ލުބުނާނުގައި ބޭއްވުނު އާންމު އިންތިޚާބުގައި އެގައުމުގެ ހިޒްބުﷲ ޖަމާއަތާއި އަދި އެޖަމާއަތުގެ ބައިވެރިން ބަލި ގަބޫލުކުރާ ކަމުގައި އެޖަމާއަތުގެ ވެރިޔާ އިރާނުގެ ތާއީދު އޮންނަ ހަސަން ނަސަރުﷲ ވިދާޅު ވެއްޖެއެވެ. އަދި ވިދާޅުވި ގޮތުގައި އެގައުމުގެ ގާނޫނުހަދާ މަޖިލިހުގެ މެޖޯރިޓީ އެޕާޓީއަށް ލިބިގެން ގޮސްފައި ނުވާއިރު، އެހެން ޕާޓީތަކުންވެސް ވަނީ އެއްޕާޓީއަކަށް ބޮޑު މެޖޯރިޓީއެއް ހޯދުމުގެ ނާކާމިޔާބު ވެފައެވެ.
"ގާނޫނުހަދާ މަޖިލިހުގައި 2018ވަނަ އަހަރު އޮތް ހާލަތާއި ޚިލާފަށް، މިފަހަރު އެއްވެސް ޕާޓީއަކަށް މެޖޯރިޓީ ލިބިފައެއް ނުވޭ،" އޭނާ ވިދާޅުވެފައި ވެއެވެ.
މިހަފްތާގެ އާދީއްތަ ދުވަހު ބޭއްވުނު އާންމު އިންތިޚާބުގައި ހިޒްބުﷲ ޖަމާއަތާއި އެ ޖަމާއަތަށް ތާއީދުކުރާ ފަރާތްތަކަށް ލިބިފައިވަނީ 62 ގޮޑި ކަމަށް ރޮއިޓާރސްއިން ރިޕޯޓު ކޮށްފައި ވެއެވެ. މި ނަތީޖާއާއެކު، 2018ވަނަ އަހަރު، ގާނޫނުހަދާ މަޖިލިހުގެ 71 ގޮނޑިއާއެކު އެ ޖަމާއަތުން ދަމަހައްޓަމުން އައި މެޖޯރިޓީ ވަނީ ގެއްލިގެން ގޮސްފައެވެ.
މިއިންތިޚާޚުގައި، ހިޒްބުﷲ ޖަމާއަތާއި އަދި އެ ޖަމާއަތގެ ބައިވެޔާ އާމާލްއިން ވަނީ ޝީޢީންނަށް ޚާއްސަ ކުރެވިފައިވާ ހުރިހާ ގޮނޑިއަކަށް ވާދަ ކޮށްފައެވެ. އެހެންނަމެވެސް ހިޒުބުﷲގެ އެންމެ ދުވަސްވީ ބައެއް ބައިވެރިން ކަމުގައިވާ ސުންނީންނާއި ޑުރުޒް އަދި ކުރިސްޓިއަން ޕޮލިޓީޝަނުންނަށް އެމީހުންގެ ގޮނޑިތައް ވަނީ ގެއްލިފައެވެ.
މިގޮތުން މި އިންތިޚާބުގައި، ހިޒުބުﷲ އާއި ދެކޮޅު، ލެބަނީސް ފޯރސެސް ޕާޓީންނާއި، އަލަށް އިންތިޚާބުގައި ވާދަކުރި އިސްލާހަށް ތާއީދުކުރާ ކެނޑިޑޭޓުންނާއި، އަދި މިނިވަން ކެނޑިޑޭޓުންގެ ގޮތުގައި ވާދަކުރި ބައެއް ފަރާތްތަކަށްވެސް ވަނީ އިންތިޚާބުގައި ކާމިޔާބީތަކެއް ލިބިފައެވެ.
މި ނަތީޖާއަކީ ބޮޑު ކާމިޔާބެއްގެ ގޮތުގައި ނަސްރުﷲ ވިދާޅުވި ނަމަވެސް، މަސްރަހު ދިރާސާކުރާ ފަރާތްތަކުން ވިދާޅުވެފައިވަނީ މިއީ ހިޒުބުﷲ ޖަމާއަތަށް ލިބިގެންދިޔަ ބޮޑު ނާކާމިޔާބީއެއް ކަމުގައެވެ.
އަދި ނަސްރުﷲ ވަނީ، ވަކިވަކި ވެގަތުމަކީ ބޮޑު ހަމަނުޖެހުމަކަށް ދާނޭކަމެއް ކަމަށް ވިދާޅުވެ، ސިޔަސީ އެކި ޕާޓީތަކުގެ މެދުގައި ގުޅުން ބަދަހިކުރުމަށް ގޮވާލައްވާފައެވެ.
މިއިންތިޚާބުގެ ނަތީޖާއިން އެއްވެސް ޕާޓީއަކަށް މެޖޯރިޓީ ނުލިބުމާއި ގުޅިގެން، މިހާރު ލުބުނާނަށް ކުރިމަތިވެފައިވާ އިގްތިސާދީ ކާރިސާއިން އަރައިގަތުމަށް އެގައުމަށް ގެންނަންޖެހިފައިވާ އިސްލާހީ ބަަދަލުތައް ގެނައުމުގައި އިތުރު ގޮންޖެހުންތަކާއި ކުރިމަތިވާނެކަމަށް ވަނީ ބެލެވިފައެވެ.
