ދިޔައީ އެމެރިކާގެ އިޤްތިޞާދު އެންމެ ރަގަޅަށް ބަލަހައްޓާނެކަމަށް ބެލެވޭ ކެނޑިޑޭޓަކާމެދުއެވެ. މިގޮތުން %50 މީހުން ގަބޫލު ކުރާގޮތުގައި އެމެރިކާގެ އިޤްތިޞާދު ކުރިއަރާނީ ބައިޑަން އިންތިޚާބު ކުރެވިގެންނެވެ. %48 މީހުން ގަބޫލު ކުރާގޮތުގައި ޓްރަމްޕް އިންތިޚާބު ކާމިޔާބު ކޮށްފިނަމަ އެމެރިކާގެ އިޤްތިޞާދު ރަގަޅުވާނެއެވެ.
އެމެރިކާގެ ރިޔާސީ ނިޒާމު ހަމަޖެހިފަ އޮންނަ ގޮތުން އިންތިޚާބު ކާމިޔާބު ކުރާ ކެނޑިޑޭޓަކު ކަނޑައެޅިގެން ދަނީ ވޯޓު ލާމީހުންގެ އަދަދުން ކުރި ހޯދާ ކެނޑިޑޭޓެއް ނޫނެވެ. މީގެ އިތުރަށް އިންތިޚާބު ކާމިޔާބު ވާނީ ސްޓޭޓުތަކުގަ ވޯޓުލާ މީހުންގެ ނިސްބަތުން ކުރިހޯދާ، ގިނަ ސްޓޭޓްތައް ކާމިޔާބު ކުރާ ކެނޑިޑޭޓެކެވެ. މިގޮތުން އެކި ސްޓޭޓްތަކަށް ކަޑައެޅިފައިވާ އިލެކްޓޯރަލް ކޮލެޖްތައް އެއްކޮށްލުމުން ބޮޑެތި ބައެއް ސްޓޭޓްތައް ކާމިޔާބުކުރާ ކެނޑިޑޭޓަކަށް އިންތިޚާބު ކާމިޔާބު ކުރުމުގެ ފުރުސަތު ބޮޑު ވެގެން ދެއެވެ. މިގޮތުން މިހާރުގެ ޚިޔާލު ހޯދުމުގެ ސާވޭތަކުން ޑިމޮކްރަޓިކް ކެނޑިޑޭޓް ބައިޑަން ކުރީގަ އުޅުއްވި ނަމަވެސް، ސްޓޭޓްތަކުގެ ނިސްބަތުން މިތަފާތު ކުޑަކަން ފާހަގަ ކޮށްލެވެއެވެ. އަދި ބޮޑެތި ބައެއް ސްޓޭޓްތައް ބައިޑަންއަށް ކާމިޔާބު ކުރެވޭނެކަމަށް ދައްކަނީ ކުޑަތަފާތަކުންނެވެ. އެހެންކަމުން މިހާރުގެ ސާވޭތަކުގެ ނަތީޖާތަކަކީ އިންތިޚާބު ކާމިޔާބު ކުރާނެ ކެނޑީޑޭޓެއް ކަޑައަޅާ ސާވޭތަކެއްގެ ބަދަލުގައި ބެލެވިގެން ދަނީ މި ސާވޭތަކަކީ ކެނޑިޑޭޓުންގެ ތާއީދު މިވަގު ހުރިގޮތް ދައްކުވައިދޭ ތަފާސް ހިސާބެއްގެ ގޮތުގައެވެ.
