މި މަހު ބޭއްވުމަށް ހަމަޖެހިފައިވާ 20 އަހަރުން ދަށުގެ އޭޝިއަން ކަޕް ކޮލިފައިންގައި ވާދަކުރާ ޒުވާން ގައުމީ ފުޓްބޯޅަ ޓީމު ސައުދީ އަރަބިއްޔާއަށް ފުރައިފިއެވެ.
މި މަހުގެ 10 ވަނަ ދުވަހު ފަށާ ކޮލިފައިން ބުރުގައި ދިވެހި ޓީމު ހިމެނޭ މެޗުތައް ކުޅޭނީ ސައުދީގައެވެ. ރާއްޖެ އާއެކު ގްރޫޕް އޭގައި ހިމެނެނީ ސައުދީ އާއި، ޗައިނާ އާއި، މިޔަންމާ އަދި އުޒްބަކިސްތާނެވެ.
ކޮލިފައިންގައި ވާދަކުރުމަށް ބުދަ ދުވަހުގެރޭ ގައުމީ ޓީމު ފުރިއިރު، ކޮލިފައިންގައި ރާއްޖޭން ކުޅޭ ފުރަތަމަ މެޗުގައި މި މަހުގެ 10 ވަނަ ދުވަހު ނުކުންނާނީ އުޒްބަކިސްތާނާ ދެކޮޅަށެވެ. އަދި ދެވަނަ މެޗުގައި މި މަހުގެ 12 ވަނަ ދުވަހު ސައުދީއާ ދެކޮޅަށް ކުޅޭއިރު، އޭގެ ދެ ދުވަސް ފަހުން ނުކުންނާނީ ޗައިނާއާ ދެކޮޅަށެވެ. އަދި ފަހު މެޗުގައި މި މަހުގެ 18 ވަނަ ދުވަހު ރާއްޖެ ނުކުންނާނީ މިޔަންމާއާ ދެކޮޅަށެވެ.
ކޮލިފައިންއަށް ފުރުމުގެ ކުރިން މީޑިއާތަކަށް ދިން އިންޓަވިއުއެއްގައި ޒުވާން ޓީމުގެ ކޯޗު އަޙްމަދު ޝާކިރު (ޝާކިއްޓެ) ބުނީ ކޮލިފައިންއަށް ތައްޔާރުވާން ވަގުތު ލިބުނު ކަމަށާއި، އެކަމަކު ރާއްޖެ ހިމެނޭ ގްރޫޕުގައި ހިމެނެނީ ވަރަށް ފަރަގު ބޮޑު ޓީމުތައް ކަމަށެވެ. އެހެންކަމުން މިއީ ޒުވާން ކުޅުންތެރިންނަށް ލިބިގެންދާނެ ވަރަށް ރަނގަޅު ތަޖުރިބާއެއް ކަމަށްވެސް ވަނީ ބުނެފައެވެ.
އޭޝިއަން ކަޕް ކޮލިފައިންގައި ވާދަކުރުމަށް ޒުވާން ގައުމީ ޓީމު ސައުދީއަށް ފުރިއިރު، ޒުވާން ޓީމުން އެންމެ ފަހުން ކުޅުނު މުބާރާތަކީ މިދިޔަ އޯގަސްޓް މަހުގެ ކުރީކޮޅު އިންޑިއާގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތެވެ. އެ މުބާރާތުގައި ރާއްޖޭން ކުޅުނު އެއްވެސް މެޗަކުން މޮޅެއް ހޯދިފައި ނުވާއިރު، އެ މުބާރާތުގައި ރާއްޖެއަށް ހަތަރު މެޗުން ލިބުނީ އެންމެ ޕޮއިންޓެކެވެ.
