ފުޓްބޯޅަ ކުޅެނިކޮށް އިއްޔެ ހަވީރު ކުއްލިއަކަށް ދަނޑަށް ވެއްޓުމުން ކުޅުދުއްފުށީ ރީޖަނަލް ހޮސްޕިޓަލް (ކޭއެޗްއާރު)އަށް ގެންގޮސް ފަރުވާދޭން ފެށި އެ ހޮސްޕިޓަލުގެ ސީނިއާ ލެބޯޓްރީ ޓެކްނޮލޮޖިސްޓް މުހައްމަދު ހަސަން (ސެންޓަރު މުހައްމަދު) ނިޔާވެއްޖެއެވެ.
ހޮސްޕިޓަލްގައި މުހައްމަދު މަސައްކަތް ކުރައްވާތާ 25 އަހަރު ވެއްޖެއެވެ. ހޮސްޕިޓަލް ހިންގުމުގައިވެސް އަދި ހޮސްޕިޓަލްގެ ޒިންމާދާރު ވެރިޔާގެ ގޮތުގައިވެސް މުހައްމަދު ކުރިން މަސައްކަތް ކުރެއްވިއެވެ. ނިޔާވިއިރު ހުންނެވީ ހޮސްޕިޓަލްގެ ސީނިއާ ލެބޯޓްރީ ޓެކްނޮލޮޖިސްޓްގެ މަގާމުގައެވެ.
ހޮސްޕިޓަލުގެ އޮފިޝަލަކު ވިދާޅުވި ގޮތުގައި މުހައްމަދު ހަސަން ނިޔާވި ސީދާ ސަބަބެއް އަދި ސާފެއް ނުވެއެވެ. އެކަމަކު ދާއިމީ އެއްވެސް ބައްޔަކަށް އޭނާ ބޭސްކުރަމުން އައި ކަމެއް އެނގިވަޑައިގެންފައި ނެތެވެ. ހޮސްޕިޓަލުގެ ހިދުމަތުގައި މުހައްމަދު ހަސަން އުޅުއްވާތާ 25 އަހަރު ވެއްޖެއެވެ. އޭނާ ވަނީ އެ ހޮސްޕިޓަލުގެ ވެރިއެއްގެ މަގާމާއި ޒިންމާދާރުވެރިޔާގެ މަގާމު ވެސް ވަރަށް ގިނަ ދުވަސްތަކެއް ވަންދެން ފުރުއްވައިފައެވެ.
އަގު ނުކުރެވޭ ފަދަ ހިދުމަތްތަކެއް ކޮށްދެއްވި މުހައްމަދު ހަސަން ނިޔާވުމަކީ ސިއްހީ ދާއިރާ އަށް ފޫނުބެއްދޭ ވަރުގެ ގެއްލުމެއް ކަމަށް ހޮސްޕިޓަލުން ނެރުނު ތައުޒިޔާގެ މެސެޖުގައިވެއެވެ. އެ ހޮސްޕިޓަލަށް ގިނަ އަހަރުތަކެއް ވަންދެން ހިދުމަތްކޮށްދެއްވި އޭނާގެ ބައްފަ، ހަސަން އަހުމަދު (ސެންޓަރު ހަސަންބެ) ނިޔާވީ މިދިޔަ ފެބްރުއަރީ މަހުގެ ތެރޭގައެވެ.
