ބޮލީވުޑްގެ އަރަމުން އަންނަ ޒުވާ އެކްޓަރު ކާތިކް އާރިޔަން، އޭނާ އާއި ސާރާ އަލީ ޚާނާ ދެމެދުގައި ލޯބީގެ ގުޅުމެއް އޮތް ކަމަށް އެބަސްވެއްޖެއެވެ.
މި ދެމީހުން ބައްދަލުވީ އެމީހުން އެކުގައި ކުޅުނު ފިލްމް " ލަވް އާޖް ކަލް" ކުޅުނު އިރުއެވެ. ފިލްމުގެ ސެޓުގައި ދެމީހުން ގާތްވެ އެމީހުން ލޯބީގެ ގޮތުން ގުޅިގެން އުޅޭކަމުގެ އަޑު އެދުވަސްވަރު ވަރަށް ގަދަވިއެވެ.
ހަމަ އެއާއެކު ފިލްމު ރިލީޒްކުރިތާ މާގިނަ ދުވަހެއް ނުވެ އެމީހުން ރުޅިވި ކަމުގެ އަޑުވެސް ގަދަވިއެވެ. އަދި ފަހުން އެމީހުންގެ މެދުގައި އެއްވެސް ގުޅުމެއް ނެއްކަމަށް ވަނީ އިއުލާން ކޮށްފައެވެ.
ބޫލް ބުލައްޔާ 2 ޕްރޮމޯޓް ކުރަން ބޭއްވި ނޫސްވެރިންގެ ބައަދަލުވުމެއްގައި، ތަރިން ފިލްމުތައް ޕްރޮމޯޓްކުރުމަށް އެކަކު އަނެކަކުގެ މެދުގައި ލޯބީގެ ގުޅުމެއް އޮތްކަން ދެއްކުމަށް މަސައްކަތްކުރަނީތޯ ކާތިކާ ވަނީ ސުވާލު ކޮށްފައެވެ. އޭގެ ޖަވާބުގައި ކާތިކް ބުނީ އެއީ ޕްރޮމޯޝަނަލް ސްޓަންޓެއް ނޫން ކަމަށެވެ.
އެހެން ކަމުން މިހާރު ބޮޑަށް ބެލެވެނީ ކާތިކާއި ސާރާ ކުޑަދުވަސްކޮޅަކަށް ނަމަވެސް ރައްޓެހިވެގެން އުޅެފައި ވާކަމަށެވެ. ނަމަވެސް އެގުޅުން ކުރިއަށް ނުގޮސް ވަނީ ފުލްސްޓޮޕް ޖެހިފައެވެ.
