ބޮލީވުޑް ސުޕަސްޓަރ ސަލްމާން ޚާންގެ ބޮޑީ ޑަބަލްގެ ގޮތުގައި ހަރަކާތްތެރިވަމުން އައި ސާގަރް ޕާންޑޭ ހާޓް އެޓޭކެއް ޖެހިގެން މަރުވެއްޖެއެވެ.
ސާގަރް އާއެކުގައި ނަގާފައިވާ ފޮޓޯ އަކާއެކު ސޯޝަލް މީޑިއާގައި ސަލްމާން ވަނީ މިކަމާގުޅިގެން ހިތާމަ ފާޅުކޮށްފައެވެ. ޚަބަރުތައް ބުނާގޮތުގައި ސާގަރް މަރުވީ ޖިމްގައި ކަސްރަތު ކުރަން ހުއްޓާ މިދިޔަ ހުކުރު ދުވަހުއެވެ.
ހޮސްޕިޓަލަށް ގެންދިޔައިރު ވެސް އޭނާ މަރުވެފައި ވާކަަމަށް އޭނާގެ ގާތް ރަހުމަތް ތެރިއެއް ކަމުގައިވާ، ޝާހްރުކް ޚާންގެ ބޮޑީ ޑަބަލް ގެ ގޮތުގައި މަސައްކަތް ކުރަމުން އަންނަ ޕްރަޝާންތް ވާޑޭ ވަނީ ބުނެފައެވެ.
އުމުރުން 50 އަހަރުގެ ސާގަރް ވަނި 50 އަށް ވުރެ ގިނަ ފިލްމުގައި ސަލްމާންގެ ބޮޑީ ޑަބަލް އެއްގެ ގޮތުގައި މަސައްކަތް ކޮށްފައެވެ. އެންމެ ފަހުން އޭނާ މަސައްކަތް ކުރީ ސަލްމާންގެ "ބަޖްރަންގީ ބައިޖާން" ގައިއެވެ.
ސާގަރަކީ އުއްތަރު ޕްރަދޭޝަށް ނިސްބަތް ވާ މީހެކެވެ. އޭނާ މުމްބާއީއަށް އައީ އެކްޓަރަކަށް ވުމުގެ ހުވަފެނުގައެވެ. ނަމަވެސް ފިލްމަކުން އެކްޓިންގެ ފުރުސަތު ނުލިބި އޭނާއަށް ލިބުނީ ބޮޑީ ޑަބަލް އެއްގެ ރޯލު ކުޅުމަށެވެ.
ސަލްމާންގެ ބޮޑީ ޑަބަލް އެއްގެ ގޮތުގައި އޭނާ އެންމެ ފުރަތަމަ މަސައްކަތް ކުރި ފިލްމަކީ "ކުޗް ކުޗް ހޯތާހޭ" އެވެ.
ކޮމެންޓު ފޮނުވާ