ކައުންސިލްތަކަށް ބޭނުންވާ މުވައްޒިފުން ގޯދުމަށް ސިވިލްސާވިސް ކޮމިޝަނުން ދޭންޖެހޭ ހުއްދަ ނުދޭކަމަށް ވުނެ ދެކެވެމުންދާ ވާހަކަތަށް ސިވިލްސާވިސް ކޮމިޝަނުން ދޮގުކޮށްފިއެވެ.

އަތޮޅު އަދި ރަށު ކައުންސިލް އިދާރާތަކުގެ އިދާރީ އޮނިގަނޑުތަކާ ގުޅޭ ގޮތުންނާއި އެ އިދާރާތަކަށް ބޭނުންވާ މަގާމުތަކަށް މުވައްޒަފުން ނެގުމަށް ހުއްދަ ނުދޭކަމަށް ބުނެ، އޮޅުންއަރާ ގޮތަށް ދެކެވެމުންދާ ވާހަތަކާއި ގުޅިގެން ނެރުނު ބަޔާނުގައެވެ. ސިޓީ ކައުންސިލުން މިފަދަ ބަޔާނެއް ނެރެފައިވަނީ މާލެ ސިޓީ ކައުންސިލުންވެސް އެ ކައުންސިލަށް ބޭނުންވާ މުވައްޒިފުން ނެގުމުގައި ހުރަސްތަކެއް ހުރިކަމަށްބުނެ ސީއެސްސީއަށް ފާޑު ވިދާޅުވެފައިވަނިކޮށެވެ.

ސިވިލް ސާވިސް ކޮމިޝަނުން ވިދާޅުވީ ކައުންސިލްތަކުގެ އޮނިގަނޑުގައި ހިމެނޭ މަގާމުތަކަށް މުވައްޒަފުން ހޯދުމަށް އިޢުލާންކުރުމުގެ ކުރިން އެ ކޮމިޝަނުން އެއްވެސް ހުއްދައެއް ހޯދަން ނުޖެހޭނެކަން ކައުންސިލް އިދާރާތަކަށް ވާނީ އަންގާފައިކަމަށެވެ. އަދި އިދާރީ އޮނިގަނޑުގައިވާ ހުސް މަގާމުތަކަށް ފިނޭންސް މިނިސްޓްރީގެ ހުއްދައާއެކު މުވައްޒަފުން ހޯދުމަކީ އެ އިދާރާގެ ޒިންމާއެއް ކަމުގައި ދަންނަވާފައިވާނެކަމަށެވެ.

މީގެ އިތުރުން، ކައުންސިލްތަކުގެ އިދާރީ އޮނިގަނޑުގެ ބޭރުން ވަކި ޕްރޮޖެކްޓަކަށް ނުވަތަ ކޮންޓްރެކްޓް އުޞޫލުން މުވައްޒަފެއް ނެގުމަށް ކައުންސިލަކުން ބޭނުންވާ ނަމަ، ކަމާ ގުޅޭ މައުލޫމާތު އެ ކޮމިޝަނަށް ފޮނުވުމުން އެ މަގާމުތަކަށް، ކަނޑައެޅިފައިވާ ޤަވާއިދާއި އުޞޫލުތަކުގެ ތެރެއިން އެ ކޮމިޝަނުން ދަނީ ހުއްދަ ދެމުން ކަމުގައެވެ. އަދި، ކައުންސިލް އިދާރާތަކުގެ އިދާރީ އޮނިގަނޑު އެކުލަވާލާނެ އުޞޫލެއް ލޯކަލް ގަވަރމަންޓް އޮތޯރިޓީ ގުޅިގެން އެކުލަވާލައި އާންމުކުރެވިފައިވާނެކަމަށް ސިވިލްސާވިސް ކޮމިޝަނުން ވިދާޅުވިއެވެ.

އެ އުޞޫލުގެ ތެރެއިން ކައުންސިލްތަކުގެ އިދާރީ އޮނިގަނޑު އެކުލަވާލުމަކީ ކައުންސިލް އިދާރާތަކުގެ ޒިންމާއެކެވެ. އޮނިގަނޑު ފާސްނުވިކަމުގައި ވީނަމަވެސް، ކައުންސިލް އިދާރާތަކަށް ކޮންމެހެން ބޭނުންވާ ވަޒީފާތަކަށް މީހުން ހޯދުމަށް އެ ކައުންސިލް އިދާރާގެ ބަޖެޓުން ޚަރަދު ކުރެވެން ހުރި ނަމަ، ކަނޑައަޅާފައިވާ ޤަވާއި ދާއި އުޞޫލުތަކުގެ ތެރެއިން ހުއްދަ ދެމުން ދާކަމަށްވެސް ސިވިލްސާވިސް ކޮމިޝަނުން ވަނީ ވިދާޅުވެފައެވެ.