އިންޑިޔާއިން ރާއްޖެ ހިފާކަށް ނޫޅެކަން ރައީސް ޔާމީނަށް މާރަނގަޅަށް އެނގިވަޑައިގަންނަވާ ކަމުގައި އެމްޑީޕީގެ ކުރީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.
ހަސަން މިހެން ވިދާޅުވީ ރާއްޖޭގައި ތިބި އިންޑިއާ ސިފައިން ބޭލުމަށާއި، އިންޑިއާ ސަރުކާރުން ހިންގަމުންދާ ބައެއް ކަންކަމާއި މެދު ހިތްހަމަ ނުޖެހި އިދިކޮޅުން ހިންގަމުންދާ "އިންޑިއާ އައުޓް" ކެމްޕެއިނާއި ދެކޮޅަށް ކުރެއްވި ޓުވީޓެއްގައެވެ.
ހަސަން ވިދާޅުވީ އިންޑިއާއަކީ ދިވެހިންގެ ތެރެއިން އެންމެ ގިނަ ބަޔަކު ބޭސްފަރުވާއަށް ޚިދުމަތް ހޯދާ ގައުމުކަމަށެވެ. އަދި އެނޫން ކަންކަމުގައިވެސް އިންޑިއާއަކީ ރާއްޖޭގެ އެންމެ ބޮޑު އެކުވެރިއާއަށްވާއިރު، އިންޑިއާރާއްޖެ ހިފާނެކަމަށް ބުނެ ދައްކަމުންދަނީ ހަމަޖެހޭ ވާހަކަތަކެއް ނޫންކަމަށެވެ. މިކަމުގައި އެންމެ އިސްކޮށް ހަރަކާތްތެރިވާ ރައީސް ޔާމީނަށްވެސް އިންޑިއާއިން ރާއްޖެ ހިފަން ނޫޅޭކަން ވަރަށް ސާފުކޮށް އެނގިވަޑައި ގަންނަވާނެކަމަށް ހަސަން ވިދާޅުވިއެވެ.
ދިވެހީންގެ ތެރެއިން ގިނަ ރައްޔިތުން އެންމެ ގިނައިން ބޭހަށް ދާން ޖެހިފައިވާ ޤައުމަކީ އިންޑިއާ. އެޤައުމާ ޖެހިގަނެގެން އުޅުނީމާ ދިވެހީންނަށް ލިބޭ ދެރަ އިންތިހާއަށް ބޮޑު. އިންޑިޔާއިން ރާއްޖެ ހިފާކަށް ނޫޅެ. އެކަން ރ. ޔާމީނަށް މާރަނގަޅަށް އެނގިވަޑައިގަންނަވާނެ.
– ހަަސަން ވިދާޅުވިއެވެ.
އިދިކޮޅު ކޯލިޝަނުން ކުރިއަށް ގެންދާ "އިންޑިއާ އައުޓް" ހަރަކާތާއި ދެކޮޅަށް ވެރިކަން ކުރާ މައި ޕާޓީ އެމްޑީޕީން "ބާކީ ނުވޭ" ނަމުގައި ސޯޝަލް މީޑިއާގައިވަނީ ކެމްޕޭނެއް ފަށާފައެވެ. މިކެމްޕެއިންގައި އިސްކޮށް ހަރަކާތްތެރިވަނީ އެމްޑީޕީގެ ރައީސް މުހައްމަދު ނަޝީދެވެ. މިކެމްޕެއިންގައި ސަރުކާރަށް ތާއިދު ކުރާ ފަރާތްތަކާއި އަދި ސަރުކާރުގެ ސިޔާސީ މުވައްޒަފުން މީސް މީޑިއާގައި ކެމްޕޭނެއް ފަށައިފައެވެ. އެމްޑީޕީއަށް ނިސްބަތްވާ ރައްޔިތުން މަޖިލީހުގެ މެންބަރުން ވެސް ވަނީ މިކެމްޕޭންގައި ބައިވެރިވާން ފަށާފައެވެ.
އެ މަނިކުފާނު ވިދާޅުވީ، ސިޔާސީ ވެރިން ސިޔާސީ ބޭނުމަށްޓަކައި ދިވެހިން ބާކީވެ، ނިކަމެތި ނުކުރުމަށް ސިޔާސީ އެންމެން ވިސްނަން ޖެހޭނެ ކަމަށެވެ. "އިންޑިއާ އާ ދެކޮޅަށް ހިންގާ ކެމްޕެއިނަކީ ދިވެހިންގެ ތާއީދު އޮތް ކަމެއް ނޫން ކަން ސާބިތު ވަނީ ބައިވެރިވާ މީހުން މަދުކަމުން #ބާކީނުވޭ،" ނަޝީދު ވިދާޅުވިއެވެ.
ސަރުކާރުގެ ބައެއް ވުޒާރާތަކުގެ ވެރިން އަންނަނީ، ޔާމީންގެ ވެރިކަމުގައި މާލެ އަށް ދިމާވި ފެނުގެ ކާރިސާގައި އިންޑިއާ އިން ދިން އެހީތެރިކަމާއި ކޯވިޑް-19 ގައި ދިން އެހީތަކާއި އަދި ތަރައްގީގެ އެކި މަޝްރޫއުތަކުގެ ފޮޓޯތައް އެ ހޭޝްޓެގާއެކީ ޓުވީޓު ކުރަން ފަށައިފައެވެ.
ރާއްޖޭގައި ތިބި އިންޑިއާ ސިފައިން ރާއްޖެ އިން ބޭލުމަށް ގޮވާލައި އިދިކޮޅު ޕީޕީއެމް އިސްވެ އޮވެ ހިންގާ "އިންޑިއާ އައުޓް" ހަރަކާތް ހުއްޓުވަން ރައީސް ސޯލިހް ވަނީ އޭޕްރީލް މަހުގެ 21 ވަނަ ދުވަހު ރިޔާސީ ގަރާރެއް ނެރުއްވާފައެވެ. އެގަރާރު ނެރުއްވި ފަހުން އިންޑިއާ ސިފައިން ރާއްޖެ އިން ބޭލުމަށް ގޮވާލައި ބެނާއެއް ދެމުން ވެސް ވަނީ ޖިނާއީ ކުށަކަށް ހަދާފައެވެ. ފުލުހުން ގެންދަނީ އިންޑިއާ ސިފައިން ރާއްޖެ އިން ބޭލުމަށް ގޮވާލައި ހަރުކުރާ ބެނާތަކާއި ދިދަތައް ވެސް ނަގަމުންނެވެ.
One Response
ނުހިފިއެއްކަމަކު މިނިވަން ޤައުމެއްގެ ހުރިހާ ބަހާތަކެއްގައި އެމީހުންނަށް ބޭނުންއިރަކު ބޭނުންގޮތަކަށް އަތްލެވި، ޤައުމުގެ ދާޚިލީ ކަންކަމުގެ ތެރެއަށް އަތްބާނައި، އެމީހުން ހިތުހުރިގޮތަކަށް މިތާ އުޅެން އެމީހުންނަށް ފުރުޞަތު އެބައޮތެއްނުން!