މި މަހުގެ 30 ވަނަ ދުވަހު ރިލީޒް ކުރުމަށް ރައްޔާރު ވަމުން އަންނަ ފިލްމު "ވިކްރަމް ވޭދާ" ގެ ފުރަތަމަ ލަވަ ބެލުންތެރިނަށް ދޫކޮށްލައިފިއެވެ.
ގިނަ ބަޔަކު އިންތިޒާރު ކުރަމުން އަންނަ މި ފިލްމުން އާންމު ކުރި ލަވަ އަކީ "އަލްކޮހޯލިއާ" އެވެ. މި ލަވައގައި ރިތިކްގެ ވަރުގަދަ ނެށުން ތަކެއް ހިމަނާފައިވެއެވެ. ގަނޭޝް ހެގްޅޭ ކޮރިއޯ ހަދާފައިވާ މި ލަވައިގެ މިއުޒިކްގެ އިތުރުން އަޑުގެ ވެރިންނަކީ ވެސް ވިޝާލް-ޝޭކަރެވެ. ލަވާގައި ސުނިގަޖީތު ބޯމިކްގެ އިތުރުން އަނަންޔާ ޗަކްރަވަތީ ވެސް ހިއްސާވެއެވެ.
100 އަށް ވުރެ ގިނަ ގައުމެއްގައި އެއް ދުވަހެއްގައި ޕްރީމިއާކުރަން ނިންމާފައިވާ "ވިކްރަމް ވޭދާ" ގައި ފެނިގެން ދާނީ ސައިފް އަލީ ޚާން އާއި ރިތިކް ރޯޝަނެވެ. މި ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ.
މިއީ މި ދެތަރިން އެކުގައި ފެންނަ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު "ނަ ތުމް ޖާނޯ ނަ ހަމް" އިން ފެނިގެން ގޮސްފައެވެ.
"ވިކްރަމް ވޭދާ" އަކީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމު އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމުވެސް ޑައިރެކްޓްކުރީ ތަމަޅަ ފިލްމުވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
