ޔޫކުރެއިންގައި ރަޝިއާއިން ކުރަމުންދާ ހަނގުރާމާގައި، އިންޔާނިއްޔަތާއި ޚިލާފް ޖަރީމާތައް ހިންގުމުގެ ކުށް ސާބިތުވެ، ރަޝިއާ ސިފައިންގެ ދެމީހަކު 11 އަހަރާއި 6 މަހަށް ޖަލަަށްލާން ޔޫކުރެއިންގެ ކޯޓަކުން ހުކުމް ކޮށްފިއެވެ.
އެލެގްޒެންޑަރ ބޮބިކިން އަދި އެލެގްޒެންޑަރ އިވަނޯވް ނަމަކަށް ކިޔާ، ރަޝިއާ ސިފައިންގެ މި ދެމީހުންވެސް ވަނީ ކޯޓުގައި އެމީހުންގެ ކުށަށް އިއުތިރާފް ވެފައެވެ. މި ދެމީހުންނަކީވެސް، ރަޝިއާ އަސްކަރިއްޔާގެ އާރޓިލަރީ ޔުނިޓަށް ނިސްބަތްވާ ދެމީހުންނެވެ. އަދި ދެމީހުންވެސް ވަނީ ކާރކިވްގެ އިރު އުތުރުގައި ހުރި ސްކޫލަކަށާއި އަދި އެނޫން ތަންތަނަށްވެސް ހަމަލާ ދީފައެވެ.
ޔޫކުރެއިން ސިފައިން ހައްޔަރުކުރި މި ސިފައިންވެސް، މެދުތެރޭ ޔޫކުރެއިންގައި ހުރި ކޯޓަކުން ހުކުމް އިއްވިއިރު، ހުކުމް އަޑުއަހަން ތިބެފައިވަނީ ދަގަޑުންނާއި އަދި ބިއްލޫރިން ހަދާފައި ހުރި ކޮށްޓެއްގައެވެ.
ރަޝިއާ ސިފައިންގެ މި ދެމީހުންގެ ދިފާޢީ ވަކީލުން ކޯޓުގައި ވިދާޅުވެފައިވަނީ، ދެމީހުންވެސް ކޮށްފައިވާ ކުށަކީ، އެމީހުންނަށް އައި އަމުރުތަކަށް ތާބާވުމުގެ ގޮތުން ހިންގާން ޖެހުނު ކުށްތަކެއް ކަމުގައެވެ. އެހެންނަމަވެސް ކޯޓުންވަނީ މި އުޒުރު ބަލައި ނުގަންނަން ނިންމާފައެވެ.
މިއީ ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން ރަޝިއާ ސިފައިންގެ މައްޗަށް އެގައުމުގައި ހިންގި ދެވަނަ ޝަރީއަތެވެ. މީގެ ކުރިން ޔޫކުރެއިންގެ ކޯޓަކުން ވަނީ، ރަޝިއާ ސިފައިންގެ މީހަކު އުމުރަށް ޖަލަށް ލާން ހުކުމް ކޮށްފައެވެ. އޭނާ އުމުރަށް ޖަލަށް ލާން ހުކުމް ކޮށްފައިވަނީ، މިހާރު ކުރިޔަށްދާ ހަނގުރާމާގައި، ޔޫކުރެއިންގެ އާންމުންގެ މީހަކު މެރިކަމަށް ކޯޓުގައި އޭނާ އެއްބަސް ވުމާއު ގުޅިގެންނެވެ.
