މާލެ-ހުޅުލެ ބްރިޖުއެޅިއިރު ތިމާވެށީގެ ދިފާއުގައި އެންމެ ބޮޑަށް ވަކާލާތުކުރެއްވި މިހާރުގެ އެންވަޔަރަމަންޓް މިނިސްޓަރ އާއިމިނަތު ޝައުނާ، މިހާރު ބާރުގައިތިބެ ބަހެއް ވިދާޅުވާން ނުކުރެނުކަމަށް ވިދާޅުވެ ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުޙައްމަދު ސައީދު ފާޑުވިދާޅުވެއްޖެއެވެ.
ތިލަމާލެ ބްރިޖު އެޅުމުގެ މަސައްކަތްކުރާ އެފްކޮން ކުންފުނީގެ ޕްލެޓްފޯމެއް ވިލިމާލެ ފަރަށް އުރިފައިވާތާ މިހާރު ހަފްތާއެއް ވީއިރުވެސް ފުންކުރެވިފައެއް ނުވެއެވެ. މިކަމާއި ގުޅިގެން ތިމާވެށީގެ ދާއިރާގެ ބޭފުޅުންވެސް ދަނީ ކަންބޮޑުވުން ފާޅުކުރަމުންނެވެ.
ސަޢީދު ވިދާޅުވީ، ކްރޮސްރޯޑު ތަރައްޤީކުރަންފެށުމުން މިހާރުގެ ތިމާވެށީގެ ވަޒީރާއި އަނެއް ދިވެހިރާއްޖޭގެ ބާނީ މުޒާހަރާކުރީ ގިރިފަރުތައް ދުވަސްދިޔައީކަމަށް ބުނެކަމަށެވެ. އަދި ޗައިނާ މޯލްޑިވްސް ފްރެންޑްޝިޕް ބުރިޖު އެޅިދުވަސްވަރު ރާޅުގެ ހިމާޔަތުގައި އެމީހުން އަޑުއުފުލިކަމަށާއި، މިއަދު ބާރުގައިތިބެ ބަހެއްބުނެލަންވެ ސްއުޒުރުވެރިވީތޯ ސައީދު ސުވާލުކުރެއްވިއެވެ.
ބްރިޖް ޕްލެޓްފޯމް ވިލިމާލެ ފަރަށް އަރާފައިވަނީ، ބްރިޖް އެޅުމަށްޓަކާ ވިލިމާލެ ކަނޑުއޮޅި ބަންދުކުރި ދުވަހުގެ ފަހު ދުވަހުއެވެ. އެފްކޮންސް އިން ބުނެފައިވަނީ ޕްލެޓްފޯމް ފަރަށް އަރާފައިވަނީ ދިމާވި ޓެކްނިކަލް މައްސަލައެއްގެ ސަބަބުން ކަމުގައެވެ.
އެންވަޔަރމަންޓް ޕްރޮޓެކްޝަން އޭޖެންސީ (އީޕީއޭ)އިން ހާމަ ކޮށްފައިވާ ގޮތުގައި ބްރިޖް މަޝްރޫއު ކުރިޔަށް ގެންދާ އެފްކޮންސްއާއި ޕްލޭނިން މިނިސްޓްރީއާއެކީ ވަނީ މަޝްވަރާ ބައްދަލުވުމެއް ކުރިޔަށް ގެންދެވިފައެވެ. މި ބައްދަލުވުމުގައި، ޕްލެޓްފޯމް ފަރުމަތިން ނެގުމުގެ މަސައްކަތް ކުރިޔަށް ގެންދާ ގޮތާއި ގުޅޭގޮތުން މަޝްވަރާ ކުރެވިފައި ވެއެވެ.
އީޕީއޭއިން ހާމަ ކޮށްފައިވާ ގޮތުގައި، ޕްލެޓްފޯމް ކުރިޔަށްއޮތް ދެދުވަހުގެ ތެރޭގައި ނަގާނޭކަމުގެ ޔަގީންކަން އެފްކޮންސްއިންވަނީ ދީފައެވެ.
ބްރިޖް ޕްލެޓްފޯމް ފަރުމަތިން ނުނެގި ގިނަ ދުވަސް ވަމުންދާތީ އީޕީއެއަށާއި އަދި ބްރިޖް އެޅުމުގެ މަސައްކަތް ކުރަމުންދާ އެފްކޮންސްއަށްވެސް ގިނަބައެއްގެ ފާޑުކިޔުންތައް ވަނީ އަމާޒުވެފައެވެ.
ރާއްޖޭގެ ފަރުތަކަށް ލިބޭ ގެއްލުންތަކުގައި އިހުމާލުވާ ފަރާތްތައް ބޮޑެތި އަދަދުތަކުން ފާއިތުވެދިޔަ ތަނުގައިވަނީ ޖޫރީމާނާ ކޮށްފައެވެ.
