ޕީޕީއެމްގެ އިވެންޓު ކޮމިޓީގެ ޗެއަރ، ރައްޔިތުންގެ މަޖިލިހުގެ ކުރީގެ މެމްބަރު މުހައްމަދު އިސްމާއިލް ޖިނާއީ ކުށެއް ކުރިކަމަށް ޕޮލިހުންނަށް ދެއްކޮފައި ނުވާތީ، އޭނާ ބަންދުން ދޫކޮށްލުމަށް ކޯޓުން އަމުރު ކޮށްފިއެވެ.
އިންޑިއާ އައުޓް ހަރަކާތް ހިންގާކަމުގެ ތުހުމަތުގައި، ކޯޓު އަމުރެއްގެދަށުން އޭނާ ދެވަނަ ފަހަރަށް ފުލުހުން ހައްޔަރު ކޮށްފައިވަނީ ރޭގެ ވަގުތެއްގައެވެ. ހައްޔަރު ކުރުމަށް އަމުރު ހިފައިގެންދިޔަ އިރު މުހައްމަދު އިސްމާއިލް އިންނެވީ ކެފޭއެއްގެ ތެރޭގައެވެ.
"އިންޑިއާ އައުޓް" ނަމުގައި ކުރިއަށްގެންދާ ހަރަކާތް ރާވާ، ހިންގާކަމަށް ތުހުމަތުކުރެވޭތީވެ މުހައްމަދު އިސްމާއިލް ވަނީ މިދިޔަ ބުދަ ދުވަހުވެސް ހައްޔަރުކޮށްފައެވެ.
މުހައްމަދު އިސްމާއިލް ހައްޔަރު ކުރުމާއިއެކު މާލޭގައި އިދިކޮޅު ފަރާތްތަކުން ވަނީ "އިންޑިއާ އައުޓް" ހަރަކާތް މަގުތަކުގައި ރޭވެސް ކުރިއަށް ގެންގޮސްފައެވެ. އިންޑިއާ އައުޓް ހަރަކާތުގައި މަދު ބަޔަކު ބައިވެރިވިނަމަވެސް، ހަރަކާތް ހުއްޓުވުމަށް ފުލުހުންގެ ގިނަ އަދަދެއްގެ ބަޔަކު ހަރަކާތްތެރިވެ އެކަށީގެންނުވާ މިންވަރަށް ބާރުގެ ބޭނުން ކުރާތީ އިދިކޮޅު ފަރާތްތަކުން ވަނީ ކަންބޮޑުވުން ފާޅު ކުރަމުންނެވެ.
އިދިިކޮޅުން ކުރިއަށް ގެންދާ އިންޑިއާ އައުޓް ހަރަކާތަށް ޖާގަ ނުދޭތީ މިކަން ބައިނަލް އަގުވާމީ ސަލާމުކަމަށްވެސް މިހާރުވަނީ އައިސްފައެވެ. މިގޮތުން އެމެންސްޓީ އިންޓަރނޭޝަަނަލްގެ ސައުތު އޭޝިއާ ރީޖަނަލް އޮފީހުން ކޮށްފައިވާ ޓުވީޓެއްގައި ވިދާޅުވެފައިވަނީ، ރާއްްޖޭގައި، ސުލްހަވެރިކަމާއެކު މުޒާހިރާ ކުރުމާއި ޚިޔާލުފާޅުކުރުމަށް މުވައްސަސާތަކުން ހުރަސް އަޅަމުންދާ ކަމަށާއި، އަދި އިދިކޮޅު ފަރާތްތަކުން ކުރިޔަށް ގެންދާ އިންޑިއާ އައުޓު ހަރަކާތުން ގައުމީ ސަލާމަށް ނުރައްކާވާކަމަށް ބުނެ، ނެރެފައިވާ ރައީސުލްޖުމްހޫރިއްޔާގެ ގަރާރުން ސުލްހަވެރިކަމާއެކު އެއްވުންތައް ބޭއްވުމުގެ ހައްގު ނިގުޅައިގެންފައި ވާކަމުގައެވެ.
އެމްނެސްޓީ އިންޓަރނޭޝަނަލްއިން ކޮށްފައިވާ ޓުވީޓުގައި އިތުރަަށް ވިދާޅުވެފައިވަނީ، ސުލްހަވެރިކަމާއިއެކު އެއްވެ އުޅުމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަން ހަނި ކުރެވެންވާނީ، ހާލަތާއި ބައްދަލު މިންވަރަކަށް ބަލާ، ގާނޫނުތަކުގައި ކަނޑައެޅިފައިވާ ގޮތުގެ މަތިން ކަމުގައެވެ. އަދި މީގެ އިތުރުން، މުޒާހިރާ ކުރަމުންދާ ފަރާރްތަކާއި ދެކޮޅަށް ހާލަތާއި ނުބައްދަލު ބާރުގެ ބޭނުން ކުރަމުންދާ ކަމަށާއި، މިކަންކަން ތަހުގީގު ކުރުމަށްވެސް އެޖަމިއްޔާއިންވަނީ ސަރުކާރަށް ގޮވާލާފައެވެ.
އިދިކޮޅު ފަރާތްތަކުން މާލޭގެ މަގުތަކުގައި ކުރިޔަށް ގެންދާ އިންޑިއާ އައުޓު ހަރަކާތްތައް ހުއްޓުވުމަށް ސަލާމަތީ ބާރުތަކުން ހިންގަމުންދާ ހަރަކާތްތަކުގެ ތެރޭގައި، ސަލާމަތީ ބާރުގައި ހިމެނޭ ސިފައިންގެ މީހަކު، އިދިކޮޅު ކޯލިޝަނުން މާލޭގައި ކުރިއަށްދިޔަ ހިނގާލުމުގައި އަންހެނެއްގެ އަތުގައި އޮތް "އިންޑިއާ އައުޓް" ދިދައެއް އަތުލަން އެއަންހެން މީހާ ފަހަތުން ދުވާ ވީޑިއޯއެއް އާންމުވެ، ގިނަ ބައެއްގެ ފާޑުކިޔުން ވަނީ އެމްއެންޑީފަށް އަމާޒު ވެފައެވެ.
