ދިވެހިރާއްޖޭގައި ގައިދީންނަށް އަނިޔާކުރާ ކަމުގެ ވާހަކަތަކާއި، ފުލުހުންނާއި ޖަލު ބަލަހައްޓާ ފަރާތްތަކުގެ އިހުމާލުން ގައިދީން މަރުވެފައިވާކަމުގެ ވާހަކަތަކަކީ އާ ވާހަކަތަކެއް ނޫނެވެ. އެއީ މީގެ އެތައް އަބހަރެއް ކުރީއްސުރެ އިވި، އަދި އޭގެ ހެކިތައްއްވެސް އެތައްގޮތަކުން ފެންނާންހުރި، ވަރަށްވެސް ބޮޑު ހަގީގަތެއް ކަމުގައި ދަންނަވާން ޖެހެއެވެ.
އެހެންނަމަވެސް، 2003 ވަނަ އަހަރު، ޖަލުގައި އަނިޔާކުރުމުގެ ސަބަބުން މަރުވި އީވާން ނަސީމުގެ މަރުގެ ހާދިސާއަށްފަހު މާލޭގައި ހިގައިދިޔަ ހަމަނުޖެހުންތަކާއި، އަދި އެއަށްފަހު ގައިދީންނަށް ކުރާ އަނިޔާތަކާއި ދެކޮޅަށް، އާންމު ރައްޔިތުންނާއި ހައްގުތަކަށް ވަކާލާތުކުރާ ފަރާތްތަކުން އުފުލި އަޑު އުފުލުންތަކަށްފަހު، އާ ގާނޫނު އަސާސީން ގެނެވުނު އިސްލާހީ ބަދަލުތަކާއެކު، ގައިދީންނަށްވެސް ހައްގުތައް ކަށަވަރު ވެގެން ދިއުމުގައިވެސް ބޮޑެތި ކުރިއެރުންތަކެއް އައިތަން ފާއިތުވެދިޔަ 15 ވަރަކަށް އަހަރުދުވަހުގެ ތެރޭގައިވަނީ ފެނިގެން ގޮސްފައެވެ.
މިގޮތުން، މި ދެންނެވުނު މުއްދަތުގައި ފުލުހުންގެ މުވައްސަސާއަށް އައިސްފައިވާ ބޮޑެތި ކުރިއެރުންތަކާއި، އަދި ކުރިއެރުންތަކާއެކު އެ މުވައްސަސާގެ ޕްރޮފެޝަނަލިޒަމްވެސް އެތައް ގުނައަކުން ކުރިއަރައިގެން ގޮސްފައިވާކަމީވެސް ގަބޫލުކުރާންޖެހޭ ވަރަށްވެސް ބޮޑު ހަގީގަތެކެވެ.
އެހެންނަމަވެސް، އެތައް ޒަމާނަކުއްސުރެ، މީހުން ހައްޔަރު ކުރުމާއި ތަހުގީގީ މަރުހަލާތަކުގައި އަށަގެންފައިވާ، އަނިޔާކުރުމާއި އިހުމާލުވުމުގެ ސަގަފާތު ފިލައިގެން އަދިވެސް މުޅިން ނައްތާލެވިފައި ނުވާކަން ސާބިތުވެގެން ދަނީ، ފުލުހުންގެ ތަހުގީގުތަކާއި ގުޅުންހުރި، އަދި އޭގެ އިތުރުން ބަންދުގައި ތިބޭ ފަރާތްތަކާމެދު އަމަލްކުރެވެމުންދާކަމަށް ފެންނާންހުރި އެތައް ހަގީގަތަކުންނެވެ.
