އެމެރިކާގެ ކޮންގްރެސްއިން ފާސް ކޮށްފައިވާ، އެމެރިކާއިން ޔޫކުރެއިންއަށް ފޯރުކޮށްދޭ 40 ބިލިއަން އެމެރިކާ ޑޮލަރުގެ އެހީގެ ބިލްގައި ބައިޑްން ސޮއިކޮށް، އެ ބިލް ތަސްދީގު ކުރުމަށްޓަކާ، ކޮންގްރެސްއިން ފާސްކޮށްފައިވާ މިބިލް ސައުތު ކޮރެއާއަށް ގެންދިއުމަށް ހަމަޖެހިއްޖެއެވެ.
ކޮންގްރެސްއިން ފާސްކޮށްފައިވާ މި ބިލް ގާނޫނަކަށް ވެގެންދާނީ، ބައިޑްން ސޮއިކުރައްވާ ތަސްދީގު ކުރެއްވުމަށްފަހުއެވެ. މިވަގުތު ބައިޑްން ހުންނެވީ އޭޝިއާއަށް ކުރައްވަމުން ގެންދަވާ ދަތުރުފުޅެއްގައި ސައުތު ކޮރެއާއަށް ވަޑައިގެން އަގައުމުގެ ވެރިރަށް ސޯލްގައެވެ.
އެމެރިކާގެ ކޮންގްރެސްއިން ފާސްކޮށްފައިވާ 40 ބިލިއަން އެމެރިކާ ޑޮލަރުގެ މި ބިލްގައި ހިމެނެނީ އަސްކަރީ، އިގްތިސާދީ އަދި އިންސާނީ އެހީތެރިކަން ފޯރުކޮށް ދިނުމަށް ހިމަނާފައިވާ ފައިސާގެ އެހީތެރިކަމެވެ.
މިމަހު ކުރީކޮޅު ހައުސް އޮފް ރެޕްރެސެންޓޭޓިވްސްއިން ފާސްކޮށްފައިވާ މި ބިލް ކޮންގްރެސްއިން ފާސް ކޮށްފައިވަނީ 86 މެމްބަރުންގެ ތާއީދާއެކީއެވެ. ބިލާއި ދެކޮޅަށް ވޯޓު ދެއްވާފައިވަނީ ކޮންގްރެސްގެ 11 މެމްބަރެކެވެ.
އެމެރިކާއިން ޔޫކުރެއިންއަށް ފޯރުކޮށްދޭ 40 ބިލިއަން އެމެރިކާ ޑޮލަރުގެ ޕެކޭޖުން ޔޫކުރެއިންގައިވާ އެމެރިކާއިން ފޯރުކޮށްދީފައިވާ އަސްކަރީ ސާމާނު މަރާމާތު ކުރުމަށް ޚަރަދު ކުރުމުގެ އިތުރުން، ޔޫކުރެއިންގެ އަސްކަރިއްޔާއަށާއި އަދި ނޭޝަނަލް ސެކިއުރިޓީ ފޯސްއަށް އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ.
އަދި މީގެ އިތުރުން، ޕަބްލިކް ހެލްތަށާއި މެޑިކަލް ސަޕޯޓުގެ ގޮތުގައިވެސް އެހީތެރިކަން ފޯރުކޮށް ދިނުމަށް ވަނީ ހަމަޖެހިފައެވެ.
އެމެރިކާއިން ޔޫކުރެއިންއަށް ފޯރުކޮށްދެމުންދާ އެހީތެރިކަމަށް، އެމެރިކާގެ ކޮންގްރެސްގެ ދެ ޕާޓީގެ ތާއީދުވެސް ވަނީ ލިބިގެން ގޮސްފައެވެ.
ބައިޑްންވަނީ ކުރިޔަށް އޮތް 5 މަސްދުވަހުގެ ތެރޭގައި އެމެރިކާއިން ޔޫކުރެއިންއަށް 33 ބިލިއަން އެމެރިކާ ޑޮލަރު ޚަރަދު ކުރަންޖެހޭނެ ކަމަށް ވިދާޅުވެފައެވެ. އެހެންނަމަވެސް ކޮންގްރެސްއިން ވަނި އެއަދަދު 40 ބިލިއަނަށް އިތުރު ކޮށްދީފައެވެ.
