ފުވައްމުލަކުގައި ތެޔޮ ތާންގިއެއް ގޮވައި އެކަކަށް ސީރިއަސް އަނިޔާތަކެއް ވެއްޖެއެވެ.
މި ހާދިސާ ހިނގާފައިވަނީ ގޭސް ކަޓާއެއް ބޭނުން ކޮށްގެން މަސައްކަތް ކުރަން އުޅުމުގެ ތެރޭގައި ކަމަށް އެމްއެންޑީއެފްއިން ވިދާޅުވިއެވެ. މި ހާދިސާގައި އަނިޔާ ލިބިފައިވަނީ އެމަސައްކަތް ކުރަން އުޅުނު ބަންގްލަދޭޝް މީހަކަށެވެ.
މިހާދިސާގައި އަނިޔާވި މީހާއަށް ވަނީ ސީރިއަސް އަނިޔާތަކެއްވެފައެވެ. މި ހާދިސާ ހިނގާފައި ވަނީ ފުވައްމުލަކު ބަނދަރު ސަރަހައްދު (ދޫނޑިގަން އަވަށް)ގައި ހުންނަ ޕެޓްރޯލް ޝެޑް ސައިޓްގައެވެ. ފުވައްމުލަކު ސިޓީގެ މޭޔަރު އިސްމާއިލް ރަފީގް ވިދާޅުވީ، އެ ސަރަހައްދުގައި ތެޔޮ ހުސްކޮށްފައި ހުރި ތާނގިއެއް، ދަގަނޑު ގަންނަ ބަޔަކު އޭތި ކަފަނިކޮށް ގޮވީ ކަމަށެވެ.
ރަފީގް ވިދާޅުވިގޮތުގައި، އެއީ ވަރަށް ދުވަސްވަންދެން ތެޔޮ ހުސްކޮށްފައި ހުރި ތާނގިއެކެވެ. އެ ތާނގި ގޮވަން މެދުވެރިވި ސަބަބު ސާފު ނުވާ ކަމަށް އޭނާ ވިދާޅުވިއެވެ. އެއީ ފުވައްމުލައްކުގައި ޕެޓްރޯލް ޝެޑެއް ހިންގަމުންދާ ހަވްކްސް ކުންފުނިން ބާ ދަގަނޑު ގަންނަ ފަރާތްތަކަށް ދޫކޮށްފައިވާ ދަގަނޑު ތެޔޮ ތާނގިއެވެ.
މިހާދިސާއާއި ގުޅިގެން ބަލަންޖެހޭ ކަންކަން ކަމާއިބެހޭފ ފަރާތްތަކުން ދަނީ ބަލަމުންނެވެ.
