ރަޝިއާއިން ޔޫކުރެއިންއަށް ދެމުންދާ އުދުވާނި ހަމަލާތަކުގައި ބައިވެރިވެ، ޔޫކުރެއިންގެ ރައްޔިތުންނާއި ދެކޮށް އިންސާނިއްޔަތާއި ޚިލާފް ޖަރީމާތައް ހިންގާފާކަމުގު ކުށް ސާބިތު ވުމާއި ގުޅިގެން، ރަޝިއާ ސިފައިންގެ ޓޭންކް ކޮމާންޑަރެއް ކަމުގައިވާ ވަޑިމް ޝިޝިމަރިން އުމުރަށް ޖަލަށް ލާން ޔޫކުރެއިންގެ ކޯޓަކުން ހުކުމް ކޮށްފިއެވެ.

ޔޫކުރެއިން ސިފައިން ހައްޔަރު ކޮށްފައިވާ، ސާރޖަންޓް ވަޑިމް ޝިޝިމަރިންގެ މައްޗަށް ސާބިތުވެފައިވަނީ، ޔޫކުރެއިންގެ އިރު އުތުރުގެ އަވަށެއް ކަމުގައިވާ ޗުޕަޚިވްކާ ވިލެޖުގައި ފެބްރުއަރީމަހުގެ 28ވަނަ ދުވަހު، އުމުރުން 62 އަހަރުގެ ޔޫކުރެއިން ރައްޔިތެއް ކަމުގައިވާ އޮލެކްސެންޑަރ ޝެލިޕޯވް ގަސްތުގައި މަރާލާފައިވާ ކަމުގެ ތުހުމަތެވެ.

މި ޝަރީއަތުގައި ވަޑިމް ޝިޝިމަރިންވަނީ އުމުރުން 62 އަހަރުގެ އޮލެކްސެންޑަރ ޝެލިޕޯވްއަށް ބަޑިން ހަމަލާ ދިންކަމަށް އެއްބަސް ވެފައެވެ. އެހެންނަމަވެސް އޭނާ އަމަލު ކޮށްފައިވަނީ ކޮމާންޑަރުންގެ އަމުރަށް ކަމަށްބުނެ، އޭނާވަނީ، މަރުވި އޮލެކްސެންޑަރ ޝެލިޕޯވްގެ ހުވަފަތް އަންހެނުންގެ ކިބައިން މާފަށް އެދިފައެވެ.

ޔޫކުރެއިންގައި މިހާރުވެސްދަނީ، ރަޝިއާ ސިފައިން އެގައުމުގައި ހިންގާފައިވާ އިންސާނިއްޔަތާ ޚިލާފް އެހެން އެތައް ޖަރީމާއެއްވެސް ތަހުގީގު ކުރަމުންނެނެވެ.

ޝަރީއަތުގައި ވަޑިމް ޝިޝިމަރިންއަށް ހުކުމް އިއްވަމުން ފަނޑިޔާރު ވިދާޅުވެފައިވަނީ، އޭނާގެ ކޮމާންޑަރުންގެ "ޢައިރު ގާނޫނީ އަމުރުތައް" ޝިޝިމަރިން ތަންފީޒު ކޮށްފައިވާ ކަމުގައެވެ.

"އޭނާ ހިންގާފައިވާ ކުށަކީ، ސުލްހައާއި، ސަލާމަތާއި، އިންސާނިއްޔަތާއި އަދި ބައިނަލްއަގުވާމީ ގާނޫނުތަކާވެސް ޚިލާފަށް ހިންގާފައިވާ އަމަލެއް.. އަދި މިއަށްވުރެ (އުމުރު ދުވަހުގެ ހުކުމަކަށްވުރެ) ކުޑަ ހުކުމެއް އިއްވަން ޖެހޭ ސަބަބެއް އޮތް ކަމުގައި ކޯޓަކަށް ނުފެނޭ،" ފަނޑިޔާރު ހުކުމް އިއްވަމުން ވިދާޅުވެފައިވާކަމަށް ރޮއިޓާރސްއިން ރިޕޯޓު ކޮށްފައި ވެއެވެ.

ޝިޝިމަރިންގެ ގާނޫނީ ވަކީލު ވިދާޅުވެފައިވަނީ، ކޯޓުން އިއްވި ހުކުމް އިސްތިއުނާފް ކުރާނޭ ކަމުގައެވެ.

އުމުރުން 21 އަހަރުގެ ޝިޝިމަރިންގެ މަސައްކަތް ކޮށްފައިވަނީ ރަޝިއާގެ އަސްކަރިއްޔާގެ ކަންޓެމިރޮރޮވްސްކަޔަ ޓޭންކު ޑިވިޝަންގައެވެ. އުމުރުން 62 އަހަރުގެ އޮލެކްސެންޑަރ ޝެލިޕޯވް މާރާލާފައިވަނީ، ޝިޝިމަރިންއާއި އޭނާގެ ޔުނިޓްގެ އެހެން އެކުވެރިޔަކާ ދެމީހުން ގަދަކަމުން ފޭރިގަތް ކާރެއްގައި ދަތުރުކުރަމުން ދަނިކޮށެވެ. އޭނާއާއި ޔުނިޓްގެ އެކުރެވިއަކު ޕްރައިވެޓް ކާރެއް ފޭރިގަނެ އެކާރުގައި ދަތުރުކުރަމުން ދިޔައީ، ދެމީހުންގެ ޔުނިޓަށް ޔޫކުރެއިން ސިފައިންގެ ހަމަލާތައް އަމާޒުވުމާއި ގުޅިގެންނެވެ.

ޝިޝިމަރިން ކޯޓުގައި ބުނެފައިވަނީ، އޭނާ ޝެލިޕޯވްއަށް ހަމަލާ ދިންއިރު އޭނާ ހުރީ ފޯނުން ވާހަކަ ދައްކަން ކަމަށާއި، އޭނާއަށް ބަޑިން ހަމަލާދީ މަރާލުމަށް އޭނާއަށް އަމުރު އައިކަމަށެވެ.

ޝިޝިމަރިންގެ ދިފާއީ ވަކީލު ވިދާޅުވެފައިވަނީ، ޝިޝިމަރިން ޝެލިޕޯވްއަށް ހަމަލާ ދީފައިވަނީ، ހަމަލާ ދިނުމަށް ދެފަހަރަށް އިންކާރު ކުރުމަށްފަހު ކަމަށެވެ. އަދި ގާނޫނީ ވަކީލު ވިދާޅުވެފައިވަނީ، އޭނާ ޝެލިޕޯވްއަށް ހަމަލާދީފައިވަނީ އަމިއްލަ ސަލާމަަތަށް ނުރައްކާ އޮތްކަމަށް ގަބޫލުކޮށް ކަމަށާއި، އަދި އޭނާ މީހަކު މެރުމަށް ގަސްތު ކޮށްފައިވާކަމަށް ސުވާލު އުފެދޭ ކަމަށެވެ.