ކުރީގެ ރައީސް ޔާމީނަށް ވެރިކަން ގެއްލި، 19 ވަނަ ރައްޔިތުންގެ މަޖިލީހުގެ މަދު ގޮޑިތަކެއް ލިބިގެންދިޔައީ ވެރިކަމުގައި އަނިޔާއާއި، ވައްކަން އިސްކުރުމުން ކަމުގައި އެންވާރުމަންޓް މިނިސްޓްރީގެ ސްޓޭޓް މިނިސްޓަރ ޙަސަން މުޣުނީ، ވިދާޅުވެއްޖެއެވެ.
ނ.އަތޮޅަށް ރައީސް ޔާމީން ކުރެއްވި ދަތުރުފުޅުގައި މަނަދޫއަށް ވަޑައިގެން ޕީޕީއެމްގެ ސަޕޯޓަރުންނާ ބައްދަލުކުރައްވައި ޔާމީން ވިދާޅުވީ, މަޖިލިސް އިންތިހާބުގައި ޕީޕީއެމުން ވާދަނުކޮށް ޖުމްހޫރީ ޕާޓީއަށާއި އެމްޑީއޭއަށް ގޮނޑިތަކެއް ދޫކޮށްލުމުން އެކަމުގެ ހިތި ތަހައްމަލު ކުރަމުންދާ ކަމަށެވެ. ޔާމީން ވިދާޅުވީ ބައެއް ދާއިރާތައް ޖުމްހޫރީ ޕާޓީއަށް ދޫކޮށްލި ނަމަވެސް އޭގެން އެއްވެސް ގޮނޑިއެއް އެ ޕާޓީއަށް ކާމިޔާބު ނުކުރެވުނު ކަމަށެވެ. އެއީ ރައްޔިތުންގެ ހެޔޮ ވިސްނުމުން ޖުމްހޫރީ ޕާޓީއަށް ކުރިމަތިވި ނާކާމިޔާބީއެއް ކަމަށްވެސް ވިދާޅުވިއެވެ.
ޔާމީންގެ ވާހަކަތަކާއި ގުޅިގެން މުޣުނީ ވިދާޅުވީ ރައީސް ޔާމީނަށް 2018 ވަނަ އަހަރުގެ ރިޔާސީ އިންތިޚާބުގައި ކުރިމަތިވި އެންމެބޮޑު ބައްޔަކީ ވެރިކަމުގައި ވައްކަމާއި އަނިޔާވެރިކަން އިންތިހާއަށް އިސްކުރުންކަމަށެވެ. އަދި ވެރިކަން ލިބިފައިވަނީ އެތައްބައެއްގެ މަސްކަތުންކަން ރައީސް ޔާމީން ހަނދުމަނެތީތޯ މުޣުނީ ވަނީ ސުވާލު ކުރައްވާފައެވެ. އޭނާ ވިދާޅުވީ 2013 ވަނަ އަަހަރުގެ އިންތިޚާބުގައި ރައީސްކަން ލިބިވަޑައިގަތީ ޖުމްހޫރީ ޕާޓީގެ ލީޑަރާއި ސިޔާސީ އެތައް ބޭފުޅުންގެ މަސައްކަތުންކަމަށެވެ. އެހެން ނޫންނަމަ މިއަދުވެސް ޔާމީން ހުންނަވާނީ 3،000 މެމްބަރުން ހަމަނުވާ ޕީއޭގައިކަމަށެވެ.
ޔާމީންއެވެ. މަނިކުފާނު ވެރިކަމުން އަދި ޕީޕީއެމް މަޖިލިސް އިން ފެއިލްވެ ހިތިކަން ލިބުނީ މަނިކުފާނުގެ ވެރިކަމުގައި އަނިޔާއާއި، ވައްކަން އިސްކުރީމައެވެ. މަނިކުފާނަށް 2013ގައި ފުރަތަމަ ބުރުގައި ރައީސް މައުމޫންގެ ފޮޓޯ ވިއްކައިގެން ލިބުނީ ކިތައް ވޯޓުތޯއެވެ. އޮނަރަބަލް ޤާސިމް އިބްރާހިމް އަދި ޖީޕީގެ ސަޕޯޓް ނުލިބުނު ނަމަ ރައީސްކަން ވެސް އަދި ޕީޕީއެމްވެސް ނުލިބި ހުންނަވާނީ ތި ރުޅި މޫނުފުޅާއިއެއްކޮށް 3،000 ހަމަ ނުވާ ޕީއޭގައި ނޫންތޯއެވެ. ބޮޑާ ދޮގުބަސް ވިދާޅުނުވެ ވިސްނަވާށެވެ.
– މުޣުނީ ވިދާޅުވިއެވެ.
ކުރިއަށް އޮތް ރިޔާސީ އިންތިޚާބުގައި އިދިކޮޅު ކެނޑިޑޭޓަކީ ރައީސް ޔާމީންކަމަށް ނިންމާފައިވާއިރު އެމަނިކުފާނު ވިދާޅުވެފައިވަނީ އެއްވެސް އިންތިޚާބެއްގައި އިތުރުގޮތެއް ނެތިގެން ނޫންނީ ކޯލިޝަން ނަހަދާނެކަމަށެވެ. ނަމަވެސް ކުރިއަށް އޮތް ރިޔާސީ އިންތިޚާބުގައި ކޯލިޝަން ހަދަން ޖެހިއްޖެނަމަ އެކަން ކުރާނެކަމުގެ އިޝާރާތެއްވެސް ރައީސް ޔަމީން ވަނީ ދެއްވާފައެވެ.
ކޮމެންޓު ފޮނުވާ