އީރާނުގެ ދެކުނުގައި އޮންނަ ގޭޝްމް އައިލެންޑްގެ މަތިން ދަތުރުކުރަމުން ދިޔަ އެމެރިކާގެ އެމްކިއު-9 ޑްރޯނެއް އީރާނުގެ ވައިގެ ދިފާއީ ބާރުތަކުން ވައްޓާލައިފިއެވެ.
އީރާނުގެ ސިފައިންގެ އާންމު ގުޅުންތަކުގެ އޮފީހުން ބުނީ، ގުޅިފައިވާ ވައިގެ ދިފާއީ ނިޒާމުގެ ދަށުން ޒަމާނީ ވަސީލަތްތައް ބޭނުންކޮށްގެން ޑްރޯން ވައްޓާލީ ކަމަށެވެ. ގޭޝްމްގެ ސޫޒާ ސަރަހައްދަށް ދެ މިސައިލް ވެއްޓުނު ކަމަށްވެސް އީރާނުގެ މީޑިއާތަކުން ރިޕޯޓްކޮށްފައިވެއެވެ.
ސަރަހައްދުން އެމެރިކާގެ އަސްކަރީ މަނަވަރުތައް ފަސްޖެހެމުން ދިޔަ ނަމަވެސް، އެމެރިކާއިން އަލުން ހަމަލާ ދީފާނެކަމުގެ އިންޒާރު އީރާނުން ދީފިއެވެ. އީރާނުގެ އަސްކަރިއްޔާގެ ތަރުޖަމާނު ބްރިގޭޑިއާ ޖެނެރަލް މުހައްމަދު އަކްރަމީނިއާ ބުނީ، ސިޔާސީ ނުތަނަވަސްކަމުގެ ސަބަބުން އެމެރިކާއިން އަލުން ހަމަލާއެއް ދިނުމަކީ އެކަށީގެންވާ ކަމެއް ކަމަށެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ބުނީ އީރާނާއެކު މަޝްވަރާތައް ކުރިއަށްދާ ކަމަށާއި، އީރާނުގެ މައްޗަށް އެމެރިކާއަށް ކުރިއެރުން ލިބިފައިވާ ކަމަށެވެ. ހޯރްމުޒް ކަނޑުއޮޅިން ތެޔޮ އުފުލުން ކުރިއަށްދާ ކަމަށްވެސް ޓްރަމްޕް ބުންޏެވެ.
މިއާއެކު، ނިއުކްލިއާ ނުރައްކަލަކުން ރައްކާތެރިވުމުގެ ގޮތުން ބުޝެހްރު ސަރަހައްދުގެ ރައްޔިތުންނަށް އަޔޮޑިން ގުޅަ ދޫކުރަން އީރާނުން ފަށައިފިއެވެ.
ސަރަހައްދުގެ އެހެން ހަބަރުތަކުގައި، އިސްރާއީލާއި އެމެރިކާއާއި އިނގިރޭސިވިލާތާ ގުޅުމެއް ނެތް އުޅަނދުފަހަރަށް ރަތްކަނޑުން ރައްކާތެރިކަމާއެކު ދަތުރުކުރުމުގެ ހުއްދަ ހޫތީން އީމެއިލް މެދުވެރިކޮށް ދެމުންދާ ކަމަށް ވޯލް ސްޓްރީޓް ޖާނަލްއިން ހާމަކޮށްފިއެވެ. ލުބުނާނުގެ އަސްކަރިއްޔާގެ ކޮމާންޑަރު ޖެނެރަލް ރޮޑޮލްފް ހައިކަލް ބުނީ ލުބުނާނަށް އޮތް އެންމެ ބޮޑު ނުރައްކަލަކީ އިސްރާއީލުގެ އަސްކަރިއްޔާ ކަމަށާއި، އިސްރާއީލުން ލުބުނާނުގެ ބިމުން ނުކުމެ ދާންޖެހޭ ކަމަށެވެ. އީރާނާއެކު ހަނގުރާމަ އަލުން ފެށިއްޖެނަމަ ލުބުނާނަށް ހަމަލާދިނުމަށް އިސްރާއީލުގެ އަސްކަރިއްޔާ ތައްޔާރުވަމުން ދެއެވެ.
މީގެ އިތުރުން، 80 މިލިއަން ޑޮލަރުގެ މާލީ ދަތިކަމެއް ކުރިމަތިވެފައިވާ ފަލަސްތީނުގެ ރެފިއުޖީންނަށް އެހީވާ އދ. ގެ އެޖެންސީ (ޔޫއެންއާރުޑަބްލިޔުއޭ) އަށް އެއްބާރުލުން ދިނުމަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރޭޝް ގޮވާލާފައިވާއިރު، ހުޅަނގު އައްސޭރީގައި އިސްރާއީލުގެ ވަޒަންވެރިން ހިންގާ އުދުވާނީ އަމަލުތައް ތުރުކީގެ ރައީސް ރަޖެޕް ތައްޔިބު އުރުދުޣާން ކުށްވެރިކޮށްފިއެވެ.
ކޮމެންޓު ފޮނުވާ