ކުރިޔަށް އޮތް ރިޔާސީ އިންތިޚާބު އަހަރަކަށް ގާތްވެފައިވާއިރު، ރިޔާސީ އިންތިޚާބުގައި ވާދަކުރުމަށް ރާއްޖޭގެ ގިނަ ސިޔާސީ ޕާޓީތަކުން މިހާރުވަނީ ކެނޑިޑޭޓުން އައްޔަން ކޮށް، އަދި އެ ކެނޑިޑޭޓުންނާއި ޕާޓީތަކުގެ ރިޔާސީ ޓިކެޓްވެސް ހަވާލުކުރުމުގެ މަރުހަލާ ފަށާފައެވެ.
މިގޮތުން އިދިކޮޅު ޕީޕީއެމްއިން އެ ޕާޓީގެ ރިޔާސީ ކެންޑިޑޭޓަކީ ކުރީގެ ރައީސް ޔާމިންކަމަށް ނިންމާ، މިމަހުގެ 19ވަނަ އެޕާޓީގެ ރިޔާސީ ޓިކެޓް ރައީސް ޔާމިންއާއި ހަވާލު ކުރުމަށް ދަނީ ތައްޔާރު ވަމުންނެވެ. ޕީޕީއެމްއިން އެޕާޓީގެ ރިޔާސީ ޓިކެޓް ރައީސް ޔާމިންއައި ހަވާލު ކޮށްފައިވަނީ، ޕާޓީގެ އަސާސީ ގަވާއިދުވެސް ބަދަދަލު ކޮށްގެން، ޕްރައިމަރީއަކާ ނުލާ، އެއްވެސް ވާދަވެރިކަމެއް ނެތިއެވެ.
ހަމަ އެއާއެކު މިހާތަނަށް ރިޔާސީ އިންތިޚާބުގައި ވާދަކުރޭނާކެން އިއުލާން ކޮށްފައިވާ ޕާޓީތަކަށް ބަލާއިރު، ރާއްޖޭގައި އެންމެ ފަހުން ވުޖޫދުވި އެމްއެންޕީވެސް މިހާރުދަނީ އެޕާޓީގެ ރިޔާސީ ޕްރައިމަރީ ބޭއްވުމަށް ތައްޔާރު ވަމުންނެވެ. އެޕާޓީގެ ފަރާތުން ރިޔާސީ އިންތިޚާބުގައި ވާދަކުރައްވާނެކަމުގެ ޝައުގުވެރިކަން މިހާތަނަށް ފާޅު ކުރައްވާފައިވަނި ޕާޓީގެ ރައީސް ކާނަލް މުހައްމަދު ނާޒިމްއެވެ.
އެމްއެންޕީގެ އިތުރުން، ކުރިޔަށް އޮތް ރިޔާސީ އިންތިޚާބުގައި ވާދަކުރައްވާނޭކަން ހާމަ ކޮށްފައިވާ ކެނޑިޑޭޓުންގެ ތެރެއިން ދެން އެންމެ ބޮޑު ވާދަވެރިކަމެއް ފެނިގެން ގޮސްފައިވަނީ ވެރިކަން ކުރާ ކޯލިޝަންގައި ހިމެނޭ އެމްޑީޕީގެ އެތެރޭގެ ފެކްޝަންތަކުގެ މެދުގައެވެ. ފާއިތުވެދިޔަ 2 އަހަރެއްހާ ދުވަހު އެމްޑީޕީގެ އެތެރޭގައި އުފެދިގެން ގޮސްފައިވާ ކޯޅުންތަކުގައި، ޕާޓީގެ ރައީސް މުހައްމަދު ނަޝީދުއާއި ޕާޓީގެ އިސް ލީޑަރު، ރައީސް ސާލިހުއާ ދެމެދު އުފެދިފައިވާ ސިޔާސީ ކޯޅުންތަކުގެ ހަގީގީ ސަބަބުތަކެއްގެ ގޮތުގައި ބިނަބަޔަކު މިހާތަނަށް ފާހަގަ ކޮށްފައި ވަނީވެސް ޕާޓީގެ 2023ގެ ރިޔާސީ ޓެކެޓަށް އުފެދިގެން ދިޔަ ވާދަވެރިކަމެވެ.
އެހެންނަމަވެސް މި ވާދަވެރިކަން އޭގެ ހައްދުން ނެއްޓި، ހުރި ޚިޔާލު ތަފާތުވުންތަކަށް ހައްލެއް ނުހޯދި، ދެން އަބުރާ އެއްގަލަށް އެރުން އުދަގޫ ދަރަޖައަކަށް ޕާޓީ މިހާރު ބައިބައި ވެގެން ގޮސްފައި ވާއިރު، މަޖިލިސް ރައީސް މުހައްމަދު ނަޝީދުވެސް އަދި ރައީސް ސާލިހުވެސް ވަނީ ރިޔާސީ އިންތިޚާބުގައި ވާދަ ކުރައްވާނޭކަން އިއުލާން ކުރައްވާފައެވެ.
