އެމެރިކާއިން ޔޫކުރެއިންއަށް އިތުރު 1 ބިލިއަން އެމެރިކާ ޑޮލަރުގެ ހަތިޔާރު ފޯރުކޮށްދޭނެކަން ޖޯ ބައިޑްން އިއުލާން ކުރައްވައިފިއެވެ.
މިފަހަރު އެމެރިކާއިން ޔޫކުރެއިންއަށް ފޯރުކޮށްދޭ ހަތިޔާރުގެ ޕެކޭޖުގެ ތެރޭގައި ޔޫކުރެއިންގެ އައްސޭރިފަށް ހިމާޔަތް ކުރުމަށް ބޭނުންވާ ހަތިޔާރުވެސް ފުރަތަމަ ފަހަރަށް ވަނީ ހިމަނާފައެވެ.
ވައިޓް ހައުސްއިން ހާމަ ކޮށްފައިވާ ގޮތުގައި ޔޫކުރެއިންއަށް އިތުރު 1 ބިލިއަން އެމެރިކާ ޑޮލަރުގެ ހަތިޔާރު ފޯރުކޮށްދެއްވާނެކަން އެމެރިކާއިން ހާމަކޮށްފައިވަނީ އެމެރިކާގެ ރައީސް ޖޯ ބައިޑްން ޔުކުރެއިންގެ ރައީސް ވޮލޮޑޮމިރު ޒެލެންސްކީއަށް ފޯނުން ގުޅުއްވާ ދެއްކެވި ވާހަކަފުޅުގައި ކަމުގައެވެ.
އެމެރިކާއިން މިފަހަރު ޔޫކުރެއިންއަށް ފޯރުކޮށްދޭ ހަތިޔާރުތަކުގެ ތެރޭގައި، އިތުރު އާރޓިލަރީ ހަތިޔާރުގެ އިތުރުން ޔޫކުރެއިންގެ އައްސޭރިފަށް ހިމާޔަތް ކުރުމަށް ބޭނުންވާ ހަތިޔާރާއި، އާރޓިލަރީއާއި އެޑްވާންސް ރޮކެޓް ސިސްޓަމަށް ބޭނުންވާ ވަޒަން ހިމެނެއެވެ. އެމެރިކާއިން ބުނެފައިވާ ގޮތުގައި މިއީ ޔޫކުރެއިންއިން އެގައުމުގެ އިރުމަތީގެ ޑޮމްބަސް ސަރަހައްދުގައި ކުރިޔަށް ގެންދާ ޑިފެންސިވް އޮޕަރޭޝަންތަކަށް ބޭނުންވާ ހަތިޔާރެވެ.
ހަތިޔާރު އެހީގެ އިތުރުން ޖޯ ބައިޑްންވަނީ، ޔޫކުރެއިންގެ ރައްޔިތުންނަށް ބޭނުންވާ ސާފު ބޯފެނާއި، ބޭހާއި، ސިއްޙީ ފަރުވާއަށް ބޭނުންވާ ސާމާނާއި، ކާނާއާއި އަދި ފިންޏާއި ހޫނުން ރައްކަތެރިވުމަށް ބޭނުންވާ، އިންސާނީ އެހީތެރިކަން ފޯރުކޮށްދިނުމަށް 225 މިލިއަން އެމެރިކާ ޑޮލަރުގެ އެހީވެސް ފޯރުކޮށްދިނުމަށް ހަމަޖެހިފައިވާކަން އިއުލާން ކޮށްފައެވެ.
މިފަހަރު އެމެރިކާއިން ޔޫކުރެއިންއަށް ފޯރުކޮށްދޭ ހަތިޔާރުގެ އެހީއަކީ، ދާދިފަހުން އެގައުމުގެ ކޮންގްރެސްއިން ފާސްކޮށްފައިވާ 40 ބިލިއަން އެމެރިކާ ޑޮލަރުގެ އެހީގެ ޕެކޭޖުން ފޯރުކޮށްދީފައިވާ އެހީއެވެ.
