ޔޫކުރެއިން ހަނގުރާމައަށް ދާން ދެކޮޅު ހެދުމާއި ގުޅިގެން ވަޒީފާއިން ވަކިކުރި ރަޝިއާގެ ނެޝަނަލް ގާރޑްގެ 115 ސިފައިން ވަޒީފާއިން ވަކި ކޮށްފައިވަނީ ރަގަޅަށް ކަމަށް ނިންމާފައިވާކަން ރަޝިއާގެ ކޯޓަކުން ހާމަ ކޮށްފިއެވެ.
މިއީ، ފާއިތުވެދިޔަ ފެބްރުއަރީ މަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން، މިހަގުރާމައަށް ދިއުމަށް ރަޝިއާގެ އަސްކަރިއްޔާގެ ތެރެއިން ބަޔަކު މީހުން ދެކޮޅު ހެދިކަން މީޑިއާތަކަށް ހާމަވެގެންދިޔަ ފުރަތަމަ ފަހަރެވެ.
ރަޝިއާގެ ދެކުނުގެ ކަބާރޑިނޯ-ބަލްކާރިއާ ރިޕަބްލިކްގެ ކޯޓުން ބުނެފައިވަނީ ސިފައިން ވަޒީފާއިން ވަކި ކުރުމާއި ގުޅުންހުރި ލިޔެކިޔުންތައް ބަލާ އެ ކޯޓުން ސިފައިންނާ ސުވާލުވެސް ކޮށްފައިވާ ކަމަށެވެ. ރަޝިއާގެ ނޭޝަނަލް ގާރޑްއަކީ އެގައުމުގެ އަސްކަރިއްޔާއާއި ވަކީން އޮން، ގައުމުގެ އެތެރޭގެ ސަލާމަތާއި ގުޅުންހުރި ފައުޖެކެވެ.
ކޯޓުން ބުނެފައިވަނީ ސިފައިން "އެމީހުންގެ އޮފިޝަލް ޑިއުޓީއަށް ނިކުތުމަށް ގަސްތުގައި ދެކޮޅު ހަދާފައި" ވާކަމުގައެވެ. އަދި މައްސަލަ އިސްތިއުނާފް ކުރުމަށް ސިފައިން ހުށަހެޅި ހުށަހެޅުން ކޯޓުން ބަލައިގެންފައެއް ނުވެއެވެ.
ކޯޓުން އިތުރަށް ބުނެފައިވަނީ، އަސްކަރިއްޔާގެ ސިއްރުތައް ހާމަ ނުކުރުމުގެ ގޮތުން މައްސަލަ ކުރިޔަށް ގެންގޮސްފައިވަނީ ސިއްރު އަޑުއެހުންތަކެއްގެ ގޮތުގައި ކަމަށެވެ.
ކޯޓުގެ ޕްރެސް ސާރވިސްއާއި ހަވާލާދީ އިންޓަރފެކްސް ނޫސް އޭޖެންސީން ހާމަ ކޮށްފައިވާ ގޮތުގައި މި ސިފައިންވަނީ މޮސްކޯއިން ޔޫކުރެއިންގައި ކުރިޔަށް ގެންދާ "ސްޕެޝަލް އޮޕަރޭޝަން"އާއި ގުޅުންހުރި ކަންކަމުގައި ބައިވެރިވުމަށް ދެކޮޅު ހަދާފައެވެ.
