ދުނިޔޭގެ އެންމެ ނުފޫޒުގަދަ ސޯޝަލް މީޑިއާ ޕްލެޓްފޯމު ކަމުގައިވާ ޓުވިޓަރ ގަތުމަށް އެންމެ ފުރަތަމަ ހިންގި މުއާމަލާތް ފުރިހަމަކޮށް، ދުނިޔޭގަ މިވަގުތުހުރި އެންމެ މުއްސަދި މަހުޖަނު ޓުވިޓަރ ގަނެފިއެވެ.
ޓުވިޓަރ ގަތުމަށް ހިންގި މުއާމަލާތް ނިނުމުމަށްފަހު މަސްކު ކުރި ޓވީޓުގައި ލިޔުއްވާފައިވަނީ “ދޫނި މިނިވަން ކޮށްފިން“ މިހެންނެވެ. ޓުވިޓަރގެ މުއާމަލާތް ނިންމިކަން އެންގުމަށް އޭނާ ކޮށްފައިވާ ޓުވީޓުގައި އިޝާރާތް ކޮށްފައިވަނީ ޓުވިޓަރ ލޯގޯގައި އިންނަ ދޫންޏަށެވެ.
the bird is freed
— Elon Musk (@elonmusk) October 28, 2022
މީޑިއާތަކުން ރިޕޯޓު ކޮށްފައި ވާގޮތުގައި ޓުވިޓަރ ގަތުމަށްފަހު އޭނާވަނީ ޓުވިޓަރގެ އިސްފަރާތް ކަމުގައިވާ ޕަރަގް އަގްރަވާލް ހިމެނޭ ގިނަ އިސްވެރިން މަގާމުން ދުރު ކޮށްފައެވެ.
ޓުވިޓަރއިން މަސްކު އެ ކުންފުނި ގަތްކަން ރަސްމީކޮށް ހާމަ ނުކުރިނަމަވެސް އެކުންފުނީގައި ކުރިން ހިމެނުނު ބައެއް އިސްވެރިންވަނީ ބައިނަލްއަގުވާމީ ބައެއް މީޑިއާތަކަށް މަސް މިހާރު ޓުވިޓަރ ގަނެފައިވާކަން ޔަގީން ކޮށްދީފައެވެ.
ޓުވިޓަރގެ މެނޭޖްމަންޓުން އެ ޕްލެޓްފޯމުގެ ފޭކް އަދި ސްޕޭން އެކައުންޓުތަކުގެ ފުރިހަމަ މައުލޫމާތު ދީފައި ނުވާކަމަަށް ވިދާޅުވެ، ޓުވިޓަރ ގަތުމަށް ވެފައިވާ 44 ބިލިއަން ޑޮލަރުގެ ޑީލް މަސްކު ދޫކޮށްލުމުން، ޓުވިޓައިން ކޯޓަށް ގޮސްފައިވަނިކޮށް، ވިސްނުން ބަދަލުކޮށް، ކުރިންވެސް ހުށަހެޅުއްވި އަގަށް ޓުވިޓަރ ގަންނަން ބޭނުންވާ ކަމުގައި، މަސްކު ފަހުންވަނީ ވިދާޅުވެފައެވެ.
މަސްކު ޓުވިޓަރ ގަތުމަށް ފަހުންވެސް ހުށަހެޅުއްވީ ކުރިންވެސް ހުށަހެޅުއްވި އަގު ކަމުގައިވާ ހިއްސާއަކަށް 54.20 އެމެރިކާ ޑޮލަރުގެ މަގުންނެވެ.
ޓެލްސާ އަދި ސްޕޭސްއެކްސް ކުންފުނީގެ ސީއީއޯ މަސްކު އެންމެ ފުރަތަމަ ޓުވިޓަރ ގަތުމަށް މިއަހަރުގެ އެޕްރިލްމަހު ހުށަހެޅުއްވި އަގަކީ ހިއްސާއަކަށް 54.20 އެމެރިކާ ޑޮލަރެވެ. އެއީ ޖުމްލަ 44 ބިލިއަން އެމެރިކާ ޑޮލަރެވެ. އެހެންނަމަވެސް އޭނާ ފަހުން ވިދާޅުވެފައިވަނީ، ޓުވިޓަރ ކުންފުނިން، އެ ޕްލެޓްފޯމުގައިވާ ސްޕޭމް (އަސްލު ނޫން) އެކައުންޓުތަކުގެ އަދަދާއި ގުޅޭގޮތުން އޭނާއަށް އޮޅުވާލާފައިވާ ކަމުގައެވެ. އަދި އޭނާ ހުށަހެޅުއްވުމާއިގެން ކުރިޔަށް ވަޑައި ގަންނަވަން ބޭނުންފުޅު ނުވާކަމުގައި ފަހުން އޭނާ ވިދާޅުވެފައި ވެއެވެ.
