މިމަހުގެ 30 ގައި ރިލީޒް ކުރާ ބޮލީވުޑްގެ ފިލްމު "ވިކްރަމް ވޭދާ" ކުޅުމުން ދަސްވީ ބަޑިޖަން ކަމަށް ސައިފް އަލީ ޚާން ބުނެފިއެވެ.
ހަގީގީ ބަޑި ގެންގުޅޭށާއި ބަޑި ޖަހަން ދަސްވެފައިވާ ކަަމަށާއި ފިލްމު ކުޅެން އުޅުނު ދުވަސްވަރުގައި އެކަންކަން ވަރަށް ބޮޑަށް ދަސްވިކަމަށް ސައިފް ވަނީ ބުނެފައެވެ.
ބޮލީވުޑްގެ ވަރުގަދަ ދެތަރިން ކަމުގައިވާ ރިތިކް ރޯޝަނާއި ސައިފް ފެނިގެންދާ މި ފިލްމަކީ ވަރުގަދަ ތަޅާފޮޅުން ތަކެއް ފެނިގެންދާނެ އެކްޝަން ފިލްްމެކެވެ. ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ.
މިއީ މި ދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު "ނަ ތުމް ޖާނޯ ނަ ހަމް" އިން ފެނިގެން ގޮސްފައެވެ.
"ވިކްރަމް ވޭދާ" އަކީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމު އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމުވެސް ޑައިރެކްޓްކުރީ ތަމަޅަ ފިލްމުވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
