"ފޯން ބޫތު" ގައި ބަތަލާ ކެޓްރީނާ ކައިފް ފެންނާނީ ޑަބަލް ރޯލަކުން ކަމަށް މުނިފޫހި ފިލުވުމުގެ ޚަބަރުތައް ގެނެސްދޭ ނޫސްތަކުން ރިޕޯޓް ކޮށްފިއެވެ.
އަންނަ މަހުގެ 4 ގައި ސިނަމާތަކަށް ގެންނަން ހަމަޖެހިފައިވާ މި ފިލްމަކީ ފަރުހާން އަޚްތަރާއި ރިތޭޝް ސިދުވާނީގެ އެކްސެލް އެންޓައިންމަންޓަށް ގުރްމީތު ސިންގް ޑައިރެކްޓްކޮށްފައިވާ ފިލްމެކެވެ.
ފިލްމުގެ ޓްރެއިލާ އާއި ލަވައެއް މިހާރު ވަނީ ބެލުންތެރިންނަށް ދައްކާލައިފައެވެ. ނަމަވެސް ކެޓްރީނާގެ ޑަބަލް ރޯލެއް ފެންނާނެ ކަމުގެ އިޝާރާތެއް އެޔަކުން ނުފެނެއެވެ.
"ފޯން ބޫތު" ގައި ކެޓްރީނާއަކީ ޖިންނިއެކެވެ. މި ފިލްމުގައި ޑަބަލް ރޯލަކުން ކެޓްރީނާ ފެންނަ ނަމަ މިއީ ކާމިޔާބު ބަތަލާ ޑަބަލް ރޯލަކުން ފެންނާނެ ފުރަތަމަ ފަހަރަށް ވާނެއެވެ.
View this post on Instagram
ކެޓްރީނާ އާއެކުގައި ފިލްމުގެ މައިގަނޑު ކާސްޓްގައި ދެން ހިމެނެނީ ޒުވާން ދެ ތަރިންނެވެ. އެއީ ޒުވާން އެކްޓަރު އިޝާން ޚައްޓަރު އާއި ސިދާންތު ޗަތުރުވެދީއެވެ.
މިދިޔަ އަހަރުގެ ޑިސެމްބަރު 9 ގައި އެކްޓަރ ވިކީ ކޯޝަލާ ކައިވެނި ކުރިފަހުން މިއީ ސިނަމާ ތަކަށް އަންނަ ކެޓްރީނާގެ ފުރަތަމަ ފިލްމެއެވެ. އެންމެ ފަހުން ކެޓްރީނާ ފެނިގެން ގޮސްފައިވަނީ "ސޫރްޔަވަންޝީ"އިން އަކްޝޭ ކުމާރާ އެކުގައެވެ.