އަދި ފާއިތުވެދިޔަ ތަނުގައި އެމްޑީޕީގެ ރިޔާސީ ޕްރައިމަރީގައި ވާދަކުރައްވާނޭކަމަށް ނަޝީދު އެތައް ފަހަރެއްގެ މަތިން އިއުލާން ކުރައްވާފައި ވާއިރު، ރައީސް ސާލުހި ހަމަ އެކަނި ފާޅުކުރައްވާފައިވަނީ އެމްޑީޕީގެ ކެނޑިޑޭޓެއްގެ ގޮތުގައި ނުކުންނަވަން އެމަނިކްފާނު ތައްޔާރަށް ހުންނެވިކަން އެކަނިކަން މިފުރުސަތުގައި ފާހަގަ ކޮށްލާން ޖެހެއެވެ.
ތަބަކަކަށް ލާފަ ޓިކެޓެއް ނުދޭނެ! އޮންނާނީ ރިޔާސީ ޕްރައިމަރީއެއް!
ޕާޓީގެ އެތެރޭގައި އުފެދިފައިވާ ކޯޅުންތަކުގައި ފާއިތުވެދިޔަ ތަނުގައި ނަޝީދަށް ތާއީދުކުރަމުން އައި ފަރާތްތަކުން ރައީސް ސާލިހަށް އަމާޒު ކުރަމުންއައި އެންމެ ބޮޑު ތުހުމަތަކަށް ވެގެން ދިޔައީ، ޕާޓީގެ ރިޔާސީ ޓިކެޓް ޕްރައިމަރީއަކާ ނުލާ ހޯދެއްވުމަށް މަސައްކަތް ކުރައްވަމުން ގެންދަވާ ކަމުގެ ތުހުމަތު ތަކެވެ.
އަދި ފަހަކަަށް ރައީސް ސާލިހަށް ތާއީދުކުރާ ފަރާތްތަކުން ޕާޓީގެ އެތޭރެގެ ގިނަ މަގާމްތަކަށް އިންތިޚާބު ވެގެން ގޮސްފައި ވުމާއި، ޕާޓީގެ ގައުމީ މަޖިލިހުގައި ރައިސް ސާލިހަށް އޮތް ތާއީދާއި، އޭގެ އިތުރުން ޕާޓީގެ ޕާލަމެންޓްރީ ގުރޫޕުގެ ތެރޭގައިވެސް ރައީސް ސާލިހުގެ ފެކްޝަނަށް އޮތް މެޖޯރިޓީއަށް ބަލާއިރު، ޕާޓީގެ ކޮންގްރެސްގައި، ޕްރައިމަރިއަކާ ނުލާ ރިޔާސީ ޓިކެޓް ކަށަވަރު ކުރުމަކީ ރައީސް ސާލިހަށް މިހާރު ދަތިކަމެއްގެ ގޮތުގައި ނުބެލެވެއެވެ.
އެހެންނަމަވެސް މިމަހުގެ 19ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ކޮންގެރެސްއާއި ގުޅޭގޮތުން ނޫސްވެރިންނާއި ބައްދަލު ކުރައްވަމުން، ކޮންގްރެސް ކޮމިޓީގެ މުޤައްރިރު އަދި އެޕާޓީގެ ޗެއާޕާސަންގެ ނައިބު އިދާރީ އިބްރާހީމް ވަހީދު ވިދާޅުވެފައިވަނީ ކޮންގްރެސްއަށް، ރިޔާސީ ޓިކެޓް ދިނުމާ ބެހޭ އެއްވެސް އިސްލާހެއް ހުށަހަޅާފައި ނުވާ ކަމަށެވެ. އަދި މިފަހަރުގެ ކޮންގްރެސްއަށް އެފަދަ ކަމެއް ހުށަހެޅުމުގެ ފުރުސަތުވެސް މިހާރު ނެތް ކަމަށް އޭނާ ވިދާޅުވިއެވެ.
