އިދިކޮޅު ޕީޕީއެމްއިން "މިނިވަން ކުރޭ، މިނިވަން ކުރޭ"ގެ ނަމުގައި ބާއްވަމުންދާ ސިލްސިލާ އިހުތިޖާޖު މާދަމާ ރޭވެސް އޮންނާނެ ކަމަށާއި، މިއިހުތިޖާޖު މެދު ނުކެޑި ކުރިޔަށް ދާނެ ކަމުގައި، ޕާޓީގެ މަގުމަތީ ހަރަކާތްތަކުގައި އިސްކޮށް ހަރަކާތްތެރިވާ، ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު ލަތީފް ވިދާޅުވެއްޖެއެވެ.
ޕީޕީއެމްގެ މަގުމަތީ ހަރަކާތްތަކާއި ގުޅޭގޮތުން އެޕާޓީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ލަތީފް ވިދާޅުވީ ގައުމު އަޅުވެތިކަމުން ސަލާމަތް ކުރުމަށާއި، އަދި ނުހައްގުން ހައްޔަރުކޮށްފައިތިބި އެންމެން ދޫކޮށްލުމަށް ގޮވާ ބާއްވަމުންދާ ސިލްސިލާ އިހުތިޖާޖު މާދަމާ ރޭވެސް ފެށުމަށް ހަމަޖެހިފައިވަނީ ރޭގަޑު 8:00 ގައި ޕީޕިއެމްގެ އޮފީސް ކުރިމަތިން ކަމުގައެވެ.
އިދިކޮޅުގެ ޕީޕީއެމްގެ މާލޭ ދާއިރާގެ ސްޓިއަރިންގ ކޮމިޓީތަކުގެ ރައީސުންނާއެކު މިއަދި ބޭއްވި ނޫސްވެރިންގެ ބައްދަލު ވުމުގައި ވާހަކަ ދައްކަވަމުން ލަތީފް ވިދާޅުވީ، މިއެއްވުން މާދަމާރޭވެސް ފެށިގެންދާނީ ސުލްހަވެރި އެއްވުމެއްގެ ގޮތުގައި ކަމަށާއި، އެއްވުމުގައި ގޮވާލާނީ ނުހައްގުން ހައްޔަރު ކޮށްފައިވާ ހުރިހާ ފަތާތްތަކެއް މިނިވަން ކުރުމަށާއި އަދި ގައުމު އަޅުވެތިކަމުން މިންޖުކުރުމަށް ކަމުގައެވެ.
އޭނާ ވިދާޅުވީ ސިލްސިލާކޮށް ބާއްވަމުން ގެންދާ މިއެއްވުން، ސިޔާސީ ހައްޔަރީން މި ސަރުކާރުން މިނިވަން ކުރަންދެން އެޕާޓީން ކުރިޔަށް ގެންދާނޭ ކަމުގައެވެ.
"މިނިވަންކުރޭ"ގެ ނަމުގައި ސިޔާސީ ހައްޔަރީން ދޫކޮށްލުމަށް ޕީޕީއެމްއިން މުޒާހިރާ ކުރަމުންދާއިރު، މިއަހަރުގެ ޔޯގާ ދުވަހުގެ ހިންގި ހަމަނުޖެހުންތަކަށް އެހީތެރިވެދިނުމުގެ ތުހުމަތުގައި އެޕާޓީގެ އިވެންޓު ކޮމިޓީގެ ޗެއަރ، ރައްޔިތުންގެ މަޖިލިހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް އަދިވެސް ހުރީ ހައްޔަރު ކޮށްފައެވެ. އަދި އޭނާގެ އިތުރުންވެސް ދީނީ ބައެއް އިލްމުވެރިންވެސް ޔޯގާ ހަމަނުޖެހުމާއި ގުޅިގެން އަދިވެސް ވަނީ، ކޯޓު އަމުރުގެ ދަށުން ހައްޔަރު ކޮށްފައެވެ.
ދީނީ ބައެއް އިލްމުވެރިންނާއި އިދިކޮޅު ޕީޕީއެމްއިން ދަނީ މިފަރާތްތައް ދޫކޮށްލުމަށް ގޮވާލަމުންނެވެ.