މީގެތެރެއިން އެންމެ ފަހުން ހިގައިދިޔައީ، މަސްތުވާތަކެތީގެ ތުހުމަތުގައި ފުލުހުން އެންމެ ފަހުން ހަޔަރުކުރި، ގދ. ހޯޑެއްދޫ އަބުދުﷲ ރަޝީދުގެ މަރުގެ ހާދިސާއެވެ. މީޑިއާތަކުން އެގެންހުރި މައުލޫމާތުތަކުންނާއި، އަދި އާއިލާއިން މިހާތަނަށް ދައްކާފައިހުރި ވާހަކަތަކަށް ބަލާއިރު އަބުދުﷲ ރަޝީދު ނިޔާވެފައިވަނީ، އޭނާ ފުލުހުންގެ ބެލުމުގެ ދަށަށް ގެންދެވުމަށްފަހު، އޭނާގެ މެއަށް ތަދުވާކަމަށް ޝަކުވާ ކުރަމުންދާތާ 2 ގަޑިއެއްހާއިރު ފަހުންނެވެ.
ރަޝީދުގެ އާއިލާއިން މީޑިއާތަކަށް މައުލޫމާތު ދީފައިވާ ގޮތުގައި އޭނާ ނިޔާވެގެން ދިޔައީ، މެއަށް ތަދުވާކަމަށް ބުނެ އޭނާ ކުރަމުން ދިޔަ ޝަކުވާތަކަށް ފުލުހުން އިހުމާލުވުމުގެ ސަބަބުންނެވެ. މިހާތަނަށް އެގެން ހުރި މައުލޫމާތުތަކަށް ބަލާއިރު، ފުލުހުންގެ ބެލުމުގެ ދަށުގައި އޭނާ ހުއްޓާ ކުރަމުން ދިޔަޝަކުވާތަކަށް ފުލުހުން އެކަށިގެންވާ ސަމާލުކަމެއް ދީފައި ނުވާއިރު، އޭނާ "ފޭކު" ޖައްސާކަމަށްވެސް ފުލުހުން ބުނެފައި ވެއެވެ.
އެހެންނަމަވެސް މިއީ އަދި އެއްވެސް ތަހުގީގެއްގެ މައްޗަށް މިހާތަނަށް ކުރެވިފައިވާ ތުހުމަތުތަކަކަށް ނުވާތީ، މި މައްސަލާއިގެ ފުރިހަމަ ތަހުގީގެއްގެ މުހިންމުކަން ވަނީ ވަރަށްވެސް ބޮޑު ވެގެން ގޮސްފައެވެ.
އާއިލާއިން ޕޯސްޓު މޯޓަމް ހެދުމާއި ދެކޮޅު، މައްސަލަ ކޯޓަށް!
ފުލުހުންގެ ހައްޔަރުގައި ހުއްޓާ އަބުދުﷲ ރަޝީދު ނިޔާވުމުގައި ފުލުހުންގެ އިހުމާލު އޮތްކަމަށް އާއިލާއިން ކުރަމުންދާ ތުހުމަތުތަކާއި ގުޅިގެން، ފުލުހުންގެ ފަރާތުން ވިދާޅުވެފައިވަނީ، އެއްވެސް ނުފޫޒެއް ނެތި މިމައްސަލަ ތަހުގީގު ކުރާނެކަމަށެވެ. އަދި އޭގެ އިތުރުން ރައީސުލްޖުމުހޫރިއްޔާވެސް ވަނީ، މިމައްސަލަ އެއްވެސް ނުފޫޒެއްނެތި ތަހުގީގު ކުރުމަށް އަންގަވާފައެވެ.
މިގޮތުން ފުލުހުންގެ ނުފޫޒެއް ނެތި މައްސަލަ ތަހުގީގު ކުރުމަށްޓަކާ، މި ތަހުގީގު މިހާރު ކުރިޔަށް ގެންދަނީ ނޭޝަނަލް އިންޓެގްރިޓީ ކޮމިޝަނުންނެވެ. އެހެންނަމަވެސް، ރަޝީދުގެ މަރުގެ މައްސަލާގައި އޭނާ ހައްޔަރުކުރި ފުލުހުންގެ މައްޗަށް ކުރެވިފައިވާ ތުހުމަތުތަކާއެކު، މިމައްސަލާގައި ވަށައިގެންހުރި ކަންކަމުގެ މައްޗަށް، ނޭޝަނަލް އިންޓެގްރިޓީ ކޮމިޝަނުން މިހާރު ހިންގަމުންދާ ތަހުގީގުގައި، އޭނާގެ ހަށިގަޑުގެ ޕޯސްޓް މޯޓަމެއް ހެދުމަށް އެކޮމިޝަނުން ނިންމާފައިވި ނަމަވެސް، އަބުދުﷲ ރަޝީދުގެ ޕޯސްޓު މޯޓަމް ހެދުމަށް އާއިލާއިން ދަނީ ދެކޮޅު ހަދަމުންނެވެ.
