ޔޫކުރެއިން ސިފައިން ހައްޔަރު ކޮށްފައިވާ، ރަޝިއާގެ 21 އަހަރު، ސިފައިންގެ މީހެއްގެ މައްޗަށް، ޔޫކުރެއިންގައި ކުރިޔަށްދާ ހަނގުރާމާގައި، އެގައުމުގެ ރައްޔިތުންނާއި ދެކޮޅަށް ހަނގުރާމައިގެ ޖަރީމާތައް ހިންގާފާއިވާ ކަމުގެ ދައުވާ އުފުލާ، ޔޫކުރެއިންގެ ކޯޓުގައި ޝަރީއަތް ކުރަން ފަށައިފިއެވެ.
ޔޫކުރެއިންގައި ހައްޔަރު ކޮށްފައިވާ، ވަޑިމް ޝިޝިމަރިން ނަމަކަށް ކިޔާ ރަޝިއާގެ ސިފައިންގެ މީހާ ވަނީ ހުކުރު ދުވަހު ކޯޓަށް ހާޒިރު ކޮށްފައެވެ. މިއީ އޭނާ މި ޝަރީއަތުގައި ކޯޓަށް ހާޒިރުކުރި 3 ވަނަ ދުވަހެވެ. އަދި މިއީ، ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށިފަހުން ރަޝިއާގެ ސިފައިންގެ މީހެއްގެ މައްޗަށް ޔޫކުރެއިންގައި ކުރިޔަށްދާ ފުރަތަމަ ޝަރީޢަތްވެސް މެއެވެ.
މި ޝަރީއަތުގައި ޝިޝިމަރިންވަނީ ޔޫކުރެއިންގެ އާންމުންގެ މީހަކަށް ހަމަލާދީ އޭނާ މަރާލިކަމަށް އެއްބަސް ވެފައެވެ.
އަހަރެންނަށް މާފްކުރުން އެދެން. އެކަން ހިނގި ވަގުތު އަހަރެން ހުރީ ވަރަށް ބޮޑަށް ބިރުގެންފަ. އަހަރެން އޭނާ މަރާލަން ބޭނުމެއް ނުވޭ. އެހެންނަމަވެސް އޭނާ މަރުވީ އަހަރެން އަތުން. އަހަރެން އެކަމަށް އިންކާރު ކުރަން ބޭނުމެއް ނޫން.
ހުކުރު ދުވަހު އޮތް އަޑުއެހުމުގައި ޝިޝިމަރިން ކޯޓުގައި ބުނެފައި ވެއެވެ.
ޝިޝިމަރިންގެ ދިފާއީ ވަކީލު އޭނާގެ ދިފާޢުގައި ވާހަކަ ދައްކަވަމުން ވިދާޅުވެފައިވަނީ، ޔޫކުރެއިންގައި ހިނގަމުންދަނީ ކޮން ކަންތައްތަކެއް ކަމެއް އޭނާއަށް ރަގަޅަށް ފަހުމް ވެފައި ނުވާކަމުގައެވެ.
"އާންމުންނާއި އަދި ސިފައިންގެ ގިނަ މީހުން މަރުވެފައިވާއިރު، އޭގެ ނަތީޖާއެއްގެ ގޮތުން ދެން ކުރިމަތިވާނެ ކަންކަމެއް" ޝިޝިމަރިންއަށްވެސް އަދި އެނޫން ރަޝިއާ ސިފައިންނަށްވެސް ރަގަޅަށް ފަހުން ވެފައި ނުވާކަމުގައި ދިފާޢީ ގާނޫނީ ވަކީލު ވިދާޅުވެފައި ވެއެވެ.
"ހިނގަމުންދާ ހަނގުރާމައިގެ ސަބަބުންނާއި އަދި އޭނާގެ ކޮމާންޑަރުންގެ ޕްރެޝަރުގެ ސަބަބުން ޝިޝިމަރިން ހުރީ ނަފްސާނީ ގޮތުން އެންމެ ރަގަޅު ހާލަތުގައެއް ނޫން. މިގޮތުން އަހަރެން ހެދި އެސެމަންޓްތަކުން ދައްކާފައިވާ ގޮތުގައި ޝިޝިމަރިން ހިންގާފައިވާ އަމަލަކީ ގަސްތުގައި މީހަކު މެރުމުގެ މަގުސަދުގައި ހިންގާފައިވާ އަމަލެއް ނޫން،" ރަޝިއާގެ ސިފައިންގެ މީހާގެ ގާނޫނީ ވަކީ ކޯޓުގައި ވާހަކަ ދައްކަވަމުން ވިދާޅު ވެފައި ވެއެވެ.
ހަގުރާމަ ފެށުނުތާ 4 ވަނަ ދުވަހު ޝިޝިމަރިން ވަނީ، ޔޫކުރެއިންގެ ސުމޭ ސިޓީގައި، އުމުރުން 62 އަހަރުގެ މީހެއްގެ ގަޔަށް ބަޑިޖަހާ އޭނާ މަރާލާފައެވެ. އަދި އޭނާއަށް އުމުރު ދުވަހުގެ ޖަލު ހުކުމެއް އަންނާނޭ ކަމަށް ބެލެވެއެވެ.
މި ޝަރީއަތުގައި، މަރުވި 62 މީހާގެ ހުވަފަތް އަންހެނުންގެ ކިބައިން ޝިޝިމަރިން ވަނީ މާފަށް އެދިފައެވެ.