މަސްކުގެ ނިންމުމާމެދު ހިންހަމަ ނުޖެހިގެން މިއަހަރުގެ ޖުލައިމަހު ޓުވިޓަރއިން ވަނީ އެމެރިކާގެ ޑެލާވަރ ކޯޓް އޮފް ޗާންސެރީއަށް މައްސަލަ ހުށަހަޅާފައެވެ. މި މައްސަލާއިގެ ފުރަތަމަ އަޑުއެހުން ކޯޓުން ބޭވުމަށް ހަމަޖައްސާފައިވަނީ މިމަހުގެ 17ވަނަ ދުވަހުއެވެ.
މަސްކުއާއި ޓުވިޓަރއާ ދެމެދު ހަދާފައިވާ އެގްރީމަންޓުގައި ވާގޮތުން، ދެފަރާތުންކުރެ އެއްވެސް ފަރާތަކުން މި މުއާމަލާތް ހުއްޓުމަކަށް ގެނެސްފިނަމަ، އެފަރާތަކުން އަނެއްފަރާތަށް ޓާރމިނޭޝަން ފީއެއްގެ ގޮތުގައި 1 ބިލިއަން އެމެރިކާ ޑޮލަރު ދައްކަން ޖެހޭނެއެވެ.
ޓުވިޓަރއިން ސެކިއުރިޓީސް އެންޑް އެކްސްޗޭންޖް ކޮމިޝަންއަށް ހުށަހަޅާފައިވާ ލިޔެކިޔުންތަކުން އެގެން ހުރި ގޮތުގައި، މަސްކުގެ ފަރާތުން މި ހަފްތާގެ ހޯމަދުވަހު ފޮނުވާފައިވާ ސިޓީގައި ވާގޮތުން ޓުވިޓަރއިން ކޯޓަށް ހުށަހަޅާފައިވާ މައްސަލަ އިތުރަށް ކުރިޔަށް ނުގެންދާނަމަ އޭނާ ބޭނުންވަނީ އެންމެ ފުރަތަމަ އެއްބަސްވި އަގަށް ޓުވިޓަރ ގަތުމަށެވެ.
މި އަހަރުގެ ސެޕްޓެމްބަރުމަހު ޓުވިޓަރގެ މެޖޯރިޓީ ޝެއަރހޯލްޑަރުން ވޯޓު ދީގެން ނިންމާފައިވަނީ ކުންފުނި ގަތުމަށް މަސްކު ހުށަހަޅާފައިވާ ހުށަހެޅުން ބަލައިގަތުމަށެވެ. މި ޑީލްއަކީ ކުންފުނީގެ ހިއްސާތައް މިހާރު ޓްރޭޑް ކުރެވޭ އަގަށްވުރެ މާ ބޮޑަށްވެސް ރަގަޅު އަގެކެވެ.
ބައެއް ފަރާތްތަކުން ވިދާޅުވާ ގޮތުގައި އެންމެ ފުރަތަމަވެސް ހުށަހެޅުއްވި ހުށަހަޅުވުމާއެކު ކުރިޔަށް ވަޑައިގަތުމަށް މަސްކު ނިންމެވީ ޓުވިޓަރގެ ބޯޑުން ކޯޓަށް ހުށަހެޅި މައްސަލަ އޭނާއަށް ކާމިޔާބު ނުވާނެކަން ޔަގީވެ ވަޑައިގަތުމުންނެވެ.
ފޯބްސް މެގަޒިންއިން ހާމަކޮށްފައިވާ ގޮތުގައި، އަމިއްލަ ބައިތުލްމާލުގައި 219 އެމެރިކާ ޑޮލަހުރި އެލޮން މަސްކުއަކީ މިހާރު ދުނިޔޭގައި ހުރި އެންމެ މުއްސަދި މަހުޖަނެވެ.
ކޮމެންޓު ފޮނުވާ