އާއިލާގެ ފަރާތުން، އަބުދުﷲ ރަޝީދުގެ އަންހެން ދަރިފުޅު މީޑިއާތަކާއި ވާހަކަދައްކަމުން ބުނެފައިވަނީ، ޕޯސްޓްމޯޓަމް ހެދުމަކުން ފުލުހުން އޭނާއާމެދު ވީ އިހުމާލެއް ނޭގޭނެ ކަމަށާއި، އެހެންކަމުން ޕޯސްޓު މޯޓަމް ހެދުމުގެ ބޭނުމެއް އޮތްކަމަށް އޭނާގެ އާއިލާއިން ނުދެކޭ ކަމުގައެވެ. އެހެންނަމަވެސް ގާނޫނުން ލިބިގެންވާ ބާރުގެ ބޭނުން ކޮށްގެން ރަޝީދުގެ ޕޯސްޓު މޯޓަމް ހެދުމަށް ނިންމާފައިވާކަން އާއިލާއަށް ފުލުހުން އަންގަމުންދާ ކަމުގައިވެސް އާއިލާގެ ފަރާތުން މީޑިއާއަށް މައުލޫމާތު ދީފައި ވެއެވެ.
އަދި އާއިލާއިން ބޭނުންނުވި ނަމަވެސް ތަހުގީގުގެ ބޭނުމަށް، ކަނޑައެޅިފައިވާ އިޖުރާއަތުގެ ތެރެއިން ޕޯސްޓްމޯޓަމް ހަދަން ނިންމާފައިވާކަމަށް ނޭޝަނަލް އިންޓަރ ގްރިޓީ ކޮމިޝަން (އެންއައިސީ)ން ފަހުންވަނީ ބުނެފައެވެ. އެއަށްފަހ،ު ނޭޝަނަލް އިންޓަރ ގްރިޓީ ކޮމިޝަން (އެންއައިސީ)ން ހަދަން ނިންމާފައިވާ ޕޯސްޓްމޯޓަމް މިމަހުގެ 31 ގެ ކުރިން ހަދަން ބޭނުންވާކަމަށް ޕީޖީ އޮފީހުން ވަނީ ބުނެފައެވެ.
ފުލުހުންގެ ޚިދުމަތުގެ ޤާނޫނުގެ 97 ވަނަ މާއްދާގައި ބުނެފައިވަނީ އެހެން ޤާނޫނެއްގައި އެހެން ގޮތަކަށް ބަޔާންކޮށްފައިނުވާހާ ހިނދަކު، ހިނގަމުންދާ ކުށުގެ ތަޙްޤީޤުގެ ބޭނުމަށް ކޯޓު އަމުރެއްގެ ދަށުން މައްޔިތެއްގެ ހަށިގަނޑުގެ ތަޙްލީލުކުރުމުގެ ނުވަތަ އޮޓޮޕްސީ ހެދުމުގެ ބާރު ފުލުހުންނަށް ލިބިގެން ވާކަމުގައެވެ.
އަދި މައްޔިތެއްގެ ވަޅުލާފައިވާ ހަށިގަނޑު ތަޙްލީލުކުރުމަށް ނުވަތަ އޮޓޮޕްސީ ހެދުމަށް ނެގުން މުހިންމުކަމަށް ފެނިގެން އެ ހަށިގަނޑު ނުވަތަ އެވަގުތަކު ފެންނަންއޮތް އެ ހަށިގަނޑުގެ ބައެއް ނުވަތަ ބައިތަކެއް ކޯޓު އަމުރެއްގެ ދަށުން ނެގުމުގެ ބާރު ފުލުހުންނަށް ލިބިގެންވާކަމަށްވެސް އެ ގާނޫނުގައި ބުނެފައިވެއެވެ.
