ބޮލީވުޑްގެ ވަރަށް ވަރުގަދަ ދެތަރިން ކަމުގައިވާ ރިތިކް ރޯޝަން އާއި ސައިފް އަލީ ޚާން އެކުގައި ފެނިގެންދާ ފިލްމް "ވިކްރަމް ވޭދާ" ގެ ޓީޒާއެއް އާންމުކޮށްފިއެވެ.
2 މިނިޓްއެއްހާ އިރުގެ މި ޓީޒާގައި ރިތިކް އާއި ސައިފްގެ ވަރުގަދަ ކުރިމަތިލުން ތަކެއްވެސް ފެނިގެންދެއެވެ. މި ފިލްމުގައި ރިތިކް ފެނިގެންދާނީ ގޭންގްސްޓާރެއްގެ ގޮތުގައިއެވެ. އަދި ސައިފް ފެނިގެންދާނީ ފުލުހެއްގެ ރޯލުންނެވެ.
މިއީ މިއަހަރުގެ ވަރަށް އުންމީދީ އަދި ގިނަބަޔަކު އިންތިޒާރު ކުރަމުންއަންނަ ފިލްމެކެވެ. މި ފިލްމަކީ ދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން މި ދެތަރިން ވަނީ އެކުގައި 2002 ވަނަ އަހަރު ”ނަ ތުމް ޖާނޯ ނަ ހަމް“އިން ފެނިގެން ގޮސްފައެވެ.
ވަރަށް ތަފާތުކޮން މި ފިލްމުން ރިތިކް ފެނިގެންދާއިރު ފިލްމަށް ރިތިކް ވަނީ މުޅި މީހާއަށް ވަރަށް ބޮޑު ބަދަލެއް ގެނެސްފައެވެ. އެގޮތުން ބޮޑު ތުނބުޅިއަކާއެކު ވަރުގަދަ ހަށިގަނޑެއް ގައި ރިތިކް ފެނިގެންދާ މި ފިލްމުގައި މީގެ ކުރިން އޭނާ ނުފެންނަ ފަދަ ގޮތަކަށް ބަލާލުމުގެ ފުރުސަތު ލިބިގެންދާނެއެވެ.
View this post on Instagram
މިއީ ހަމަ މިނަމުގައި 2017 ގައި ގެނެސްދިން ތަމަޅަ ފިލްމުގެ އަސްލަކަށް ބަލައިގެން ހަދާފައިވާ ފިލްމެކެވެ. ހިންދީ ފިލްމުވެސް ޑައިރެކްޓްކުރަނީ ތަމަޅަ ފިލްމުވެސް ޑައިރެކްޓްކުރި ޕުޝްކަރް-ގަޔަތުރީއެވެ.
ތަމަޅަ ފިލްމުގައި ވޭދާގެ ރޯލު ވިޖޭ ސެތުޕަތީ ކުޅުނުއިރު، ވިކްރަމްގެ ރޯލު ކުޅުނީ އާރް މާދަވަންއެވެ. މި ފިލްމުގައި ދައްކުވައިދެނީ ފުލުހަކާއި ގެންގްސްޓާރެއްގެ މެދުގައި ހިނގާ ކަންތައްތަކެކެވެ.
