އަމާންކަން ނެތް މުޖުތަމަޢެއް އެއްވެސް މައިދާނެއްގައި ތަރައްގީ ނުވާނޭ ކަމުގައި މިއަދުގެ ހުކުރު ޚުތުބާގައި ވިދާޅުވެއްޖެއެވެ.
"އިޖުތިމާޢީ އަމާންކަމުގެ މުހިންމުކަން" މި މައުޟޫއުގެ މައްޗަށް ޚާއްސަ ކުރެވިގެންދިޔަ މިއަދުގެ ހުކުރު ޚުތުބާގައި ވިދާޅުވެފައިވަނީ، އަމާންކަން ނެތް މުޖުތަމަޢެއްގައި ޖާނާއި މާލުވެސް ރައްކާތެރިއެއް ނުކުރެވޭނެ ކަމަށާއި، އަބުރާއި އިއްޒަތްވެސް ހިމާޔަތެއް ނުކުރެވޭނެ ކަމުގައެވެ.
އަދި އެފަދަ ވެއްޓެއްގައި ދިރިއުޅޭ ބަޔަކަށް ފުރިހަމަ ސިއްޙަތާއި ތަނަވަސްކަމުގެ އުފަލެއްވެސް ނުލިބޭނޭކަން ހާމަ ކުރައްވަމުން ހުކުރު ޚުތުބާގައި ބަޔާން ކުރައްވާފައިވަނީ، އެފަދަ މާހައުލެއްގައި އަބަދުމެ ތިބެން ޖެހޭނީ ކަންބޮޑުވުމާއި ހާސްކަމުގެ ތެރޭގައި ކަމުގައެވެ.
މިއާއި ޚިލާފަށް އަމާން ވެއްޓެއްގެ އަފްރާދުން، ޤާބިލްކަން ހުރި ދާއިރާތަކުގައި ތަރައްގީ ވާނެއެވެ. މޮޅެއް ދެރައެއްގެ ތަފާތެއް ނެތި، މުޅި މުޖުތަމަޢު ކުރި އަރާނެއެވެ. ދުނިޔެއާއި އާޚިރަތުގެ ގޮވަތި އާރާސްތު ކުރުމަށް ކެނޑިނޭޅި މަސައްކަތް ކުރާނެއެވެ.
މިއަދުގެ ހުކުރު ޚުތުބާގައި ވިދާޅުވި ގޮތުގައި، އެންމެހާ ދިވެހީންވެސް ލައްވަވާފައިވަނީ މުސްލިމުންގެ ގޮތުގައި ކަމަށާއި، އެކަމަށްޓަކާ ﷲއަށް ހަމްދާއި ޝުކުރު ދިވެހިންގެ މައްޗަށް ވާޖުބު ވާނޭ ކަމުގައެވެ. އަދި ދުނިޔެއާއި އާޚިރަތުގެ މަގު އަމާންވުން އޮތީ ﷲގެ ދީނަށް އަމަލުކޮށްގެން ކަމުގައިވެސް ޚުތުބާގައި ބަޔާން ކުރައްވާފައިވެއެވެ.
އިތުރަށް ޚުދުބާގައި ވިދާޅުވެފައިވަނީ ދިވެހީންގެ މެދުގައި އަަމަން އަމާންކަން ދެމި އޮންނާނީ އިސްލާމް ދީނަށް ތަބާވެ، ހެޔޮ އަމަލް ކުރުންމަތީ ސާބިތުވެ ތިބޭ މިންވަރަކުންކަން ދަންނަން ވާނެކަމަށާއި، ﷲ ވަހީ ބަސްފުޅުތަކަށާއި ކީރިތި ރަސޫލާގެ ސުންނަތުން އިބުރަތް ލިބިގަނެ މުޖުތަމައަކީ ހުރިހާ ގޮތަކުންވެސް އަމާން ތަނަކަށް ހެދިއްޖެ ނަމަ، އެންމެހައި މީސްތަކުންގެ މަސްލަހަތުތަކާއި، ހައްގުތައް ރައްކާތެރި ކުރެވޭނެ ކަމުގައެވެ.
