ގަލްފް ކޯޕަރޭޝަން ކައުންސިލް (GCC)ގައި ހިމެނޭ އަރަބި ގައުމުތަކުން، ޔޫކުރެއިންގެ މައްސަލާގައި ރަޝިއާއާއި ދެކޮޅަށް ދަތިކުރުމުގެ ފިޔަވަޅު ނާޅާނެ ކަމުގައި، ރަޝިއާގެ ޚާރިޖީ ވަޒީރު ސާރގޭ ލާވްރޯވް ވިދާޅު ވެއްޖެއެވެ.
"ހުޅަނގުގެ ގައުމުތަކުން ޔޫކުރެއިންއާއި ގުޅޭގޮތުން ކަން ކޮށްފައިވާ ގޮތުގުގެ ނަތިޖާއެއްގެ ގޮތުން ދުނިޔޭގެ ކުރިމަތިވެފައިވާ މިހާރުގެ ހާލަތު، ގަލްފް ކޯޕަރޭޝަން ކައުންސިލްގައި ހިމެނޭ އަރެމެންގެ އެކުވެރި ގައުމަތަކަށް އެބަ އިނގޭ،" ސައުދީ އަރަބިއާއަށް މިހާރު ކުރައްވަމުން ގެންދަވާ ދަތުރުފުޅުގައި ނޫސްވެރިންނަށް މައުލޫމާތު ދެއްވަމުން ލާވްރޯވް ވިދާޅުވެފައި ވެއެވެ.
"ހުޅަނގުގެ ގައުމުތަކުން ރަޝިއާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގައި ބައިވެރިނުވެ، ބައިނަލް އަގުވާމީ މަސްރަހުގައި މި މައްސަލައާއި ގުޅޭގޮތުން މިގައުމުތަކުން ވަކިއަތަކަށް ނުޖެހި ތިބޭނެކަން، ޝުކުރުވެރިކަމާއެކު ޔަގީންކޮށް އަރުވަން،" އޭނާ އިތުރަށް ވިދާޅުވެފައި ވެއެވެ.
ފާއިތުވެދިޔަ ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އަރާ ދޭންފެށި އުދުވާނި ހަމަލާތަކާއި ގުޅުގެން އެމެރިކާއާއި ޔޫރަޕުންވަނީ ރަޝިއާއާއި ދެކޮޅަށް އިގްތިސާދީގޮތުން ހަރުކަށި ފިޔަވަޅުތަކެއް އަޅާފައެވެ.
އަރަބި ގައުމުތަކުންވަނީ ޔޫކުރެއިންގެ މައްސަލައަށް ސިޔާސީ ހައްލެއް ހޯދުމަށް ގޮވާލާފައެވެ. ސައުދީ އަރަބިއާގެ ޚާރިޖީ ވަޒީރު ޕްރިންސް ފައިސަލް ބިން ފަރުހާންވަނީ، މިމައްސަލަ ހައްލުކުރުމަށް މަސައްކަތް ކޮށްދިނުމަށް ސައުދީ އަރަބިއާ ތައްޔާރަށް އޮތްކަމަށް ލާވްރޯވްއަށް ވިދާޅުވެފައެވެ.
ލާވްރޯވް ވިދާޅުވެފައިވަނީ، ރަޝިއާއާއި އެމެރިކާ އަދި ޔޫރަޕްގެ ގައުމުތަކާމެދު މަސްރަހު ހޫނުވެފައިވި ނަމަވެސް، އަރަބި ގައުމުތަކުން ރަޝިއާއާއެކު އޮތް ގުޅުން އިތުރަށް ތަރައްގީ ކުރުމަށް ބޭނުންވާ ކަމުގައެވެ.
