ބޮލީވުޑްގެ ޒުވާން އެކްޓަރު އިޝާން ޚައްޓަރުގެ ހަނގުރާމަ މާތީ ފިލްމު "ޕިއްޕާ"ގެ ޓީޒާ އެއް ދައްކާލައިފިއެވެ.
މި ޓީޒާ ދައްކާލައިފާ މި ވަނީ އިންޑިއާގެ 75 ވަނަ މިނިވަން ދުވަހާ ދިމާކޮށެވެ. ރޯނީ ސްކްރޫވާލާ އާއި ސިދާތު ރޯއި ކަޕޫރް ޕްރޮޑިއުސްކުރާ މި ފިލްމުގެ ޑައިރެކްޓަރަކީ 2016 ގައި ރިލީޒްކުރި އަކްޝޭ ކުމާރުގެ "އެއާލިފްޓް" އާއި ސައިފް އަލީ ޚާން 2017 ގައި ކުޅުނު "ޝެފް"ގެ ޑައިރެކްޓަރު ރާޖާ ކްރިޝްނާ މެނަން އެވެ.
"ޕިއްޕާ" އަކީ އިންޑިއާ އާއި ޕާކިސްތާނާ ދެމެދު 1971 ގައި ކުރި ހަނގުރާމައިގައި އަސްކަރިއްޔާގެ 45 ވަނަ ކަވަލްރީ ޓޭންކް ސްކޮޑްރަންގައި މަސައްކަތްކުރި ބްރިގޭޑިއާ ބަލްރާމް ސިންގް މެހެތާގެ ވާހަކަ ކިޔައިދޭ ފިލްމެކެވެ. އޭނާގެ ރޯލް ފިލްމުގައި ކުޅޭނީ އިޝާނެވެ.
"ޕިއްޕާ" ގެ ބަތަލާ އަކީ އިޝާންގެ ބޭބެ، ޝާހިދު ކަޕޫރްގެ އެންމެ ފަހުގެ ފިލްމު "ޖާޒީ" ގެ ބަތަލާ މުރްނާލް ޓާކުރެވެ. މިއީ މިދެތަރިން އެކުގައި ފެނިގެންދާ ފުރަތަމަ ފިލްމެވެ.
މި އަހަރުގެ ޑިސެމްބަރު މަހުގެ 2 ގައި ރިލީޒްކުރަން ހަމަޖެހިފައިވާ ފިލްމުގެ ކާސްޓްގައި އާލިއާ ބަޓްގެ މަންމަ ސޯނީ ރާޒްދާއި ޕްރިޔަންޝޫ ޕައިންޔުލީ ހިމެނެއެވެ.
ކޮމެންޓު ފޮނުވާ