ނޭޝަނަލް އިންޓަރ ގްރިޓީ ކޮމިޝަން (އެންއައިސީ)އިން ހާމަ ކޮށްފައިވާ ގޮތުގައި، މިމައްސަލަ ތަހުގީގު ކުރަމުންދަނީ ޖިނާއީ އިޖުރާތު ޤާނޫނުގެ 76 ވަނަ މާއްދާގެ (ށ)ގެ (2) ވަނަ ނަންބަރުގެ ދަށުން ފުލުހުންނާއި އެކީގައި ގުޅިގެން ހިންގާ ތަހުގީގެއްގެ ގޮތުގައިކަމަށެވެ. މައްސަލައިގެ ތަހުގީގް ކުރިއަށްދާއިރު ތަހުގީގް ކުރުމުގައި ލީޑިން އިންވެސްޓިގޭޓަރުންގެ ދައުރު އަދާކުރާނީ ކޮމިޝަންގެ ފަރާތުން ކަމަށެވެ.
އެހެންނަމަވެ ރަޝީދުގެ ހަށިގަޑު، ޕޯސްޓަމް ނުހަދާ އާއިލާއާއި ހަވާލުކުރުމަށް ފުލުހުން ދެކޮޅު ހަދަމުން ދަނިކޮށްވެސް ފުލުހުން ރަޝީދުގެ ޕޮސްޓުމޯޓަމް ހެދުމަށް ނިންމުމާއި ގުޅިގެން ރަޝީދުގެ އާއިލާއިން މިހާރުވަނީ ސިވިލް ކޯޓަށް މައްސަލަ ހުށަހަޅާފައެވެ. ކޯޓުގައި ވަކާލާތު ކުރަމުން ރަޝީދުގެ އާއިލާގެ ވަކީލުން ވިދާޅުވެފައިވަނީ ފުލުހުން ރަޝީދުގެ ޕޯސްޓު-މޯޓަމް ހެދުމަށް މަސައްކަތް ކުރަމުންދަނީ ޖީނާއީ ބޮޑު އެހެން މައްސަލައަކާއި ގުޅުވައިގެން ކަމަށާއި، އެހެން މައްސަލައަކާ ގުޅުވައިގެން ޕޯސްޓް-މޯޓަމް ނުހެދޭނެ ކަމަށެވެ.
ކޯޓުން މިހާރުވަނީ މިމައްސަލާގެ އަޑުއެހުންތައް ނިންމާލާ ހުކުމް ކުރުމަށް ތައްޔާރު ވެފައެވެ.
އިންސާފާއި ހަމައަށް ވާސިލްވުމަށް ހުރަހަކަށް ވެދާނެ!
ފުލުހުންގެ ބެލުމުގެ ދަށުގައި ހުއްޓާ އަބުދުﷲ ރަޝީދު ނިޔާވި މައްސަލައަކީ އެކަމުގައި ފުލުހުން ޒިންމާ އޮންނާނޭ ކަމަކަށް ވެގެންދިޔަ ނަމަވެސް، އެއީ ފުރިހަމަ ތަހުގީގެއް ހިންގާންޖެހޭ މައްސަލައެއްކަމީވެސް ގަބޫލު ކުރާންޖެހޭ ހަގީގަތެކެވެ. ސަބަބަބަކީ، މިފަދަ ހައްސާސީ މައްސަލައެއްގައި ހިންގޭ ތަހުގީގު ފުރިހަމަ ނުކުރެވިއްޖެނަމަ، އިންސާފު ހޯދުމަށް އާއިލާއިން ކުރާ މަސައްކަތްތަކުގެ ހުރަހަކަށް ތަހުގީގުން ސާބިތު ނުކުރެވޭ ކަންކަން ވެގެން ހިގައިދާނެތީވެސްމެއެވެ.
