ސްރީ ލަންކާގެ ކުރީގެ ރައީސް އަދި އިސްތިއުފާ ދެއްވި ބޮޑުވަޒީރު މަހިންދަ ރާޖަޕަކްސްގެ ކޮއްކޮ، އަދި އެގައުމުގެ ކުރީގެ ފިނޭންސް މިނިސްޓަރު ބަސިލް ރާޖަޕަކްސަ އެގައުމުގެ ގާނޫނުހަދާ މަޖިލިހުގެ މެމްބަރުކަމުން އިސްތިއުފާ ދެއްވައިފިއެވެ.

ސްރީލަންކާގެ ޕޮޑުޖަނާ ޕެރަމުނާ (SLPP)ގެ މެމްބަރުންނާ ހަވާލާދީ އެގައުމުގެ ލޯކަލް މީޑިއާތަކުން ރިޕޯޓު ކޮށްފައިވާ ގޮތުގައި ބަސިލް ރާޖަޕަކްސަވަނީ އޭނޭގެ އިސްތިއުފާގެ ސިޓީ ގާނޫނުހަދާ މަޖިލިހުގެ ސެކެޓްރީ ޖެނެރަލްގެ އަތްޕުޅަށް އަރުވާފައެވެ.

މިއަދު ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ބަސިލް ރާޖަޕަކްސަ ވިދާޅުވެފައިވަނީ، ގާނޫނުހަދާ މަޖިލިހުގެ މެމްބަރުކަމުން އިސްތިއުފާ ދެއްވުމަށް އޭނާ ނިންމެވީ މިވަގުތު ސަރުކާރަށް ނިސްބަތްވާ އެއްވެސް މަގާމެއްގައި ހުންނަވަން ބޭނުންފުޅު ނުވާތީ ކަމުގައެވެ.

އެހެންނަމަވެސް އޭނާ ވިދާޅުވި ގޮތުން ސިޔާސީ މަސައްކަތުގައި އޭނާ ދެމި ހުންނަވާނެއެވެ. އަދި ކުރިޔަށް އޮތްތަނުގައި ސަރުކާރުގެ އެއްވެސް ކަމެއްގައި ޝާމިލްވާނީ ކޮންމެހެން ބޭނުންވެއްޖެ ހާލަތެއްގައި އެކަންޏެވެ.

"ރައްޔިތުން ބޭނުންވަނީ ސިސްޓަމަށް ބަދަލުތަކެއް އަންނަން. އެހެންނަމަވެސް މިހާތަނަށް ކޮށްފައިވާ ކަމަކީ ހަމައެކަނި މީހުން ބަދަލު ކުރުން. އަހަރެން އުއްމީދު ކުރަނީ ކުރިޔަށް އޮތްތަނުގައި ސިސްޓަމަށް ރަގަޅު ބަދަލުތަކެއް އައުން،" ބަސިލް ރާޖަޕަކްސަ އިތުރަށް ވިދާޅުވެފައި ވެއެވެ.

ސްރީ ލަންކާގެ ވެރިކަމުގެ ނިޒާމަށް ގެންނެވުމަށް އެގައުމުގެ ރައީސް ގޮޓަބަޔަ ރާޖަޕަކްސް މިހާރު ވައުދު ވެވަޑައިގެންފައިވާ، ގާނޫނު އަސާސީއަށް ގެންނަ 21ވަނަ އިސްލާހު ގާނޫނުހަދާ މަޖިލިހުން ފާސްކޮށްފިނަމަ ބަސިލް ރާޖަޕަކްސައަށް ގާނޫނުހަދާ މަޖިލިހުގެ މެމްބަރުކަމުގައި ދެމިއެއް ނުހުރެވޭނެއެވެ. ސްރީ ލަންކާގެ ގާނޫނު އަސާސިއަށް ގެނައުމަށް ހަމަޖެހިފައިވާ 21ވަނަ އިސްލާހުގައި ވާގޮތުން، އެހެން ގައުމުގެއްގެ ރައްޔިތުކަން އޮން ފަރާތްތަކަށްވެސް ގާނޫނުހަދާ މަޖިލިހުގައި ތިބެވޭގޮތަށް އޮންނަ މާއްދާ އުވާލަން ޖެހެއެވެ.

ބަސިލް ރާޖަޕަކްސައަކީ ސްރީ ލަންކާގެ ރައްޔިތެއްގެ އިތުރުން އެމެރިކާގެ ރައްތިތުކަންވެސް އޮންނަ ބޭފުޅެކެވެ.

ސްރީ ލަންކާގެ އިތުރުން އެހެން ގައުމެއްގެ މެމްބަރުކަން އޮތް ނަމަވެސް، ބަސިލް ރާޖަޕަކްސައަށް ގާނޫނުހަދާ މަޖިލިހަށް އެތެރެވުމުގެ ފުރުސަތު ލިބިގެން ދިޔައީ، SLPPގެ ގައުމީ ލިސްޓުން އޭނާއަށް ޖާގަ ދިނުމާއި ގުޅިގެންނެވެ.

ބަސިލް ރާޖަޕަކްސައަށް ގާނޫނުހަދާ މަޖިލިހަށް ވަނުމުގެ ފުރުސަތު ދީފައިވަނީ، ގާނޫނު އަސާސިއަށް ގެނެސްފައިވާ 20ވަނަ އިސްލާހުގައި ވާގޮތުގެމަތިން، ދެގައުމުގެ ރައްޔިތުކަން އޮތުމާއިއެކުއެވެ.

ސްރީ ލަންކާގެ ސަރުކާރުގެ ފިނޭންސް މިނިސްޓަރުކަންވެސް ކުރައްވަމުން ވަޑައިގެންނެވި ބަސިލް ރާޖަޕަކްސައަށް ކެބިނެޓްގެ މަގާމް ގެއްލިފައިވަނީ، އޭނާގެ ބޭބެ މަހިންދަ ރާޖަޕަކްސަ އެގައުމުގެ ބޮޑުވަޒީރުކަމުން އިސްތިއުފާ ދެއްވުމަށް ފަހުއެވެ. އަދި ސްރީ ލަންކާއަށް މިއަދު ކުރިމަތިވެފައިވާ އިގްތިސާދީ ކާރިސާގެ ހާލަތަށް އެގައުމު އައިއައުމުގެ ވަރަށްބޮޑު ޒިންމާއެއް ގިނަ ބަޔަކު އޭނާގެ ބޮލުގައި އަޅުވައެވެ.