ފުލުހުންނަކީ މަދަނީ ވަކި މުއައްސަސާއެއްގެ ގޮތުގައި ތައާރަފްކުރިތާ މިއަދު 18 އަހަރު ވި އިރު، އޭރު ރާއްޖޭގައި ހުރި ކުށްކުރުމުގެ މައްސަލަތަކަށް އަދިވެސް އެބަހުރިކަން އެއީ ގަބޫލުކުރަން ޖެހޭ ހަގީގަތެއްކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ. ކޮމިޝަނަރ އޮފް ޕޮލިސް މިގޮތަށް ވިދާޅުވީ ދިވެހި ފުލުހުންގެ ޚިދުމަތުގެ ދުވަހާ ގުޅިގެން ބޭއްވި، މުވައްޒަފުންގެ ޚިދުމަތުގެ އަގު ވަޒަންކުރުމުގެ ޖަލްސާގައި ދެއްކެވި ވާހަކަފުޅުގައެވެ.
މި ޖަލްސާގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް މުހައްމަދު ހަމީދު އިތުރަށް ވިދާޅުވީ، ފުލުހުންގެ ޚިދުމަތަށް އަންނަމުންދާ ރަނގަޅު ބަދަލުތަކާއެކު ރައްޔިތުންގެ އިތުބާރު ލިބޭނެ މުއައްސަސާއަަކަށް ފުލުހުންގެ ޚިދުމަތް ހެދުމަށް ކުރެވެމުންދާ މަސައްކަތްތައް ކާމިޔާބުވެގެން ދިއުމާއި މުޖުތަމައުގައި ހިނގާ ނޭދެވޭ އަމަލުތައް ހުއްޓުވައި ރައްޔިތުންނަށް އަމާން މުޖުތަމައެއް ގާއިމުކޮށްދިނުމަށް ކެނޑިނޭޅި ރެއާއި ދުވާލު ކުރެވެމުންދާ މަސައްކަތްތައް އިހުނަށްވުރެ ފުޅާކޮށް މިއަދުގެ ކުށުގެ ވެށި ދައްކުވައިދޭ މަންޒަރުތަކަށް ފުރިހަމައަށް ހަރަކާތްތެރިވެވޭނެ ފުލުހުންނާއި ވަސީލަތްތައް ހުރި މުއައްސަސާއަކަށް ފުލުހުންގެ މުއައްސަސާ ވެގެންދިއުމަކީ އުންމީދެއް ކަމުގައި ވިދާޅުވިއެވެ. އަދި މިނިވަން މުއައްސަސާތަކަށް ޖަވާބުދާރީވެ ފަރުދުންގެ ހައްގުތަކާއި މުޖުތަމައުގެ ސަލާމަތާއި ރައްކާތެރިކަން ކަށަވަރުކޮށްދޭ އިންތިޒާމުތަކާއެކު، ކުށްކުރުން ހުއްޓުވުމާއި ކުށްކުރާ ފަރާތްތަކުގެ މައްސަލަތައް ހައްލުކުރެވި ދައުވާކުރެވޭނެ މިންވަރަށް ތަހުގީގާ ގުޅޭ އެންމެހައި ކަންކަން ފުރިހަމަވެގެން ދިއުމަކީވެސް އުންމީދެއް ކަމުގައި ވިދާޅުވިއެވެ.
އަދި ހަމައެހެންމެ ދިވެހި ފުލުހުންގެ ޚިދުމަތް ވަކި ޚިދުމަތަކަށް ބަދަލުވުމާ ގުޅިގެން އެންމެންގެ ސަމާލުކަން ލިބިގެންދިޔަ އެއްކަމަކީ ފުލުހުން އަޅާ ޔުނީފޯމާއި، ފުލުހުންގެ ދިދައާއި، ފުލުހުން އެކިއެކި ކަންކަމުގައި ބޭނުންކުރާ އުޅަނދުތައްކަން ފާހަގަކުރެއްވިއެވެ. އަދި އެ ބަދަލަކީ ސިފައިންގެ ފެހި ކުލައިން ފުލުހުންގެ ނޫ ކުލައަށް ބަދަލުވި ބަދަލުވުން އެކަނި ނޫންކަމަށާއި، މަދަނީ ފުލުހުންގެ ޚިދުމަތެކޭ ބުނެވޭއިރު އޭގެތެރޭގައި ވަރަށް މުހިންމު ފުޅާ ކަންތައްތަކެއް ހިމެނޭކަމަށް ވިދާޅުވިއެވެ. އަދި ރައްޔިތުންގެ އިހުސާސްތައް ދެނެގަނެގެން ރައްޔިތުންގެ ބޭނުންތަކަށް ފޯރުކޮށްދެވޭ ޚިދުމަތެއްގެ ގޮތުގައި ދެމިއޮތުމަށް ހިތްވަރު ލިބިގެންދާކަމަށް ވިދާޅުވިއެވެ. އަދި ވޭތުވެދިޔަ އަށާރަ އަހަރުގައި ފުލުހުންގެ ޚިދުމަތަށް އައިސްފައިވާ ބޮޑު ބަދަލާއެކު ރައްޔިތުން ދެކެމުން އައި ގޮތް ބަދަލުވެފައިވާ ކަމަށާއި، ފުލުހުންނާ މެދު ކުރެވޭ އިތުބާރު އިތުރުކުރުމަށް ގިނަ އާ ކަންތައްތަކެއް ކަނޑައެޅިފައިވާކަމަށް ވިދާޅުވިއެވެ.
