ބޮލީވުޑްގެ އިންޑަސްޓްރީގައި މަސައްކަތް ކުރާ ގިނަ ތަރިންތަކެއް ހިމެނޭ އާއިލާއަކަށް ނިސްބަތްވާ ޒުވާން އެކްޓަރު އިޝާން ކައްޓަރު ދިރިއުޅޭނެ އެޕާޓުމެންޓެއް ގަނެފިއެވެ.
މުމްބާއީގެ އެންމެ ހިތްފަސޭހަ ހިސާބުން، މޫދު ފެންނަ ހިސާބުގައި ހުރި އެޕާޓްމެންޓަށް މިހާރު އޭނާ ދިރިއުޅުން ބަދަލު ކޮށްފައިވާ އިރުގައި އެގޭގައި ބޭނުން ކޮށްފައިވަނީ އެންމެ ބޭނުންވާ ފަރުނިޗަރުކަމަށާއި ޑިޒައިން ކުރީވެސް އޭނާ ހިތް އެދޭ ގޮތަށް ކަމަށް އިޝާން ބުނެއެވެ.
އުމުރުން 26 އަހަރުގައި އިޝާން ފްލެޓެއް ގަނެ، އެގޭގެ ތަންތަން އޭނާ ވަނީ ދައްކައިލައިފައިއެވެ. ހިތްގައިމު މި ގޭގެ އޭނާ އެންމެ ހިތްހަމަ ޖެހޭ އެއްތަނަކީ ބެލްކަނީ ކަމަށް ވެއެވެ. އެއީ އެތާ އިންނަ އިރުގައި މޫދު ފެންނާތީ ކަމަށް އިޝާން ވަނީ ބުނެފައިއެވެ.
އިޝާން ކުރިން ދިން އިންޓަވިއުއެއްގައި ބުނެފައިވާ ގޮތުގައި އޭނާގެ އުމުރުން 16 އަހަރުވުމާ ހަމައަށް 17 ގެއަކަށް ދިރިއުޅުން ބަދަލުކުރި އެވެ.
"ބިޔޯންޑް ދަ ކްލައުޑްސް" އިން 2017 ގައި ފިލްމީ ދާއިރާއަށް ނިކުތް އިޝާން ވަނީ މިހާތަނަށް ހަތަރު ފިލްމަކުން ފެނިފަ އެވެ. އޭނާގެ ކުރިއަށް އޮތީ ކެޓްރީނާ ކައިފާ އެކު މަސައްކަތްކުރާ ފިލްމު "ފޯނު ބޫތު"އެވެ. މިއަހަރު ފިލްްމް ރިލީޒް ކުރާނެ ކަަމަށް ބެލެވެއެވެ.
ކޮމެންޓު ފޮނުވާ