އެހެންނަމަވެސް، ފާހަގަ ކޮށްލާންޖެހޭ އެެއް ނުކުތާއަކީ، އަބުދުﷲ ރަޝީދުގެ ޕޯސްޓު މޯޓަމް ހެދުމަށް އާއިލާއިން ދެކޮޅު ހަދާ އެއް ސަބަބަކީ، ޕޯސްޓު-މޯޓަމް ހެދުމަކުން، އިންސާފު ހޯދުމަށް އާއިލާއިން ކުރާ މަސައްކަތަތަކަށް ލިބިދޭނެ އިތުރު ބާރެއް ނެތިފަ، އެފަދަ ހާލަތެއްގައި ފުލުހުން ވީކަމަށް އާއިލާއިން ބުނާ އިހުމާލުވެސް ޕޯސްޓު-މޯޓަމް ހަދައިގެން ސާބިތު ކުރެވެން ނޯންނާނެތީއެވެ.
އެހެންނަމަވެސް، މަރުވެފައިވާ މައްޔިތެއްގެ ޕޯސްޓް މޯޓަމް ހެދުމަކީ، މީހެއްގެ މަރުގެ އަސްލާއި ހަމައަށް ވާސިލްވުމާއި، އަދި އެފަދަ މަރަކާއި ގުޅިގެން ކުރެވޭ ތަހުގީގަށް އެތައް ގޮތަކުން މުހިންމު ތަހުލީލަކަށް ވެގެންދާނެ ކަމީ ކަށަވަރުވެ ޔަގީންވާ ކަމެކެވެ. އެއީ އެ ތަހުލީލު ނުކޮށްފިނަމަ ދެން އުފެދޭ ސުވާލުތަކާއި ކުރެވޭ ބަހުސްތަކަކީ ދުވަހަކުވެސް އެއަށް ޖަވާބު ނުލިބި ދިއުމުގެ ފުރުސަތު އޮތް ކަމެއްކަމުގައި ވާތީއެވެ. އަދި މަރުވާން މެދުވެރިވީ ސަބަބުތައް ކަށަވަރުވެގެން ދިއުމަކީ، ފުލުހުން ވެފައިވާކަމަށް ބުނާ އިހުމާލުތަކަށްވެސް ބާރު ލިއްބައިދޭނެ ކަންކަމަށް ވެގެންދާއިރު، މިފަދަ ތަހުގީގަކަށް ޕޯސްޓު-މޯޓަމެއްގެ މުހިންމުކަން އިންތިހާއަށް އޮންނާނޭ ކަމުގައިވެސް ގަބޫލުކުރާން ޖެހެއެވެ.
އެހެންނަަމަވެސް ރާއްޖޭގައި އާންމުކޮށް ކަންހިގަމުންދާ އުސޫލުން، މިފަދަ ކޮންމެ ހާދިސާއެއް ހިގައިދިއުމާއެކު، ސިޔާސީ މީހުންގެ ދައުރު މިކަންކަމުގައި ބޮޑުވެ، މިފަދަ ކޮންމެ މައްސަލައެއްގެ ތެރެއަށް ސިޔާސީ މީހުން އޮންނަނީ އަތް ބާނާފައެވެ. މިހަގީގަތް މިގޮތުގައި އޮތްނަމަވެސް، މިމައްސަލާގައި ހުރިހާ ފަރާތްތަކުންވެސް، ނިޔާވެފައިވާ ރަޝީދުގެ އާއިލާގެ މަސްލަހަތު އިސްކޮށް، އެއާއިލާގެ ވޭނާ ކެކުޅުންތައް ދެނެގަނެ، އެއާއިލާއަށް އިންސާފު ހޯދާ ދިނުމަކީ އެހެން ހުރިހާ މަސްލަހަތެއްގެ މައްޗަށް އިސްކުރާންޖެހިފައިވާ މަސްލަހަތު ކަމުގައި ދަންނަވާން ޖެހެއެވެ.