އަދިވެސް އަޅުގަނޑުމެން ގަބޫލުކުރަން ޖެހޭ ހަގީގަތަކީ މީގެ 18 އަހަރުކުރިން ފުލުހުންގެ ހިދުމަތް ގާއިމްކުރި އިރު ހުރި ކުށްތަކާއި އެނޫން ކަންތައްތައް ވެސް އިތުރު ހައްލެއެއް ނުލިބި ވަނީ އެއް ދުވަހުން އަނެއް ދުވަހަށް ގޯސްވެފައި.
– ހަމީދު ވިދާޅުވިއެވެ.
އެގޮތުން، ފުލުހުންނާ މެދު ކުރެވޭ ޝަކުވާތައް ބަލައި އެފަދަ މައްސަލަތައް ހައްލުކޮށް ރައްޔިތުން އެދޭގޮތަށް ދިވެހި ފުލުހުންގެ ޚިދުމަތް ދިނުމަށް މިސްރާބު ބަދަލުކުރުމަށް ފުލުހުންގެ ޚިދުމަތުގެ ގާނޫނުގައި ގިނަ އާ ކަންތައްތަކެއް ތައާރަފު ކުރެވިފައިވާ ކަމަށް ވިދާޅުވިއެވެ. އަދި ފުލުހުންގެ ޚިދުމަތުން މިސްރާބު ހިފާފައިވަނީ މި ނަތީޖާތައް ހާސިލުކުރުމަށް ކަމަށް ވިދާޅުވިއެވެ. އަދި ފުލުހުންގެ ޚިދުމަތަށް ރައްޔިތުންގެ ކިބައިން އިތުބާރާއި ޔަގީންކަން ހޯދުމަށް ފުލުހުން ކުރާ މަސައްކަތްތައް ވަރުބަލިވުމެއް މަޑުޖެހުމެއްނެތި ތަރުތީބުގެ ތެރެއިން ރާވައި، ކުރަމުން ގެންދާނެކަމުގެ ޔަގީންކަން ރައްޔިތުންނަށް ދެއްވިއެވެ. އަދި ފުލުހުންގެ ޚިދުމަތް މިހާރަށްވުރެ ބޮޑަށް ފުޅާކުރުމަށް ކުރެވޭ މަސައްކަތްތަކުގައި ރައްޔިތުންގެ ބައިވެރިވުން ފުޅާކުރެއްވުމަށް ރައްޔިތުންނަށް އިލްތިމާސް ކުރެއްވިއެވެ.
އޭގެ އިތުރުން، 2004 ވަނަ އަހަރުން ފެށިގެން މިއަދާ ހަމައަށް ފުލުހުންގެ ޚިދުމަތް ތަރައްގީވެފައިވާއިރު އެ ތަރައްގީގައި މިހާތަނަށް ފުލުހުންގެ މުއައްސަސާގައި ޚިދުމަތްކުރެއްވި ވެރިންނާއި މުވައްޒަފުން ފޯރުކޮށްދީފައިވާ ޚިދުމަތްތައް ހަނދާންކުރާ ކަމަށާ އަދި ފުލުހުންގެ ޚިދުމަތުގައި އިސްކޮށް ހަރަކާތްތެރިވި ވެރިންނަށާއި، އެކި ރޭންކުގެ ފުލުހުންނާއި މުވައްޒަފުންނަށް ޝުކުރުއަދާކުރެއްވިއެވެ.