މި ނޫސްވެރިންގެ ބައްދަލުވުމުގައި އިބްރާހިމް ރަޝީދު ވިދާޅުވީ ކޮންގްރެސްއަށް ހުށަހެޅުމަށްޓަކައި އަސާސީ ގަވާއިދަށް މައިގަނޑު ގޮތެއްގައި ހުށަހަޅާފައި ހުރީ ޕާޓީ ހިންގަން ފަސޭހަކުރުމަށްޓަކައި ގެންނަ އިސްލާހުތަކެއް ކަަމަށެވެ. އަދި އަސާސީ ގަވައިދުގައި އޮޅުން އަރާ ގޮތަށް ހުރި ބައެއް ކަންތައްތައް ރަނގަޅުކުރަންވެސް އިސްލާހުތައް ހުރިކަން އޭނާ ފާހަގަކުރެއްވިއެވެ.
ވަހީދު ވިދާޅުވީ ޕްރައިމަރީއަކާ ނުލައި ރިޔާސީ ޓިކެޓް ދިނުމުގެ ބާރު އެމްޑީޕީގެ ގައުމީ މަޖިލީހަށް ވެސް ނޯންނާނެ ކަމަށެވެ. އެހެންކަމުން އެމްޑީޕީގެ ރިޔާސީ ޕްރައިމަރީ ބާއްވަން ޖެހޭކަމަށް އޭނާ ވިދާޅުވިއެވެ.
އޭނާ އެހެން ވިދާޅުވި ނަމަވެސް، ކޮންގްރެސްގައި ޕާޓީގެ އަސާސީ ގަވާއިދަށް ބަދަލު ގެނައުމުގެ ފުރުސަތު ކޮންގްރެސްގައި ޕާޓީގެ ގޮފިތައް ތަމްސީލު ކުރާ މެމްބަރުންނަށް ލިބިގެންދާއިރު، ޕްރައިމަރީއަކާ ނުލާ ރިޔާސީ ޓިކެޓް ކަށަވަރު ކުރެއްވުމުގެ ޝައުގުވެރިކަން ރައީސް ސާލިހުގެ ހުންނެވިނަމަ، މިފަދަ ހުށަހެޅުމެއް ކޮންގްރެސްއަށް ހުށަހަޅުއްވައިގެން، ޕްރައިމަރީއަކަށް ނުގޮސް 2023ގެ ރިޔާސީ ޓިކެޓް ކަށަވަރުކުރުން ރައީސް ސާލިހަށް ވެގެން ދިޔައީހީ ވަރަށްވެސް ފަސޭހަކަމަކަށެވެ.
އެހެންނަމަވެސް، މިމަހުގެ 19ވަނަ ދުވަހު ބޭއްވިގެންދާ މި ކޮންގްރެސްގައި މިފަދަ އިސްލާހެއް ފާސްކުރުމަށް ރައީސް ސާލިހަށް ތާއީދުކުރާ ފަރާތްތަކުން ބޭނުން ނުވުމުގެ ނަތީޖާއެއްގެ ގޮތުން، 2023 އަށް ޕާޓީގެ ޓިކެޓްގައި ނިކުންނެވުމުގައި ރައީސް ސާލިހުގެ އަމާޒު މިހާރު މިހާރު ހުރިގޮތްވަނީ ވަރަށްވެސް ރަގަޅަށް ސާފުވެ، ކަށަވަރުވެ ޔަގީން ކުރެވިފައެވެ.
ރައީސް ސާލިހު އަމާޒު! ޕްރައިމަރީން ނަޝީދު ބަލި ކުރެއްވުން!
ކޮންމެއަކަސް، ތަބަކަކަށް ލާފަ ޓިކެޓް ކަށަވަރު ކުރުމަށް ރައީސް ސާލިހު މަސައްކަތް ކުރައްވަމުން ގެންދަވާކަމަށް، ފާއިތުވެދިޔަ ތަނުގައި ނަޝީދަށް ތާއީދުކުރާ ފަރާތްތަކުން ކުރަމުންއައި ތުހުމަތުތަކާއި، ލައްވަމުން ދިޔަ ހަޅޭކަށް، ކޮންގްރެސްގެ ކުރިން ރައީސް ސާލިހު މިވަނީ ޖަވާބު ދެއްވާފައެވެ. އެއީ ޕާޓީގެ ރިޔާސީ ޓިކެޓް ކަށަވަރު ކުރުމަށް ރިޔާސީ ޕްރައިމަރީއެއް އޮންނާނޭކަމުގެ ޔަގީންކަން ކުރިހާ ފަރާތަކަށް އެރުވުމެވެ.
އެހެންނަނަވެސް އެއާއެކީ އުފެދިގެންދާ ސުވާލަކީ މި ޕްރައިމަރީގައި މަޖިލިސް ރައީސް މުހައްމަދު ނަޝީދުވެސް ވާދަކުރައްވާނޭކަމަށް އިއުލާން ކުރައްވާފައިވާތީ، ޕާޓީގެ އެތެރޭގަ އޮތް ވާދެވެރިކަމުގެ ތެރެއިން ޓިކެޓް ކަށަވަރު ކުރުމަށް ކުރަންޖެހޭ މަސައްކަތްތަކާއި ކެމްޕޭންގެ ވެގެންދާނީ ކިހާ ވަރުގަދަ ކެޕްޕޭނަކަށް ތޯ ނުވަތަ ވާދަވެރިކަމަކަށް ތޯއެވެ.
