މިއަހަރު ބޭއްވުމަށް ހަމަޖެހިފައިވާ ބޯހިމެނުމުގެ މަސައްކަތަށް ޔޫއެންޑީޕިން 20 ޓެބްލެޓް ހަދިޔާ ކޮށްފިއެވެ. މި ޓެބްލެޓްތައް ހަދިޔާ ކޮށްފައިވަނީ ނޭޝަނަލް ބިއުރޯ އޮފް ސްޓެޓިކްސްއައި ޔޫއެންޑީޕީ ގުޅިގެން ކުރިޔަށް ގެންދިޔަ "އިންފޯމަލް ސެކްޓަރ ސާވޭ 2021″ ރިޕޯޓު ނެރުމުގެ ގޮތުން މިއަދު ބޭއްވި ރަސްމިއްޔާތުގައެވެ.
ބޯހިމެނުމުގެ މަސައްކަތްތައް ޑިޖިޓަލްކޮށް ކުރިޔަށް އެހީތެރިވެ ދިނުމުގެ ގޮތުން ޔޫއެންޑީޕީން ހަދިޔާކުރި މި ޓެބްލެޓްތައް ހަވާލު ކުރައްވާފައިވަނީ ރާއްޖޭގައި ހުންނަވާ ރެސިޑެންޓް ކޯޑިނޭޓަރ އެންރީކޯ ގަވޭލިއާއެވެ. މި ތަކެއްޗާއި ހަވާލުވެ ވަޑައިގަތީ ބިއުރޯ އޮފް ސްޓެޓިސްޓިކްސްގެ ޗީފް ސްޓެޓީޝަން އައިޝަތު ހުސެއިންއެވެ.
ރާއްޖޭގެ އާބާދީއާއި ދިރިއުޅޭ ތަންތަނުގެ ބޯހިމެނުމާއި އިޤްތިޞާދީ މަސައްކަތްތަކުގެ ބޯހިމެނުން ކުރިއަށް ގެންދިޔުމަށް ނިންމާފައިވަނީ މިއަހަރުގެ ސެޕްޓެމްބަރުމަހުގެ 13 އިން 14 އަށް އަދި 17 އިން 25 އަށެވެ. މި މަސައްކަތައް ބޭނުންވާ މީހުން ހޯދުމުގެ މަސައްކަތް މޯލްޑިވްސް ބިއުރޯ އޮފް ސްޓެޓިކްސް މި ވަނީ ފަށާފައެވެ. މި މަސައްކަތައް ޖުމްލަ 4400 މީހުން ބޭނުންވެއެވެ. އެއީ މާލޭ ސަރަހައްދަށް ބޭނުންވާ 2409 މީހުންނާއި އަތޮޅުތަކުގައި މަސައްކަތް ކުރާނެ 1991 މީހުންނެވެ.
ބޯހިމެނުމުގައި ޓްރޭނަރުންނާއި އެނިއުމަރޭޓަރުންގެ ގޮތުގައި ބައިވެރިވުމުގެ ފުރުސަތު ހުޅުވާލީ މިދިޔަ މެއި މަހުގެ ނިޔަލަށެވެ.
ބޯހިމެނުމުގެ މަސައްކަތައް ނުކުންނަ މީހުންނާއި ބޭނުންވާ ތަމްރީނުތަކާއި މަސައްކަތް ކުރާ ކޮންމެ ދުވަހަކަށް އެލަވަންސެއް ދިނުމަށްވެސް ވަނީ ހަމަޖެހިފައެވެ. މިގޮތުން މަސައްކަތު ނުކުންނަ ކޮންމެ ދުވަހަކަށް 500 ރުފިޔާގެ އެލަވަންސެއް ވަނީ ކަނޑައަޅާފައެވެ. މަސައްކަތައް ނެރުމުގެ ކުރިން ހިންގާ ތަމްރީނުތަކަށް ނުކުންނަ ކޮންމެ ދުވަހަކަށް 100 ރުފިޔާގެ އެލަވަންސެއް ދިނުމަށްވެސް ވަނީ ކަނޑައަޅާފައެވެ.
މިއަހަރުގެ ބޯހިމެނުމަށް ތައްޔާރުކޮށްފައިވާ ޓައިމްލައިންގައިވާ ގޮތުން މި މަސައްކަތައް ބޭނުންވާ މީހުން ތަމްރީނުކުރުމުގެ މަސައްކަތް އަންނަ އޮގަސްޓްމަހު ފަށާނެއެވެ. ފުރަތަމަ ތަމްރީނުތައް އޮންނާނީ އަތޮޅުތަކުގައި މަސައްކަތްކުރާ ފަރާތްތަކަށެވެ. މި ތަމްރީނުތައް އޮންނާނީ އޮގަސްޓްމަހުއެވެ. މާލޭގައި މަސައްކަތް ކުރާ މީހުންގެ ތަމްރީނުތައް އޮންނާނީ އޮގަސްޓްމަހާއި ސެޕްޓެމްބަރު މަހުގެތެރޭގައެވެ.
ރާއްޖޭގެ އާބާދީއާއި ބޯހިމެނުމުގެ ބައެއް މަޢުލޫމާތުތައް އޮކްޓޯބަރު 6 ވަނަ ދުވަހު ޢާއްމުކުރާނެއެވެ. އަދި މުޅި ސަރވޭގެ މަޢުލޫމާތު ހާމަކުރާނީ ޤައުމީ ތަފާސްހިސާބުތަކުގެ ދުވަސްކަމަށްވާ އޮކްޓޯބަރު 20 ގައެވެ.
