ސުވިޒަރލޭންޑުގައި މޫނު ބުރުގާ އެޅުން މަނާކޮށްފައި އޮންނަ އޮތުމާއި ޚިލާފްވާ ފަރާތްތަކުން 1،000 އެމެރިކާ ޑޮލަރުން ޖޫރިމަނާ ކުރާގޮތަށް ގާނޫނު އިސްލާހު ކުރުމަށް، ގާނޫނުހަދާ މަޖިލީހަށް އެގައުމުގެ ސަރުކާރުން ހުށަހަޅައިފިއެވެ.
މިހަފްތާގެ ބުދަ ދުވަހު މިއިސްލާހު ގާނޫނުހަދާ މަޖިލީހަށް ފޮނުވާފައިވާއިރު، ފާއިތުވެދިޔަ އަހަރު އެގައުމުގައި ނެގި ފެންނަ ނުފެންނަ ވޯޓަކަށްފަހު ސުވިޒަލޭންޑުންގައި މޫނު ބުރުގާ އެޅުންވަނީ މަނާ ކޮށްފައެވެ.
"ބުރުގާ އެޅުން މަނާކުރުން" މި ނަމުގައި ކުރިޔަށް ގެންދެވުނު މި ފެންނަ ނުފެންނަ ވޯޓުގައި 51.2 އިންސައްތަ މީހުން މި ކަމަށް ތާއީދު ކުރި ނަމަވެސް، މިއީ ނަސްލީ ތަފާތުކުރުންކަމަށް ބުނެ، މި ނިންމުމަށް ގިނަ ބައެއްގެ ފާޑުކިއުންވެސް ވަނީ އަމާޒު ވެފައެވެ.
އެއަށްފަހު ސުވިޒަލޭންޑުގެ ކެބިނެޓްގައި ކުރެވުނު މަޝްވަރާތަކަށްފަހު އެގައުމުގެ ސަރުކާރުންވަނީ މޫނު ބުރުގާ އެޅުމަކީ ޖިނާއީ ކުށަކަށް ހެދުމުގެ ބަދަލު މިއީ ބޮޑު ޖޫރިމާނާއެއް އަންނަ ކުށަކަށް ހެދުމަށް ނިންމާފައެވެ.
"މޫނު ބުރުގާ އެޅުން މަނާކޮށްފައިވަނީ އާންމު މަސްލަހަތު ރައްކާތެރި ކުރުމުގެ ބޭނުމުގައި، މަގުސަދަކީ އަދަބު ދިނުމެއް ނޫން" ސުވިޒަލޭންޑުގެ ސަރުކާރުން ނެރުނު ބަޔާނެއްގައި ވިދާޅުވެފައި ވެއެވެ.
މި ބިލުގައި "ބުރުގާ" ނުވަތަ "ނިގާބު" މި ނަންތައް ބޭނުން ކޮށްފައި ނުވިނަމަވެސް، ބިލުގައި ބުނެފައިވަނީ އާންމުން އެއްވާ ތަންތަކުގައި މޫނު ނިވާކުރުމަކީ މަނާ ކަމެއް ކަމުގައެވެ. މީގެ ތެރޭގައި، އާންމު ދަތުރުފަތުރާއި، ރެސްޓޯރަންޓްތަކާއި، މަގުމަތީގައި ހިނގާއިރުވެސް އުޅެންޖެހެނީ އަނގަޔާއި، ނޭފަތާއި އަދި ލޯ ފެންނަ ގޮތަށް ބަހައްޓައިގެންނެވެ.
މިގޮތުން މުސްލިމުންނަށް ބުރުގާ އެޅުމަކީ ހުއްދަ ކަމަށްވި ނަމަވެސް، ހަމައެކަނި ލޯ ފެންނަ ގޮތަށް ހުންނަ ބުރުގާ ނުވަތަ ހެދުން އެޅުމަކީ މަނާ ކަމެކެވެ. އެހެންނަމަވެސް އަޅުކަން ކުރާ ތަންތަނުގައި މިބާވަތުގެ ހެދެން އެޅުމަކީ މަނާ ކަމެއް ނޫނެނެވެ.
އެހްނަނަމަވެސް މި ގާނޫނުގައި އިސްތިސްނާ 3 ހާލަތެއް ހިމަނާފައި ވެއެވެ. އެއީ ސެކިއުރިޓީގެ ސަބަބުތަކަށް ނުވަތަ މޫސުމީ ސަބަބުތަކާހެދި ނުވަނަ ސިއްހީ ބޭނުމަށް މޫނު ފޮރުވުން ހިމަނާފައެއް ނުވެއެވެ. އޭގެ މާނައަކީ ކޯވިޑް19 އިން ސަލާމަތް ވުމަށްޓަކާ މާސްކު އެޅުމަކީ ހުއްދަ ކަމެކެވެ.
ސުވިޒަލޭންޑުގެ އިސްލާމީ ޖަމާއަތްތަކުންވަނީ މިގާނޫނާއި ދެކޮޅު ހަދާފައެވެ. އެގައުމުގެ އާބާދީގައި މުސްލިމުންގެ ނިސްބަތަކީ އެންމެ 5 އިންސައްތައެވެ. އެއީ 8.6 މިލިއަން މީހުންނެވެ. ސުވިޒަލޭންޑުގެ އާބާދީގެ ގިނަ މުސްލިމުންނަކީ ތުރުކީ، ބޮސްނިއާ އެންޑް ހޭގޮވީނާ އަދި ކޮސޯވޯގެ ދަރިކޮޅުތަކަށް ނިސްބަތްވާ މީހުންނެވެ.
ޔުނިވަރސިޓީ އޮފް ލުސާންއިން ހެދި ދިރާސާއަކުން ދައްކާފައިވާ ގޮތުގައި ސުވިޒަލޭންޑުގެ އާބާދީގައި މޫނު ބުރުގާ އަޅަނީ އެންމެ 30 އަންހެނުންނެވެ. އަދި އެގައުމު ހިމެނިގެންދަނީ ދުނިޔޭގައި މޫނުބުރުގާ އެޅުން މަނާ ކޮށްފައިވާ 5 ގައުމުގެ ތެރޭގައެވެ. އެގައުމުތަކަކީ ފްރާންސް، ޑެންމާކު، އޮސްޓްރޭލިއާ، ނެދަރލޭންޑްސް، އަދި ބަލްގޭރިއާއެވެ.
ފްރާންސްގައި މުޅި މޫނު ފޮރުވުން 2011 ވަނަ އަހަރުން ފެށިގެން ވަނީ މަނާ ކޮށްފައެވެ. ޑެންމާކު، ނެދަރލޭންޑް އަދި ބަލްގޭރިއާގައި މޫނުން ބައެއް އަދި މުޅި މޫނު ފޮރުވޭގޮތަށްވެސް މޫނު ބުރުގާ އެޅުމަކީ މަނާކަމެކެވެ.
އެމްނެސްޓީ އިންޓަރނޭޝަނަލްއިން ބުނެފައިވަނީ މޫނު ބުރުގާ އެޅުން މަނާ ކުރުމަކީ "ނުރައްކާތެރި ސިޔާސަތެއް ކަމަށާއި، އެއީ އަންހެނުންގެ ހައްގުތަކަށް އުނިކަން ލިބޭ، ދީނީ އަދި ޚިޔާލު ފާޅުކުރުމުގެ މިނިވަކަމަށް ހުރަސްއެޅޭ" ކަމެއް ކަމުގައެވެ.