މިގޮތުން ބަލާއިރު، ޕާޓީގެ އެތެރޭގަ ފާއިތުވެދިޔަ ތަނުގައި، ރައީސް ސާލިހާއި ނަޝީދާ ދެބޭފުޅުންގެ މެދުގައި ބޭއްވިގެންދިޔަ އެންމެ ވާދަވެރި އިންތިޚާބަކަށް ވެގެން ދިޔައީ އެންމެ ފަހުން ބޭއްވިގެންދިޔަ ޕާޓީގެ ޗެއަރ ޕާރސަން އިންތިޚާބެވެ. މިއިންތިޚާބަކީ ފާޅުކަން ބޮޑު ގޮތެއްގައި ރައީސް ސާލިހާއި ނަޝީދުއާ ދެބޭފުޅުންގެ މެދުގައި ބޭއްވިގެންދިޔަ އިންތިޚާބެއްކަން ކަށަވަރުވެ ޔަގީންވެގެން ދިޔައީ އިންތިޚާބުގައި ވާދަކުރެއްވި ދެ ކެނޑިޑޭޓުންނަށް ތާއީދު ހޯދުމަށް ފާޅުގައި ދެބޭފުޅުން ކުރައްވާފައިވާ ކެމްޕޭނާއި ކުރެއްވި މަސައްކަތްތަކުންނެވެ.
މިވާދަވެރިކަމުގެ ތެރެއިން، މުޅި ޕާޓީ މޮބިލައިޒްކޮށް، ނަޝީދުގެ މައްޗަށް ރައީސް ސާލިހު ހޯއްދެވި ކާމިޔާބީ ގިނަބަޔަކު ތަރުޖަމާ ކޮށްފައިވަނީ ޕާޓީގެ އެތެރޭގައި ރައީސް ސާލިހަށް އޮތް ތާއީދާއި އަދި ނުފޫޒުގެ ގޮތުގައެވެ. އަދި ގަބޫކުރެވޭ ގޮތުގައި ފާއިތުވެދިޔަ މޭމަހު ބޭއްވިގެންދިޔަ ޗެއަރޕާސަން އިންތިޚާބުގެ ނަތީޖާއަށް ބަލާއިރު، ރިޔާސީ ޕްރައިމަރިއަކަށް ގޮސްގެން، ޕްރައިމަރީގައި ނަޝީދާއި ވާދަކޮށް ޕްރައިމަރީ ކާމިޔާބު ކުރެއްވުމަކީ ރައީސް ސާލިހަށް އުދަގޫ ކަމެއްގެ ގޮތުގައި މިހާރު ގިނަ ބަޔަކު ނުދެކެއެވެ.
އަދި ބައެއް ފަރާތްތަކުން ވިދާޅުވާ ގޮތުގައި، މިހާލަތުގައި ބޭއްވޭ ރިޔާސީ ޕްރައިމަރީއެއްގައި ނަޝީދު ވާދަ ނުކުރެއްވުމަކީވެސް އެކަށީގެންވާ ކަމެކެވެ.
ކޮންމެއަކަސް، ނަޝީދަށް ތާއީދުކުރާ ފަރާތްތަކުން ރައީސް ސާލިހަށް އަމާޒުކުރަމުން އައި ތުހުމަތުތަކަށް ގޮންޖައްސަވާ، ރިޔާސީ ޕްރައިމަރީއަކުން ނަޝީދުގެ މައްޗަށް ކުރިހޯއްދަވާ، 2023ގެ އެމްޑީޕީގެ ރިޔާސީ ޓިކެޓް ކާމިޔާބު ކުރެއްވުމަށް އެމްޑީޕީގެ އެތެރޭގަ އޮތް ސިޔާސީ ކޯޅުންތަކާއެކުވެެސް، ރައީސް ސާލިހުގެ ސިޔާސީ އޮޑީގެ މިސްރާބު މިހާރު އަމާޒު ކުރައްވާފައިވަނީ ވަރަށްވެސް ފުރިހަމަ ހައްލެއްކަމާއި ދިމާލަށް ކަމުގައި ގިނަބަޔަކު ގަބޫލު ކުރެއެވެ. އަދި އޭގޭ ނަތީޖާއަށް ގިނަބަޔަކު ދަނީ އިންތިޒާރުވެސް ކުރަމުންނެވެ.
